Gálatas 4

1A kxe'l nma'ne' kyeye': qa b'o'sju' etzal ti'j jun etzb'il, ikx noka' se'n jun lq'o'n majin tojun ja, maskye a tajaw tkyaqilju' ati te tman. 2Ate' xjal nche'x ka'yinte ex nk'ulteju' ati te tzmax ajtpon tq'ijlalil q'ma'n tu'n tman. 3Ikxtzun nb'aju' qi'j: tej k'wal qo'toq, ato'toq kjaq' ipumalj nche yajun twitz tx'otx'. 4Tetzunj tjapun tq'ijlalil, tzaj tchq'o'n Dyos Tk'wal, itz'ji tal jun qya tokxtoq tjaq' tkawb'il Moyses, 5tu'n qtzaqpet ayo' ato'toq tjaq' kawb'il ex tu'n qok tq'o'n Dyos te tk'wal. 6Tu'ntzu'n tk'wal qo'tl, tzaj tq'o'n Dyos T-xew Tk'wal toj qanmi; atzu'n Xewb'aj inq'mante kjalu: Taye chij. 7Iktzu'n, mya lq'o'n majin qe'tle', tk'wal Dyos qe'tle'; tu'ntzu'n tk'wal Dyos qe'tle', a tajb'il Dyos tu'n kyetzanteye' t-xtalb'il. 8Tej min kyojtzqi'n toqe' Dyos ojtxi', k'a'yi'nmajin qe'toqe' kyeju' mya dyosqe'. 9Atzun ja'lo matxi' tz'el kynik'e' te Dyos, mujqa matxi' che ojtzqinjtze' tu'n Dyos, ¿Se'n taq'witzun tu'n kyoktle' te k'a'yi'nmajin kyeju' mixti' kyipumal ex mixti'x kyajb'en lu? 10Inxi'x che kyik'sa'ne' q'ij, xjaw ex tajlal ab'q'i. 11¡Nchin jaw sak'puje' kyeye' qa mixti'x soka' waq'unb'ene' kxole'! 12Nchin kub'sane' kyeye' e'ntzik ex e'witz'in: che okxe' se'nwe', qu'n matz'ok nq'o'nwe' wib' se'nkye'. Mixti' junkye' taq'wix xkb'incha weye'. 13Kanli kwitze', in pakb'ane' kxole' tnejel maj tu'n tpaj atitoq jun yab'il wi'je'. 14Atzun yab'il lu ok te jun joyb'ilkyi'je', min nelkyik'u'ne' ex min nelkyi'jla'ne' tu'n tpaju' yab'il lu, in kyk'ampe'ye' naku'j tanjl Dyos qine', ¡naku'j aku' Krist Jesus! 15¿Jatzunta' ktzalajb'ile' atitoq wi'je' nejtl? Naqpe'wtna' jaku'toq b'ent, jakutoq tz'etzkyiq'i'ne' kwitze' tu'n ttzaj kq'o'ne' weye'. 16Tzun ja'lo, ¿mama'wttzunlo chin okye' ajq'oj kyi'je', naq tu'n nxinma'ne' ax kyeye'? 17Inxi'x che laqjkye' xjal kyi'je', ju' kyajb'il tu'n t-xikyiq'i'ne' kawb'il kye aj Juda, mitzun myab'a'n kxim. Ate kyajb'ilu' tu'n tel kypa'n kyib'e' qi'je' tu'ntzun kyok klaqje' kyi'j. 18B'a'nte' tu'n qok laqj kyi'j txqantl, qa tuk'i'l b'a'n xim; ex kukxju', mya o'kx tej antintoqe' kxole'. 19E'nky'ajul, nchin yajti jumajtle' tu'n kpaje', kse'n jun txub'aj ajtb'anix, tzmaxi' k'elel k'ixk'oju' wi'je' ajttenxi'x Krist toj kyanmiye'. 20¡Naqwit ikyj ntine' kxole' ja'lo tu'n nyoline' kyeye' tojuntl tu'me'l, min nkane toj nwitze' se'n tu'n nyolina'ye' kyeye'! 21Kmantz tzune' weye' aye'ye' kyajb'ile' tu'n ktene' tjaq' kawb'il: ¿Ma b'ajx kb'iya'ye' ntma'n kawb'il? 22Intma'n toj tu'jil qa kab'e' tk'wal Ab'raam ten: jun tal jun lq'o'n majin, atzun juntl talku' t-xu'jil, tzaqpi'n. 23A talju' qya lq'o'n majin, itz'ji kse'nx nche itz'ja' kyal xjal; atzu'n talju' tzaqpi'n, itz'ji tu'n tjapunju' ojetoq ttziya Dyos. 24Ati jun tz'elpuna' ja'lu; aye' kab'e' qya lu nkyek'u'n kab'e' yol tziya'n: aju' jun aju' tzaj q'o'n twi' witz Sinayi, yek'u'n tu'n Akar, ttxuju' atitoq tu'n tok te lq'o'n majin. 25Qu'n ate Akar witz Sinayi toj Arab'ya, aju' Jerusalen ati ja'lo, qu'n a nintnamju' tok te lq'o'n majin kyuk'i'lxi' tal, aye' xjal najlqe' toj. 26Atzunte' Jerusalen te toj kya'j tzaqpi'nte', ex ayo' tal. 27Qu'n intma'n toj Tu'jil kjalu: Tzalajxa qya, min nalana, aya mixti' tala; ẍch'ina toj ttzalajb'ila, aya min tojtzqi'na k'ixk'oj ajtitz'ji jun k'wal. Qu'n nimxi'x talju' qya kyejni leb'a'n ktenb'el kyetwitzju' qya ati tk'etz tchmil. 28E'ntzik ex e'witz'in, ikqe'ye' se'n Isaak: aye'ye' k'walb'aj tziya'n tu'n Dyos. 29Kse'n ojtxi', ljo'ntoq toj tq'iju' k'wal itz'ji tu'n Xewb'aj tu'n k'wal itz'ji se'nxkye xjal. 30¿Ti'tzu'n ntma'n toj Tu'jil? Ntma'n kjalu: Xla'jamixa lq'o'n majin tuk'i'lju' tal, qu'n lay txi' tetzb'il talju' qya lq'o'n majin ti'j tetzb'il talju' qya tzaqpi'n, chij. 31E'ntzik ex e'witz'in, mya a'lb'ajqo' teju' qya lq'o'n majin, tal tzaqpi'nqo'.

will be added

X\