Efesios 6

1Aye'ye' k'walb'aj, che okslanqeye' te kmane' iku' se'n ntma'n Qajaw, qu'n tu'me'lxi'x ja'lu. 2Aju' tnejel chaq'b'il ati tu'me'l t-xel tu'n Dyos qama japun aja'lu: Nimana te tmana ex te ttxuya, 3tu'ntzun ttena toj b'anil ex tu'n tanq'ina b'a'npun q'ij twitzju' tx'otx'. 4Aye'tzunkye' manb'aj, lalun nok kq'o'ne' ktx'ujilju' kk'wale', ape' kb'inchamjuye' kmanxe' knab'l ex che ktzak'ume' se'nxju' tajb'il Qajaw Jesukrist. 5Aye'ye' lq'o'n majen, che okslanqeye' kyeju' tajaw aq'untl twitzju' tx'otx'. Tenx tchiylalju' tajaw aq'untl kyeye' ex che ajb'ene' kye tuk'i'l tkyaqil kyanmiye', iku' se'n nche ajb'ene' te Qajaw Jesukrist. 6Che aq'unanqeye' kukx mya o'kx se'n nche ka'yin kyeye' tu'n kkyeje' b'a'n kyuk'i'l, che aq'unanqekye' iku' se'n tmajen Kristqeye' ex kb'inchamjuye' tajb'il Dyos tu'n tkyaqil kyanmiye'. 7Kyb'inchanxe' aq'untl b'a'nxi'x, che aq'unanqeye' nakuxwitloj nche aq'unane' te Qajaw Jesukrist mya kye xjal. 8Qu'n b'intlkye' kyu'n qa teyile junjun ntb'incha'n b'a'n, tzul q'o'n tu'me'l t-xel te tu'n Qajaw b'a'ntzunlo qa majen mujqa tzaqpi'n. 9Ex ikx ayeye' tajaw aq'untl, che okxe' b'a'n kyeju' kmajene' ex lalun txi' kma'n kyole' kye te xob'sb'il. Kyna'ku'ye' qa ate Dyos toj kya'j mixti' nche el tik'un xjal se'nqexku' ex ate kyajawju' majen ex tajaw aq'untl. 10Atzun ja'lo witz'in ex ntzik kkuwsam kyib'e' tuk'i'l Qajaw tu'ntzun tten kyipumale' nimxi'x. 11Tz'ajb'enxju' kq'ojb'ile' tzajni tq'o'n Dyos te kolb'ilkyeye', tu'ntzun lalun che kub' sb'une' kyu'nju' t-sb'ub'l tajaw il. 12Qu'n myatzu' nqo' q'ojina' kyuk'i'l xjal, anatzu' nqo q'ojinate' kyuk'ilju' nejenel mixti' q'ancha'lqe' ate' twitz kya'j, aye'j nche kawin kyib'aj kkyaqil xjal ex toj qxopin. 13Qu'mtzun, tz'ajb'enxju' q'ojb'il saj tq'o'n Dyos kyeye', tu'ntzun lalun kub'kyi'je' toju' tq'ijlalil myab'a'n tzul, ex tkub'lenxi'tzun ti'j tkyaqil kyu'ne', che b'elwe'xi'xtle' toj kyokslab'le'. 14Qu'mtzun kwab'anku' kyib'e' ex kyoksankye' ax kyi'je' ex che okxe' tz'inun kyi'je'. 15Kyb'inchanku' ktene' tu'n kxiye' q'malte tpakb'al b'a'n kyeju' xjal. 16Ex kq'onkye' kyokslab'le' te kolb'ilkyeye' teju' tal t-smal tajaw il ntzaj t-xon kyi'je'. 17Awtju' kolb'il tz'ajb'en kyu'ne' te kolb'ilte kwiye', ex awtju' tyol Dyos tz'ajb'en te kyk'uẍtx'e'nb'ile' ntzaj tq'o'n Xewb'aj Xjan. 18Lalun che qjene' tu'n kyna'n Dyose': che kub'sane' ex kyqaninxe' te Dyos kuxju' kse'nxju' ntma'n Xewb'aj Xjan. Che kub'sane' twitz Dyos, lalun che kub' numje', ex che na'nqe' Dyose' kyi'j kykyaqilju' okslal sk'onqe' tu'n Dyos. 19Ex ikx che na'nqe' Dyose' wi'je', tu'ntzun ttzaj tq'o'n Dyos tyol weye', tu'n lalun chin xob'e' ajnyoline' ti'ju' tyol aj e'wantoq ex tu'n txi' nchik'b'ane' tpakb'al b'a'n kye kkyaqil xjal. 20Machin tzajchq'o'ne' tu'n Dyos tu'n nyoline' te t-xel ex tu'n txi' npakb'ane' tpakb'al b'a'n te kolb'il, tu'n tpajtzun ja'lu jpunqinaye' ja'lo. Qu'mtzun che na'nqe Dyose' wi'je' tu'n nyoline' ti'j tyol Dyos ex tu'n lalun chin xob'e'. 21Kxe'ltzun q'ma'n kyeye' titi' nb'aj weye' ex se'n tqinaye' tuk'i'l Tikiko, qu'n ati kk'uje' ti'ju' qtzik lu ex in naq'unan b'a'nxi'x toj taq'un Qajaw Jesukrist. 22Qu'mtzun kxe'l nchq'o'ne' kyk'etze', tu'ntzun txi' tma'n kyeye' se'n to'qo'ye' tzalu ex tu'n tq'uqb'anjtz kk'u'je' tu'n. 23Awttzun Qman Dyos ex Qajaw Jesukrist q'onte nak'b'il kxole' ex tk'u'jlalil, tu'ntzun ttenxi'x kyokslab'le'; 24ex awt Qman Dyos k'iwlankye kkyaqilju' in kk'u'jla'n Qajaw Jesukrist tu'n tkyaqil kyanmi.

will be added

X\