Efesios 4

1Qu'mtzun ayine' jpunqine' tu'n tpaj okslalqine' te Qajaw Jesukrist, nchin kub'san kyeye' tu'n kyanq'ine' tojxi'x tu'me'l tu'nju' matxi' che txkonjtze' tu'n Dyos. 2Che okxe' me's ex b'a'n xjal; tenx kpasensiye' ex tzik'xkyu'ne' kxolilexe' ex kk'u'jlam kyib'e' teyile junjun. 3Kq'onk tilile' tu'n ktene' junx kyuk'i'l txqantl okslal ex tu'n ktene' toj nak'b'il. 4Qu'n naq junxte' qxmilal okslalqo', ex naq junxju' Xewb'aj Xjan, ex naq junju' q'uqb'ab'l qk'u'j te kolb'il ktzajel tq'o'n Dyos qe tu'n xqo ttxok. 5Qu'n naq junte Qajaw, naq junju' okslab'l ex naq junju' jawsb'il a'; 6Ex naq junte Dyos Manb'aj qe qkyaqil, ate Dyos nkawin tib'aj tkyaqil, ate in naq'unan qxol qkyaqil ex ati toj qanmi te qkyaqil. 7Extzun teyile junjunqe matxi' tzaj q'o'nju' jun qoklen tu'n Qajaw Jesukrist se'nxju' tajb'il. 8Qu'n iku' tz'ib'a'n toj Tu'jil tyol Dyos kjalu: Tej tjawx toj kya'j eb'ajx tiq'i'n txqan xjal jpu'nqetoq tuk'i'l, ex xitq'on kyoklen teyile junjun, chiju' tz'ib'a'n 9¿Titi'tzun tz'elpuna'ju' yol lu tej tjawx toj kya'j? Atzun tz'elpuna'ju' tu'nju' ku'x tzmax tjaq'xi' tx'otx'. 10Atzunju' ku'x tzmax tjaq'xi' tx'otx', atzunte ma jawxju' tzmax tib'ajxi' kya'j, tu'ntzun tnoju' toj kya'j ex twitz tx'otx' tu'n. 11Qu'n ate Krist ok q'onte kyoklen junjun okslal, tu'n kyok junjun te ati kyoklen, junjuntl te t-sanjelal Dyos, aye'tzun junjuntl tu'n kyok te pakb'al ti'ju' tpakb'al b'a'n ex aye'tzun junjuntl tu'n kyok te k'ik'lel ex xnaq'tzal. 12Xitq'on Dyos kyoklen kkyaqil ja'lu, tu'ntzun kxnaq'tzan kye kkyaqil okslal ex tu'n kyajb'en toj taq'un Dyos ex tu'n tch'iyju' t-xmilal Krist kyu'n 13tzmaxi'x aj qmuje' junx toj qokslab'l ex tu'n qojtzqintexi'xju' Tk'wal Dyos, ex tu'n tkanexi'x toj qnab'l se'nte Qajaw Jesukrist tz'aqlixi'x tnab'l. 14Ex lay qo oktl se'n jun k'wal in meltz'aj tnab'l ex nxi' iqi'n tu'nju' xnaq'tzb'il inkq'o'n xjal nakuj kyq'iq', qu'n nche sb'un ex nkma'n yol xmletz' tu'n ktzpet xjal kyu'n. 15Ape' qb'inchamju' qo lpek ti'ju' yol axxi'x, tenx qk'u'jlalil tu'ntzun qch'iy ex tu'n qok iku' se'nte Krist, aj qnejenel ex iku' se'n qwi' te qxmilal. 16Atzunqe okslalqo t-xmilal Kristqo', ex aju' t-xmilal Krist tzyu'mile tib' ex nk'umile tib', extzunqa nche aq'unanju' tmuj qxmilal b'a'n xi'tzun qch'iytzuntzu' ayoqo' okslalqo' naq tu'nju' tk'u'jlalil. 17Atzun ja'lo kxe'l nqanine' kyeye' ex kxe'l wab'tzine' kyeye' toj tb'i Qajaw: tu'n lalun che anq'intle' se'nqeju' xjal minti' nche okslan te Dyos, qu'n ayeju' xjal lu nche anq'in se'nxju' kyajb'il ex kxim mixti'x kyoklen 18ex matxi' kub' qloljixju' toj knab'l. Alkye xjal lu mixti' kyoklen ti'ju' chwinqlal tzultq'o'n Dyos, qu'n makub' kych'uẍsa'n kyanmi ex mixti' selkynik' ti'j Dyos. 19Matxi' kub' kych'uẍsa'n kyanmi ex matxi' kq'on kyib' toj taq'wixil ex mixti'x nkub' kjk'u'n kyib' ti'ju' b'inchaj taq'wixil. 20Aye'tzunkye' mixti' selkye' knik' ti'j Qajaw Jesukrist tu'n kyanq'ine' ikju', 21qu'n axxi'x ma kb'ijuye' tyol ex mache xnaq'tzanjtze' tu'n ti'ju' tyol tu'ntzun kyanq'ine' se'nxju' tajb'il. 22Qu'mtzun lalun che anq'intle' se'nqeju' xjal lu, ex lalun che anq'intle' se'nxju' nejtl, qu'n aju' il nxi' kb'incha'ne' majx taq'wixix toj twitz Dyos. 23Lalun che ximantle' se'nxju' tnejel, kych'exb'em tu'me'l kychwinqlale', 24ex kyoksankye' kychwinqlale' ak'a'j oje tzaj q'o'n tu'n Dyos nakuj jun ch'ix kyi'je' tu'ntzun kyek'unteye' kychwinqlale' tzininxi'x ti'j, tzajni qe tib'aju' axxi'x. 25Qu'mtzun lalun che chantl yole', che yolinqeye' ti'ju' axx kyuk'ilju' kwnaqile', qu'n qkyaqil tmoj t-xmilal Kristqo'. 26Qama che jaw tx'u'jine', lalun che b'inchan ile' tu'n tpaj, ex lalun b'aj q'ij kyu'ne' nche tx'u'jine'. 27Lalun txi' kq'o'ne' anb'il teju' tajaw il. 28Alkyetoq nelq'an lalun tz'elq'antl, q'onk tilil tu'n taq'unan tu'ntzun tb'inchante jun b'a'n aq'untl tu'n tq'ob' tu'n tajb'en kyeju' ati nojqelan toj kychwinqlal. 29Lalun che q'man xlab'yole', naq o'kx kmanxjuye' b'a'n yol tu'ntzun tonin kyi'ju' txqantl aye'j nche'x b'inte kyole'. 30Lalun tz'ok kq'o'ne' tb'isju' Xewb'aj Xjan, qu'n anate Xewb'aj Xjan sok q'onte kyechile' tu'ntzun telkynik'tzile' qa te Dyosqeye' ajtpon kanunju' q'ij te kolb'il. 31Kpa'mil kyib'e' kyi'ju' tk'ayil, kyi'ju' achb'il, kyi'ju' qtx'u'jil, kyi'ju' i'li'n ex kyi'j kkyaqil taq'wixil. 32Che okxe' b'a'n xjal ex tzaj laqjx kk'u'je' kyi'je' kxolilexe', ex knajsankuye' kyile' kxolilexe' iku' se'nte Dyos makub' tnajsa'n kyile' tu'nel Qajaw Jesukrist.

will be added

X\