Efesios 3

1Ayine' Pawl, jpu'nqine' naqx tu'n tpaj okslalqine' te Qajaw Jesukrist ex tu'n tpaj nchin ajb'ene' kxole' ayeye' mya aj Judaqeye'. 2B'i'ntlnakye' kyu'n qa ate Dyos saj chq'onweye' q'malteju' t-xim kyeye' naqx tu'nju' t-xtalb'il. 3Ate Dyos saj yek'unteju' t-xim e'wantoq weye', iku' se'nxju' xintz'ib'a'ne' kyeye'. 4Ajtzun tjaw kẍch'ine' u'j lu xintz'ib'a'ne' kyeye' atzuntzu' k'elela' knik'e ti'j qa oje tz'el nnik'e ti'ju' tyol Dyos e'wantoq, 5aj min tzaj yek'u'n tnejel kye ojtxi' xjal, atzu'n ja'lo naq tu'nelju' Xewb'aj Xjan saj tyek'u'n Dyos kyeju' ati kyoklen ex xjansa'nkyib' exqe' t-sanjelal Dyos. 6Atzunju' yol lu e'wantoq aja'lu: Naqx tu'nel Qajaw Jesukrist kkyaqilju' xjal mya aj Judaqe' b'a'n tu'n kmk'onteju' kolb'il ex tkyaqilju' kyejni ttziya'n Dyos kyeju' aj Israel ex tu'n kyok te naqjunx tnam kyuk'i'l. 7Ayintzunwe' matzaj tq'o'n Dyos woklene' tu'n npakb'anteye' tpakb'al b'a'n naqx tu'n t-xtalb'il Dyos ex tu'n matzaj laqj tk'u'j wi'je', ex matxi' tzaj tyek'u'nju' tipumal weye'. 8Awe' ch'i'nxi'xwe' woklen kyekwitz txqantl okslal, atzunte Dyos saj q'onte t-xtalb'il weye' tu'n txi' npakb'ane' tpkab'al b'a'n kyeju' txqantl xjal mya aj Judaqe'. 9Ex matzaj tq'o'n Dyos woklene' tu'n txi' nchikb'a'ne' kye kkyaqil xjal se'n tu'me'l kjapumela' tu'n Dyos aju' yol e'wantoq tu'n atxi'x ttzajlen qe twitz tx'otx'. 10Tb'incha Dyos ikju' tu'ntzun naq kyu'nelju' okslal, k'elela' knik'ju' ati kyoklen exqe'ju' nche' kawin toj kya'j qa chukchaq ttenju' tnab'l Dyos. 11Tb'incha Dyos ja'lu se'nxju' t-xim atxi'x ttzajlen qe ojtxi', ex mab'ent naq tu'nel Qajaw Jesukrist. 12Ex naq tu'nel Qajaw Jesukrist atiju' tzaqpib'l qe, ex naq tu'nju' ti'j qo pomila' lq'e tk'etz Dyos tuk'i'l tkyaqil q'uqb'ab'l k'u'jb'aj. 13Qu'mtzun nchin kub'sane' kwitze' tu'n lalun che kub' numje' tu'nju' nchin yajlanjtze' tu'n kpaje', qu'n ate' lu k'okyel te jun tzalajb'il kyeye' yajxi'tl. 14Tu'ntzun ja'lu, chin kb'el mejeya'ye' twitzju' Manb'aj te Qajaw Jesukrist, 15aj b'inchalte tkyaqilju' ati toj kya'j ex twitz tx'otx'. 16Inchin kub'sane' twitz Qman Dyos tu'n ttzaj tq'o'n xtalb'il kyeye', ti'j tkyaqilju' tq'inumal ati toj kya'j ex tu'n tkuwsanjtzu' kyanmiye' tu'n ex tu'n ttzaj tq'o'n kyipumale' tu'nju' T-xew. 17Ex ikx nxi' nkub'sane' twitz Dyos tu'n tnajan Qajaw Jesukrist toj kyanmiye' naq tu'nju' kyokslab'le' ex tu'n knajane' tib'aju' k'u'jlajiltib'il se'n jun tze lok'amnixi'x. 18Ex tu'n tkane toj knab'le' kyuk'i'l kkyaqil okslal, se'n ttenju' tk'ujlalil Krist, qu'n nimxi'x twitzju' tk'u'jlalil Jesukrist ex nimxi'x tnuqub'. 19Qu'mtzun inchin kub'sane' twitz Dyos tu'n tkanexi'x toj kwitze' aju' tk'u'jlalil Krist, qu'n aju' tk'u'jlalil nimxi'xte tu'n tkane' toj qnab'l, tu'ntzun kmk'onteye' kkyaqilju' t-xtalb'il Dyos aj kxe'l tq'o'n kyeye'. 20Ati te Dyos tipumal tu'n tb'inchante tkyaqil ex intzaj tq'o'n qe nimxi'xtl kyetwitzju' nxi' qqani'n te mujqa nkub' qxima'n, tu'nju' tipumal naq'unan toj qanmi. 21¡Nimanjtzxwit tb'i Dyos kyu'n kykyaqil okslal naq tu'n Jesukrist toj tkyaqil tab'q'iyil ex kuxju'! Ikxwitju'.

will be added

X\