Gálatas 3

1¡Mixti'xkye' knab'l aj Kalasya! ¿Alkye xa'kyq'a' sb'u'kyib'e'? Xiqchik'b'a'n ku'xi'xe' Jesukrist jaw twitz krus kyeye' tej txiqpakb'a'ne'. 2O'kx wajb'ile' tu'n ttzaj ktzaq'we'ne' kxe'l nxjelu'ne' kyeye' lu: ¿Ma tu'nju' njapun kawb'il kyu'ne' kk'ama'ye' T-xew Dyos mujqa tu'nju' kk'ame' tpakb'al b'a'n tu'n okslab'l? 3¿Tiqu'ntzun min nkane' toj kwitze'? Tzaj qe kyokslab'le' tnejelxi'x tu'n Xewb'aj Xjan, ¿tzun ja'lo maktzqetelxi'xtl tu'n kyaq'unb'ene' toj kwitze'? 4¿Mamixti'x soka' tu'nju' mache yajtiye' ẍeokslane'? ¡Naqwit mya naqxgan! 5Tzaj tq'o'nte Dyos T-xew kyeye' ex tb'incha b'a'nq'ob'aj kxole', tu'nju' kk'ame' tpakb'al b'a'n ex e'okslane', mya tu'nwtju' njapun kawb'il kyu'ne'. 6Okslante Ab'raam te Dyos, ex k'met tu'n Dyos tu'n tokslab'l. 7Tz'elxtzun knik'e' ti'j, aye'kye tyajajilxi'x Ab'raamju' aye' okslalqe' te Dyos. 8Tz'ib'a'nte' toj Tu'jil atxi'x ojtxi' qatoq che tk'ma' Dyos mya aj Juda tu'n kyokslab'l ti'j Dyos, ojetoq tmaku' tpakb'al b'a'n te Ab'raam kjalu: Kkyaqil nimaqtnam kk'ma' ky'i'wb'il naq tu'nela, chij te. 9Qu'mtzun ky'i'wla'nqe' ati kyokslab'l, junx tuk'i'l Ab'raam okslan te Dyos. 10Ati qanb'en kyib'aju' q'uqli kk'u'j qa tu'n njapun kawb'il kyu'n che kletela', qu'n intma'n toj Tu'jil: Tzajx taq'wix tib'aju' xjal min njapun tu'n tkyaqilju' tz'ib'a'n toj tu'jil kawb'il, chij. 11Mix-a'lo'te ktzalajel Dyos ti'j naq tu'n qama japun kawb'il tu'n; qu'n intma'n toj Tu'jil: Tu'n tokslab'lju' tnik'alti'j k'anq'ila', chij. 12Mya ti'jte' okslab'l tzajna' kawb'il, qu'n intma'n toj Tu'jil: Alkye ma japun kawb'il tu'n, tu'ntz'u'n k'anq'ila', chij. 13Ate Krist jaw iqanteju' qanb'en taq'wix tu'n qpaj naqx tu'n qkolpet tu'n tjaq'ju' kawb'il, qu'n intma'n toj Tu'jil: Ati qanb'en taq'wix kyib'aj kkyaqilju' nche kyim yob'a'nqe' twitz krus, chij. 14Ik' Jesukrist toju' kamik lu tu'n tponju' ky'i'wb'il ttziya Dyos te Ab'raam kye mya aj Juda tu'nel Krist Jesus; ex tu'n qk'monte T-xew Dyos ttziya naq tu'n qokslab'l. 15E'ntzik ex e'witz'in, kxe'l nma'ne' jun techlal kyeye' kse'n nkb'incha'n xjal: Ajtkyaj b'ent jun yol tu'n jun xjal ex makyej t-sqitu'nti'j, mix-a'lo' kb'el xitunte ex mix-a'lo' k'okyel tz'aqtzante. 16Kyajb'ant jun yol tu'n Dyos tuk'i'l Ab'raam ex tuk'i'l tyajajil. Min ntma'n toj Tu'jil: etyajajila chiwt te b'a'npun, te junte'; intma'n: ex te tyajajila, chij, ate Kristju'. 17A nxinma'ne' lu: Kyejb'ent jun yol tu'n Dyos tuk'i'l Ab'raam ex kyej tkuwsa'n. Qu'mtzun lay xitetju' yol ttziya Dyos tu'n tkawb'il Moyses ul toj junk'al junaq lajoj (430) ab'q'i yajxi'tl. 18Qana' tu'n qama japun kawb'il ktzajela' tq'o'n Dyos tziya'n tu'n, myatzun tziya'ntz; atzunte' tzajni ttziya'n Dyos te Ab'raam tu'n ttzaj tq'o'n, mixti'te tqanil ti'j. 19¿Ti'tzun tajb'en kawb'iltz? yajxi'tl ttzaj q'o'n yek'b'ilte myab'a'n nkb'incha'n xjal, tzmax tej tulju' tyajajil ja tziyanjtza' yol. Tzaj q'o'n kawb'il tu'nel jun anjl, atzun Moyses xiq'mante kye xjal. 20Atzu'n tej ttzaj ttziya'n Dyos yol te Ab'raam, min ajb'en jun sanjelal tu'n, aku' q'mante te Ab'raam. 21¿Ma ntzun q'ojin kawb'il ti'ju' yol ttziya Dyos? ¡Minti'! Naqwit nb'e'nt tq'o'nte kawb'il chwinqlal, inwtlo qok'met tu'n Dyos qama japun kawb'il qu'n. 22Ate ntma'n toj Tu'jil, kkyaqil jpu'nqe' tjaq' il, atzunte' tziya'ntl tu'n Dyos xi'ktzajela' q'o'n kyeju' nche okslan te Jesukrist. 23Tej na'mxtoq tulju' okslab'l, jpu'nqo'toq tu'n kawb'il, intoq qo ayon tu'n tul yek'u'n okslab'l. 24Ikte kawb'ilju' se'n majin qilkye k'wal, maqo pon tiq'i'n tk'etz Krist, tu'n qk'met tu'n Dyos tu'n qokslab'l. 25Matxitzun tzul okslab'l ja'lo, mixti'qo'tl toj tq'ob' majin ka'yilqe', aju' kawb'il, 26Kkyaqile' tk'wal Dyos qe'tle' ja'lo tu'n kyokslab'le' ti'j Krist Jesus, 27qu'n tej tjaw a' kwi'ye' toj tb'i Krist, makmojb'a kyib'e' tuk'i'l Krist, ex matz'ok kyoksa'ne' Krist kyi'je' naku'j kxb'alune' ak'a'j. 28B'a'ntzun aj Juda mo mya, lq'o'n majin mo tzaqpi'n, ichan mo qya; qu'n kkyaqile' junqe'tle' toj Krist. 29Qatzun te Krist qe'ye', tyajajil Ab'raam qe'tzuntze' ex ati kyoklene' ti'ju' yol ttziya Dyos.

will be added

X\