Hebreos 10

1Ate' tkawb'il Moyses naqtaq jun t-xlekumalju' ti'xti' tb'anilxi'x atitoq tulel, mya awtju' kawb'il lu tzul q'onte ti'xti' tb'anilxi'x qe. Qu'mtzun layx che okju' xjal tz'aqli twitz Dyos tu'n kawb'il, tu'nju' axchojb'ilju' inkub' kyq'o'n twitz Dyos atl junjun ab'q'i. 2Naqwit inche ẍtilsetju' xjal te il tu'nju' kawb'il, mixti'wtlo kyil ex mixti'wtlo nxi' kyq'o'ntl chojb'il atl junjun ab'q'i. 3Aye'tzunkye inx xikyq'o'n chojb'ilte kyil atl junjun ab'q'i, ex atl junjun ab'q'i ntzaj kyna'n kyil. 4Qu'n layx b'ent tnajsette' kyil xjal kyu'n kychk'el tman wakx ex kychk'el tman chib'. 5Qu'mtzun tma Krist te Dyos tej tul twitz tx'otx' kjalu: Min tajb'ilta chojb'il ex oyaj twitza, qu'n matxi' tzaj tq'o'na nxmilale'. 6Myab'a'n inche ela' chojb'il k'ok'sb'il exqe' oyaj tu'n tnajsetju' kyil xjal toj twitza. 7Qu'mtzun xinma'ne' kjalu: Luqine' lu, tu'n nb'inchanteye' tajb'ila, kse'nxju' tz'ib'a'n wi'je' toju' Tu'jil tyola, nman Dyos, nchije', chij. 8Tnejelxi'x intma'n qa min tajb'il Dyos chojb'il mujqa alu'mj te oyaj, ex min tajb'ilju' chojb'il k'ok'sb'il te najsb'il kyil xjal, maskye iky intma'nju' toj kawb'il. 9Ex intma'ntl: Luqine' lu, Dyos, machin nule' tu'n nb'inchanteye' tajb'ila, chij. Atzun ja'lu a ntma'nju' qa mixti'tl kyajb'enju' ojtxi' chojb'il ex a Krist sok tq'o'n Dyos te jun ak'a'j chojb'il. 10Ma'tzun qo jaw t-sk'o'n Dyos tu'nju' japun tajb'il tu'n Qajaw Jesukrist tej txitq'o'n t-xmilal te chojb'il jumajx ex te kukxju'. 11Kkyaqilju' pale aj Juda nche okx toj tja Dyos tkyaqil q'ij ex aye'x chojb'ilju' nche kub' kyq'o'n, maskyetzun mixti'x in najset kyil xjal kyu'n. 12Atzunte Jesukrist naq junxju' chojb'il xtaq' twitz Dyos tu'n tnajset kyil xjal tejumajx, ex matxi' kub' qe toj tb'a'nq'ob' Dyos. 13Axtzuntzu' k'ayola' tzmax ajkykub' tq'o'n Dyos tajq'oj tjaq' tqan, 14qu'n naq tu'n junmaj kyim Krist, che okyela' xjal tzinunxi'x tejumajx tu'n Dyos tu'n kyajb'en o'kxtzu' te. 15Qu'n iku' ntma'n Xewb'aj Xjan qe tej tmante kjalu: 16Aju' yol kjel b'entti'j wu'ne' kyuk'i'l ajtpon kanun tq'ijlalil, aja'lu, chi Qajaw: Che kb'el nq'o'ne' nkawb'ile' toj kyanmi ex che kb'el ntz'ib'a'ne' toj kynab'l. 17Ex lay tzajnna'n jumajtle' kyil ex kyb'inchb'aj myab'a'n, chi Xewb'aj Xjan. 18Ikytzu'n, qa matxi' che kub'najsa'nju' il, min nojqelan tu'n tkub'tl chojb'il te najsb'il il. 19Qu'mtzun e'ntzik ex e'witz'in, matxi' tzaj q'o'n anb'il qe tu'n qokx toju' najb'il Xjanxi'x, naq tu'nel tchk'el Jesukrist, 20qa lepchiqo' ti'ju' ak'a'j b'e te chwinqlal xtjaq Jesukrist qe ti'ju' xb'alun lik'u'n te maqb'il toju' ja te k'u'lb'il, xi' nyolina' xb'alun lu ti'jku' t-xmilal Jesukrist. 21Ja'lo ati jun qpale nimxi'x toklen toju' ja xjan toj kya'j. 22Qu'mtzun qoqe' lq'ex tk'etz Qman Dyos tu'n tkyaqil qanmi axxi'x ex tuk'i'l qokslab'l axxi'x, ẍtiluntl qanmi te il ex txjo'ntl qxmilal tuk'i'l a' ẍnu'l teju' il. 23Qek qk'u'j b'a'nxi'x ti'j Dyos ex lalun jawje qk'u'j toj qokslab'l, qu'n kjapumelte' Dyos tyol tu'n oje tzaj ttziya'n qe. 24Qjyom tu'me'l tu'n qoninte qib' qxolilex, tu'n tten qk'u'jlalil ex tu'n qb'inchanteju' b'a'n. 25Lalun kyej qtzaqpi'n tu'n qb'uyinteqib', kse'n nkyb'incha'n junjun, ape' qb'inchamju' qq'uqb'am qk'u'j jun te juntel; ex qq'onk tilil tu'nju' in qka'yi'n matxi' tzaj lq'e tq'ijlalil tulel Qajaw Jesukrist. 26Qu'n qa inx qo b'inchan il extzun matxi' tz'el qnik' ti'ju' yol axxi'x, mixti' juntl chojb'ilte qil; 27noq o'kxtl in qayo'nju' xob'ajilxi'x ajqok toj xjel te b'ajsb'il, ajkyb'aju' ajq'oj ti'j Dyos toj q'aq'. 28Qa ati jun xjal inel txalpuj toj tkawb'il Moyses, extzunqa ati kab'e' mujqa oxe' tziyal ti'j qa axx min nxitnima'n, mixti'x ntzaj laqj tk'u'jlalil ex majx nkub' b'yo'n. 29¿Yajtzu'n ja'lo, ma myatzulo nimxi'x tz'e'ysb'il witzb'aj tzul tib'aju' xjal nkub' wab'inte Tk'wal Dyos ex neltik'u'nju' tchk'el, ex inel kysuchu'n T-xew Dyos nk'u'jlankye xjal? Qu'n aju' tchk'el Qajaw kuwsalteju' yol kyejni b'entti'j tu'n Dyos quk'i'l ex tu'n tchk'el Krist xtxjeta' kyanmi xjal toj il. 30B'i'nqe' qu'n aju' tma Qajaw kjalu: Ayinwe' chin q'olte tu'me'l t-xel kyeju' xjal nche b'inchan taq'wix ex ayine' chin q'olte tz'e'ysb'il kywitz, chij. Ex tmatl kjalu: Aku'te Qajaw k'okyel q'onte ttanam toj xjel, chij. 31¡Xob'ajilxi'xte' qama qokub' tz'aq toj tq'ob'ju' Dyos itz'! 32Kyna'ntze' b'aj kyi'je' ojtxi' tej tzqekutoq kyk'monteju'ye' spik'un, tej tik'xkyu'ne' toju' yajb'il kuwxi'x kyu'n xjal. 33Ate' junjunkye' eb'jo'k yasu'n ex eb'jo'k ili'n kyu'n xjal kywitz kykyaqil xjal, aye'tzun junjuntlkye' tzaj b'is toj kyanmiye' tu'nju' nche yajtiju' kyuk'ile' toj kytzi xjal. 34Tzaj q'aq'an kyk'u'je' kyi'ju' ate'kxtoq toj kars, expe' e'tzalaje' tu'nju' b'je'l q'i'nju' ati kyeye', qu'n b'i'ntl kyu'ne' qa ati junkye' kyetzb'ile' toj kya'j tb'anilxi'x ex lay b'aj. 35Qu'mtzun qek kyk'u'je' ti'j Dyos, qu'n ktzajel tq'o'n Dyos jun chojb'il nimxi'x kyeye' qa q'uqlok kyk'u'je' kukxju' ti'j. 36In nojqelan tu'n tten kyipumale' toj ju' yajb'il, tu'ntzun kyb'inchanteye' tajb'il Dyos ex tu'n kyk'monteye' oje tzaj ttziya'n Dyos kyeye'. 37Qu'n intma'n toj Tu'jil tyol Dyos kjalu: Ch'inxtl, naqch'inxtl tulju' ati tulel. Lu xi' tulkanun. 38Aju' xjal tnik'alti'j naq tu'n tokslab'l k'anq'ila'; qatzun ma tz'anjti'j ti'jxi', lay chin tzalaje' ti'j, chiju' tz'ib'a'n. 39Ayo'tzunqe mya ikqo'ju' kse'nqe' nanjkyi'j kyi'jxi' ex nche'x toj naje'n, xi'toqo'qe kyuk'ilju' nkub'ti'j kolb'il kyu'n, qu'n ati kyokslab'l.

will be added

X\