Efesios 5

1Che okxe' se'nte Dyos qu'n k'walb'ajqena'ye' tu'n ex inxi'x che k'u'jlanjtze' tu'n. 2Che b'et-xe' toj tk'u'jlalil iku' se'nte Krist ma'xi'x qotk'u'jla ex taq'tib' tu'n tkyim te qxel nakuj jun oyaj ex chojb'il tb'anilxi'x twitz Dyos. 3Ayekye' ja'lo matxi' che okye' kmuju' ttanam Dyos xjan: qu'mtzun mixti' tu'n kyolintle' ti'ju' ajpaji'n ex ti'j alchaqxkyeku' tz'ilil ex jamjo'ni'n. 4Lalun che yolin xlab'yole' ex yol mixti'x tnab'l ex yaq taq'wixi'x; qu'n myab'a'nju' yol lu, o'kxkye' kb'incham aju' tu'n kyajwalin tb'i Dyose'. 5Qu'n b'intlkye' kyu'n qa aye' xjal nche b'inchan ajpajil, mujqa nxi' kb'incha'n ti'xti' tz'il ex mujqa nche jamjonin, mixti'x kyoklen ti'ju' tkawb'il Qajaw Jesukrist ex te Dyos. 6Lalun kyaje' tu'n kkub' sb'une' kyu'nju' yol mixti'x kyajb'en, qu'n tu'n kpaju' yol lu ntzaja ttx'u'jil Dyos kyi'ju' xjal mixti' nche okslan te. 7Qu'mtzun lalun che ele' junx kyu'k'i'l. 8Ayekye' najlqetoqe' toj qlolj nejku', atzun ja'lo tu'nju' okslalqeye' te Qajaw Jesukrist, matxi' che pon kanune' toj spik'un. Qu'mtzun che b'ete' toju' tb'eyil spik'un, 9qu'n aju' spik'un ntb'incha'n tu'n qok b'a'n, tzinun qi'j ex nqo'x tiq'in toju' axxi'x. 10Kq'onk tilile' b'a'nxi'x tu'n telkynik'e ti'j alkyeju' b'a'n toj twitz Qajaw. 11Lalun che ele' junx kyuk'ilju' nche b'inchan ti'xti' mixti'x kyajb'en ex tqe' toj qlolj; akye' kb'incham tu'n kxi' kmyo'ne' ti'ju' myab'a'n. 12Qu'n majx ch'ixb'ajilx tu'n qyolin ti'ju' nkb'incha'n toj ewaj; 13naqatzun xpon kanunju' spik'un majx nq'ancha'lixju' kb'inchb'aj lu, 14qu'n tkyaqilju' ti'xti' nq'ancha'lix naqa xpon kanunju' spik'un. Qu'mtzun in tma'na' toj Tu'jil kjalu: Na'ntztib'a aya in wtana; we'ktza kxolju' kyimni, qu'n ate Krist kq'olteju' spik'un toj tchwinqlala. 15Qu'mtzun kykayinxjuye' tu'me'l kychwinqlale', lalun che okye' mixti' knab'le', naq o'kx tenx knab'le'. 16Tz'ok tilil kyu'ne' toju' tq'ijlalil lu, qu'n myab'a'n qe'ju' q'ij che ul. 17Lalun che okye' mixti' knab'le', naq o'kx kq'onk tilile' tu'n kb'inchanteye tajb'il Qajaw Jesukrist. 18Lalun che tx'ujtiye', qu'n mixti'tl nb'ent kjk'unte kyib'e' ti'j; ape' kb'inchamjuye', kjqonxjuye' kyanmiye' teju' Xewb'aj Xjan tu'n knoje' tu'n. 19Che yolinqeye' kyi'j b'itz ex che kb'itzinxe' xjan b'itz, ex che ajwaline' tb'i Qajaw tu'n tkyaqil kyanmiye'. 20Kq'onx chjonteye' te Dyos Manb'aj ti'j tkyaqilju' ti'xti', toj tb'i Qajaw Jesukrist. 21Kyb'imkyib'e' kxolilexe', tu'nju' ati tchiylal Dyos kyeye'. 22Aye'ye' qya che b'inqeye' te kychmile' iku' se'n nche b'ine' te Qajaw Jesukrist. 23Qu'n ate chmilb'aj wi'yj teju' t-xu'jil, iku' se'nte Krist a wi'yj kyeju' okslal tqe'k te t-xmilal; ex ax Qajaw kklolkye. 24Iku' se'nkye okslal nche b'in te Krist, ex ikxtzunkye qyaju' ati tu'n kyb'inte kychmil. 25Aye'ye' chmilb'aj, kk'ujlame' kxu'jile', iku' se'nte Krist nche' tk'u'jlan kkyaqil okslal ex mataq' tib' tu'n tkyim naqx tu'n kklet. 26Ma'tzun tb'incha tkyaqil ja'lu tu'n kyokju' okslal ẍnu'l twitz ex mache txjet tu'n naqx tu'nelju' tyol ex jawsaj a'. 27Tu'ntzun kpon tyek'u'n okslal twitz tb'anilqexi'x, mixti'ku' ch'i'n ktz'ilil ex kqu'chil, ex mixti'ku' juntl ti'xti' myab'a'n kyi'j, naq o'kx tu'n kyok xjan ex tzinun kychwinqlal. 28Ikxqetzunju' chmilb'aj ati tu'n kk'u'jlante kxu'jil se'nxju' in kk'u'jla'n kxmilal. Alkyete in tk'ujla'n t-xu'jil, in tk'ujla'n tib' tib'xtib'. 29Qu'n mix-a'lox jun xjal inwit tx'a'lti'j tk'u'j ti'ju' t-xmilal, ape' ntb'incha'nju' nokten k'achalte ex in t-xq'uqi'n, iku' se'n ntb'incha'n Krist kyi'j tkyaqil okslal, 30qu'n ayena' okslal t-xmilal Qajaw. Ex ayo'tzunqe' tmoj t-xmilal Qajaw Jesukrist. 31Qu'mtzun kjel tq'o'n ichan tman ex ttxu tu'n tmje tuk'ilju' t-xu'jil, ajtzun kmje che okyel kkab'il naq jun wnaqqe'. 32Aju' ntb'incha'n Dyos lu nimaq toklen ex layx tz'el qnik' ti'j. Intzun najb'en yol lu wu'ne' qu'n atzu' nyolina' ti'j Krist exqe'ju' okslal. 33Iktzun tu'me'lju', teyile junjun k'u'jlam t-xu'jil iku' se'n ntk'u'jlan tib' tib'xtib', ex ikxju' xujilb'aj ati tu'n tokslan teju' tchmil.

will be added

X\