Efesios 2

1Nejku' kkyaqile' kyimnqe'toqe' toj twitz Dyos tu'n tpaj kyile'. 2Qu'n o'kxtoq nxi' kb'incha'njuye' taq'wix se'n nkb'incha'nju' xjal twitz tx'otx' ex atoq nkb'incha'njuye' tajb'il tajaw il, aju' nejenel kyeju' ati kyipumal twitz kya'j ex naq'unan toj kyanmi xjal tu'n lalun che niman te Dyos. 3Ex ikxqe' ojtxi' maqo ten kxolju' xjal mixti' nche' b'in te Dyos ex atoq nxi' qb'inchanju' tajb'il qchib'jil ex tajb'il qnab'l. Tu'n tpajtzun tkyaqilju' qb'inchb'en myab'a'n, ilxi'xtoqti'j tu'n tkub' tz'eysa'n qwitz tu'n Dyos se'nqe' txqantl xjal. 4Atzunte Dyos matzaj q'aq'an tk'u'j qi'j ex maqo tk'u'jla nimxi'x, 5qu'n matzaj tq'o'n qchwinqlal junx tuk'i'l Qajaw Jesukrist tej kyimnqo'toq tu'n tpaj qil. Qu'mtzun noq tu'nju' t-xtalb'il Dyos saj q'onaju' kolb'ilkyeye'. 6Ex maqo jaw anq'in tu'n junx tuk'i'l Qajaw Jesukrist, ex maqo kub' tq'uqb'an toj kya'j junx tuk'i'l Jesukrist. 7Tb'incha Dyos ja'lu tu'n tyek'u'nte tjax chix qa nim t-xtalb'il qi'j exqa nq'aq'an tk'u'j qi'j noqx tu'ne'l Jesukrist. 8Qu'n matxi' tzaj q'o'nju' kolb'ilkyeye' naq tu'n ẍe'okslane' te Krist ex naq tu'n matzaj q'aq'an tk'u'j Dyos kyi'je'. Mixti' ẍe klete kyu'nx kyib'e', qu'n ate Dyos saj q'onte jun oyaj kyeye'. 9Minti' ẍe klete' tu'n jun kyaq'unb'ene' b'a'n, qu'mtzun mix-a'lo' junkye' tu'n tjaw tniman tib'. 10Qu'n ate Dyos kub' b'inchanqe, ex tu'nju' okslalqo' te Jesukrist maqo' ok ak'a'j ch'isb'en tu'n Dyos, tu'ntzun qb'inchanteju' b'a'n aq'untl se'nxju' nk'u'ntl ti'j tu'n Dyos atxi'x ojtxi'. 11Ayeqeye' mya aj Judaqeye' ex nok kq'o'n kb'iye' Mixti' kyechile' ti'j kychib'jile' aye'tzunkye' aj Juda (aj nok kq'o'n kyechil xjal tu'n kq'ob' ex nok kyq'o'n kyib' atok kyechil ti'j kychib'jil), 12kna'ntze' se'n ktene' ojtxi' tej mixti'toq Jesukrist kyuk'ile', pa'ntoq kyib'e' ti'ju' tnam Israel ex mixti'toq kyoklene' ti'ju' yol kyejni b'ent t'ij tu'n Dyos kyuk'i'l aj Juda. Mixti'toq Dyos toj kyanmiye' ex mixti'xtoq jun q'uqb'ab'l kk'u'je' twitz tx'otx'. 13Ate' ojtxi' najchaqtoq tqe'ye' tk'etz Dyos, atzun ja'lo matxi' che ul lq'eye' tk'etz naqx tu'nju' tchk'el kub' qojl tej tkyim. 14Tu'nte Krist xb'enta qten tuk'i'l Dyos. Junx tnam ẍe oka xjal tu'n b'a'ntzunqa aj Juda mujqa mya aj Juda ex ate xkub' xitunteju' maqb'il te ik'jtib'il atitoq kxolju' xjal aj Juda kyuk'ilju' mya aj Juda. 15Ate Qajaw Jesukrist sel q'inteju' ojtxi' kawb'il ex jate'ya' chaq'b'il ex nuk'b'il, tu'ntzun tten mujb'ab'ltib'il kxolju' kab'e' tnam ex tu'n kyok te ak'a'j. 16Qu'n tu'nju' kyim Krist twitz krus xkub'a naju' q'oj kxolju' kab'e' tnam lu, ex kkab'il mab'ent kten tuk'i'l Dyos ex mache ok te junx tnam. 17Ul te Qajaw Jesukrist q'olte tpakb'al b'a'n kye kkyaqil xjal, kyeye' najchaqtoq tqe'ye' tk'etz Dyos ex kyeju' nqaku' tqe' tk'etz Dyos. 18Qu'n naqx tu'nel Qajaw Jesukrist saja' q'o'n qoklen tu'n qpon lq'e aj Judaqo' mujqa mya, qu'n axte Xewb'aj Xjanju' npon q'inqe twitz. 19Qu'mtzun, ayekye' mya najchaq xjalqetle' ex mya ajb'etun xjal qe'ye', ja'lo matxi' che okye' tuk'i'l ttanam Dyos ex ikx kyoklenju'ye' se'n txqantl okslal. 20Ikqejuye' kse'n jun ja jawni b'incha'n tib'aju' jun tq'uqb'il kub' kyq'o'n apostl exqe' t-sanejlal Dyos, atzunju' ab'j te tq'uqlil ja a Jesukrist. 21Tib'ajtzu'n tq'uqlil lu ljo'n tjawa' b'incha'nju' ja tzyu'mile' tib', ljo'n tch'iy tu'n tok te tja Dyos Xjan. 22Ex tib'ajtzun tq'uqlil ja lu matxi' tz'oka kmujb'ana kyib'e' kkyaqile' tu'ntzun kyokye' te tja Dyos aj ati Xewb'aj Xjan toj.

will be added

X\