Gálatas 2

1Tb'ajlenxi'tzun kyajlajoj ab'q'i yajxi'tl, nxi' jumajtle' Jerusalen tuk'i'l B'ernab'e, ex xiwiq'i'ne' Tito wuk'i'le'. 2Nxi'ye' atzu' qu'n tma Dyos tu'n nxi'ye'. Atzuntzu' xa'ntx'olb'a'ne' kye okslal, aju' tpakb'al b'a'n nxinpakb'a'ne' kye mya aj Juda. Ex xinchik'b'a'ne' tpakb'al b'a'n npakb'a'ne' kye mya aj Juda kwitzku' nimaq kyoklen oqo'kxqeye' kyuk'i'l, tu'n tkyaj chik'e kye qa mya mixwitti'x tajb'enju' waq'une'. 3Mixpeti' okkxla'ja'n Tito atitoq wuk'i'le' tu'n tok techel ti'j tchib'jil, extzun mya aj Juda. 4Ate'toq junjun okkq'o'nkyib' te okslal ex mya okslalqe', eb'jo'kx jutzpaj qxole' b'ilteju' tzaqpib'l atitoq qeye' toj Krist Jesus ex tu'ntoq qkub' kjtz'o'n jumajtle' tjaq' kawb'il. 5Ex mixti'x kub'qi'je' kyu'n tu'n qok junkmoje' tjaq' kkawb'il, qu'n atoq qajb'ile' tu'n ttenju' tpakb'al b'a'n axxi'x kukxju' kyuk'i'le'. 6Ex mixti' juntl yol ak'a'j tzaj kma'n nimaq kyoklen kxol okslal weye', (maskye nimaq kyoklen toj kwitz, min nchin ximane' ti'j, qu'n junelnite' qoklen toj twitz Dyos). 7Elpena knik' qa tzaj tq'o'n Dyos woklene' tu'n txi' npakb'a'ne' tpakb'al b'a'n kye mya aj Juda, se'nte Luch tzaj tq'o'n Dyos toklen tu'n txi' tpakb'a'n kye aj Juda. 8Axju' Dyos tzaj q'onte toklen Luch te chq'o'n kye aj Juda, tzaj tq'o'n woklene' te chq'o'n kxol mya aj Juda. 9Aye'toq Santyay, Sepas ex Xwan nimaqxi'x kyoklen kxol okslal, elkynik' se'n tzaja' tq'o'n Dyos woklene', tzaj kq'o'n kq'ob' weye' ex te B'ernab'e tejun yek'b'il tu'n quk'ilante qib'e' kyuk'i'l, ex b'a'n ela' toj kwitz nxi'we' tuk'i'l B'ernab'e pakb'alte tpakb'al b'a'n kye mya aj Juda, aye'tzunkye tu'n txi' kpakb'a'n kye aj Juda. 10O'kxte tzaj kkub'sa'n qeye' tu'n qonine' kyi'ju' prow, ex a matxi' tz'ok tililju' wu'ne' tu'n tb'inchet. 11Tetzunj tpon Sepas toj nintnam Antyokyiy, njaw tzaqpaje' ti'j, oknma'ne' tplajku', qu'n myatoq b'a'n ntb'incha'n. 12Tnejel intoq wan kyuk'i'lju' okslal mya aj Juda, tetzunj kpon aj Juda e'pon tchq'o'n Santyay; eltpa'ntib' ex min wantl kyuk'i'l, qu'n intoq xob' kye aj Juda. 13Ex axkyb'incha txqantl okslal aj Juda se'n t-xmletz'il Luch, axpe'jun B'ernab'e xilpe kyi'j 14Qu'mtzun tej nka'yinteye' min nche anq'in kse'nxju' tpakb'al b'a'n, xinma'ne' te Sepas kwitz kkyaqil okslal kjalu: Aj Juda xjala, matxi' tz'anq'ina naku'j mya aj Juda; ¿tiqu'ntzun nche oka' tchq'o'ntla mya aj Juda tu'n kyanq'in se'nqe' aj Juda? nchije' te. 15Aj Juda qo'qe' qitz'jlenx, mya tzajniqo' kxol txqantl nimaqtnam aj il. 16B'i'ntlte' qu'n qa mix-a'lo'te k'mo'n tu'n Dyos tu'nju' njapun kawb'il tu'n, k'mo'nqo'te' tu'n qokslab'l ti'j Jesukrist. Qu'mtzun matxi' qo okslan te Jesukrist tu'n qk'met tu'n Dyos, qu'n lay qok'met naq tu'n njapun kawb'il qu'n. 17Tu'ntzu'n noktilil qu'n tu'n qk'met tu'n Dyos tu'nel Jesukrist, matz'el qnik' qa aj il qo', ¿ma tu'nlo Krist xqo oka' te aj il? ¡Mya! 18Qama qma qa mixti' tajb'en kawb'il, extzun matz'ok qq'o'ntlqib' tjaq' tu'n tjapun qu'n, atitzun qiltz. 19- 20Qu'n kyimni qintlwe' teju' ojtxi' kawb'il tu'nxju' kawb'il, tu'ntzun wanq'ine' te Dyos. Machin jaw q'o'ne junx tuk'i'l Krist twitz krus, mya wu'nx wib'e' nchin anq'ine' ja'lo, ate Krist ati toj wanmiye'. Tu'n wokslab'le' ti'ju' Tk'wal Dyos nchin anq'ina'ye' ja'lo twitz tx'otx', qu'n machin tk'u'jlaye' ex taq'tib' tu'n tkyim twitz krus tu'npaje'. 21Lay tz'el wik'o'ne' t-xtalb'il Dyos; naqwil maqo k'met tu'n Dyos tu'nju' njapun kawb'il qu'n, naqxtzun gantz kyimte Krist.

will be added

X\