Gálatas 5

1Maqo tzaqpet tu'n Krist tu'n qten tzaqpi'nqo'. Qu'mtzun che we'ku'xi'xe' toju' tzaqpib'l lu ex lalun tz'ok kq'o'ntl kyib'e' te lq'o'n majin. 2Ayine' Pawl, kxe'l nma'ne' kyeye', qama tz'ok kq'o'n kyechele' ti'j kychib'jile', mixti' tajb'en Krist kyeye'. 3Kxe'l nma'n junmajtle', alkyexku' xjal matz'ok techel ti'j tchib'jil, ilti'j tu'n tjapun tu'n tkyaqilju' ntma'n toj kawb'il. 4Ti'jku' Krist sela' kypa'n kyib'ju' nkma'n qa che k'metel tu'n Dyos tu'nju' njapun kawb'il kyu'n; in elkyik'o'n t-xtalb'il Dyos. 5Ayo'tzunqe, q'uqli qk'u'j tu'n Xewb'aj Xjan qa tu'n qokslab'l qo k'metela' tu'n Dyos. 6Qu'n tu'n t-xtalb'il Krist, mixti'tlte' tajb'en qa tok qechel ti'j qchib'jil mujqa min. Ate ati toklen aju' qokslab'l ti'j Krist ati taq'unb'en. 7Ljo'ntoq kyu'ne' toju' b'a'n b'e. ¿Alkye nmaqun kyeye' tu'n lalun knimaye' ax? 8Myate Dyos nmaqun, ju' txkonkyeye' tu'n knimanteye'. 9Chi jun yol: tu'nte' ch'i'n tx'am nchukji tkyaqil tq'otjil wab'j, ch, 10ex q'uqliwe' nk'u'j ti'j Qajaw qa lay kxima juntlkye' tu'me'l; atzunte' tok chuksalkyeye' kb'el tz'e'ysa'n twitz tu'n Dyos, alkyexku'. 11E'ntzik ex e'witz'in, naqwit nxinma'nwe' tu'n tok kyechel xjal ti'j kychib'jil, miwtlojun nkjyo'n aj Juda toj nq'ije', qu'n miwtlojun ntzaj ktx'u'jil tu'n pakb'ab'l ti'j tkamik Krist. 12Aye'tzunkye' ate'k xitulkyeye' na'j, ¡naqwit ikj majx tz'el kkapari'n kyib'! 13E'ntzik ex e'witz'in, oje che txketkye' tu'n ktzaqpete'. Lantzun tz'ajb'en tzaqpib'l lu kyu'ne' tu'n kb'inchanteye' tajb'il kychib'jile'. Kyonimkye' kyib' toj tk'u'jlalil. 14Qu'n tkyaqil kawb'il nok toju' jun chaq'b'il lu: K'u'jlama twnaqila kse'nxta ntk'u'jla'n tib'a, chij. 15Kka'yinx kyib'e', qu'n qa nkwan kyib'e' jun te juntel, aye'xe' che b'elxonte kyib'e'. 16Qu'mtzun nxinma'ne': Che anq'ine' se'nx tajb'il Xewb'aj Xjan, lalun kb'inchaye' tajb'il kychib'jile'. 17Qu'n nche q'ojinju' tajb'il qchib'jil ti'ju' Xewb'aj Xjan, exju' Xewb'aj Xjan nq'ojin kyi'ju' tajb'il chib'j. Nq'ojinju' jun ti'ju' juntl, qu'mtzun lay b'ent kb'inchanteye' kyajb'ile'. 18Qatzun a Xewb'aj q'elkyeye', mixti'qetzuntze' tjaq' kawb'il. 19Q'ancha'l qexi'xkye' xjal nkb'incha'n tajb'il kychib'jil, aye': ajpajil, tz'ilxi'x kychwinqlal, majx q'o'nkyib' toj achb'il, 20witzleb'il, ajk'ayil, tx'a'lti'jk'u'jb'aj, q'oj, xky'aqli'n, tx'u'jilj, nche ok ajq'oj kyi'j txqantl, q'ol pa'jtib'il ex nkb'uyi'nchaq kb'aj, 21naq ntx'a'ltikyk'u'j, tx'ujte'n, jamjoni'n, ex nim ti'xti' myab'a'n nkb'incha'n. Kxe'l wab'tzi'ne' kyeye', kse'nx oje txinma'ne', aye' nche b'inchankye ja'lu, lay che okx toj tkawb'il Dyos. 22Atzunte' ntq'o'n Xewb'aj Xjan aju' tk'u'jlalil, tzalajb'il, nak'b'il, pasens, b'a'nwnaqil, tu'n tb'inchet b'a'n kye txqantl, nqe qk'u'j ti'j Dyos, 23me'sb'il ex tu'n qjk'unte qib'. Mixti'te kawb'il kyib'aju' lu. 24Ayo'tzunqe te Krist Jesus qo', oje che kub' qb'yo'n tajb'il qchib'jil ex qachb'il, exju' npon qk'u'j ti'j twitz krus. 25Qa nqo anq'in tu'n Xewb'aj Xjan, qb'inchanxju' tajb'il Xewb'aj Xjan. 26Lalun jaw qnima'nqib', ex lalun kub' qq'o'n q'oj ex tx'a'ltik'u'jb'aj qxol.

will be added

X\