Gálatas 1

1Ayine' Pawl, apostl qine', mya sk'o'n kyu'n xjal, tu'nku'te Jesukrist ex tu'n Dyos Manb'aj jaw anq'in Jesus tu'n, 2qkyaqile' kyuk'i'l qtzik e'qitz'in, nche'x qq'olb'e'ne' okslalqe'ye' toj Kalasya. 3Awt Qman Dyos ex Qajaw Jesukrist tzaj q'onte t-xtalb'il ex tnak'b'il kyib'aje'. 4Taq'tib' Jesukrist tu'n tkyim tu'n tpaj qil, tu'n qklet te tkyaqilju' taq'wixil twitz tx'otx', kse'nx tajb'il Qman Dyos. 5¡Ajwalinjtzxwit Qman Dyos kukxju'! Ikxwitju'. 6Matzaj nxime' kyi'je' tu'nju' selnaj kypa'n kyib'e' ti'j Dyos, ju' txkonkyeye' tu'n t-xtalb'il Krist, ex mache'xe' toj juntl tpakb'alil. 7Mixnati'te juntl tpakb'al b'a'n. Ate nb'aju' ate' junjun kyajb'il tu'n kych'exb'enteju' tpakb'al b'a'n tu'n Qajaw ex ate'k chuksalkyeye'. 8Qatzun ati jun xxiq'mante jun tpakb'al b'a'n kyeye' junxi'tl kyetwitzju' xiqpakb'a'ne', tzajxwit tq'o'n Dyos taq'wixil tib'aj, maskye qa ayinxe' mujqa jun anjl saj toj kya'j. 9Matxi' txinma'ne' kyeye' nejtl, kxe'l nma'n jumajtle': Qa ati jun xxiq'mante jun tpakb'al kyeye' junxi'tl kyetwitzju' oje kk'ame', tzajxwit tq'o'n Dyos taq'wixil tib'aj. 10Myawe' njyo'n tu'n kyolin xjal b'a'n wi'je', awe' njyo'n tu'n tmante Dyos qa b'a'n nb'incha'ne'. Myawe' njyo'n tu'n nkyaje' b'a'n kwitz xjal, ¡Naqwit aju', myatzun tmajin Krist qintze'! 11Tz'elx knik'e' ti'j e'ntzik ex e'witz'in: ate' tpakb'al b'a'n xinpakb'a'ne' kyeye', mya jawni nab'le'n kyu'n xjal. 12Min nk'amwe' kye xjal ex mya xjal saj xnaq'tzante weye', aku'te Jesukrist tzaj yek'unte weye'. 13B'i'ntl kyu'ne' se'ntoq ntene' ojtxi' toj kyokslab'l aj Juda, ojexi'x chin q'ojine', oknljo'ne' toj kq'iju' okslal te Dyos ex oktilil wu'ne' tu'n kkub' nb'yo'ne'. 14Tej atintoqe' toj kyokslab'l aj Juda, nejli qinxi'xtoqe' kwitzju' txqantl nxjalile' junx qab'q'iye' kyuk'i'l, qu'n intoq che japunxi'xju' yol kyajni kma'n ojtxi' qyajilb'ene' wu'ne'. 15- 16Atzunte Dyos, njaw t-sk'o'ne' na'mxtoq witz'jiye' ex inttxoke' tu'n t-xtalb'il, tzaj tyek'u'n Tk'wal weye' tu'n t-xinpakb'a'ne' tpakb'al b'a'n kye mya aj Juda. Ex min nxi'ye' xjelulte te jun xjal; 17expe' min nxi'ye' Jerusalen qanilte kyeju' apostl nejtl kye nwitze'. Xi'pe' nxa'ye' lwiyxi'x toj tx'otx' Arab'ya, anjtltzun wi'jtze' Damask. 18Tojtzun oxe' ab'q'i yajxi'tl nxi'ye' Jerusalen ka'yilte Sepas, nten o'lajoj q'ije' tk'etz. 19Ex wile' Santyay titz'in Qajaw, o'kxtzu'n, mixti' wil juntlwe' apostl. 20Axxi'x kxe'l nma'ne' kyeye' twitz Dyos, axte' nxi' ntz'ib'a'ne' kyeye'. 21Yajxi'tzuntl nxi'ye' kyoj tx'otx' Sirya ex Silisya. 22Aye'tzu'n okslal ti'j Krist ate'qe' Juda min ojtzqi'n toqxi'x nwitze' kyu'n. 23Naq o'kx b'i'n kyu'n intoq q'manjtz wi'je' kjalu: Atej ljoltetoq toj qq'ij nejtl, intpakb'a'n tpakb'al b'a'n ja'lo, aj tajb'iltoq nejtl tu'n tkub' naj, chechij. 24Ex intoq kyajwali'n Qman Dyos tu'n npaje'.

will be added

X\