Efesios 1

1Ayine' Pawl ati woklene' tu'n Jesukrist naqx tu'n t-xtalb'il Dyos, inxi' ntz'ib'a'ne' u'j lu kyeye' ayeqeye' sk'o'nqeye' tu'n Dyos ex okslalqeye' te Jesukrist najlqe'ye' toj nintnam Epeso. 2Awt Qman Dyos ex Qajaw Jesukrist tzaj q'onte txqan t-xtalb'il kyib'aje' ex nak'b'il. 3Nimanxwit tb'i Dyos aju' Tman Qajaw Jesukrist tu'nju' txqan ky'i'wb'il saj tiq'in Jesukrist toj kya'j qe. 4O'jaw t-sk'o'n Dyos tu'nel Jesukrist na'mtoqpe' tb'ent twitz tx'otx', tu'ntzun qten mixti' qil twitz Dyos naqx tu'n tk'u'jlalil. 5Naq tu'n tk'u'jlalil Dyos nimxi'x, maqo' oktq'o'n te tk'wal naqx tu'nel Jesukrist, kub' t-xima'n ikju' qu'n ik tajb'ilju' ex b'a'n ela' toj twitz. 6Matb'incha ja'lu tu'ntzun kukx txi' qq'o'n chjonte te tu'nju' xtalb'il tb'anilxi'x xtb'incha qe, ma'tzun qokub' tk'i'wla'n naqx tu'nel Qajaw Jesukrist. 7- 8Naq tu'n tkamikju' Krist twitz krus ex tu'nju' tchk'el kub' qojl xqo' kleta' tjaq' il tu'n Dyos. Qu'n ate Dyos tu'nju' tk'u'jlalil nimxi'x qi'j matzaj tq'o'nju' qnab'l exju' ojtzqib'l tu'ntzun telqnik' ti'j tkyaqil. 9Ex matzaj tyek'u'nju' tb'is tk'u'j qe aj e'wantoq tu'n nejtl. Qu'n ate ma'toq kub' t-xima'n tu'n tb'inchante ja'lu naqx tu'nel Jesukrist, 10ex tb'incha tu'n tjapunju' oje ttziya, ex che okyel tmujb'a'n tkyaqilju' ti'xti' toj kya'j kyuk'ilju' ti'xti' te twitz tx'otx' tjaq' tkawb'il Jesukrist. 11Naqx tu'nel Qajaw Jesukrist o'jaw t-sk'o'n Dyos atxi'x txetnejel ex ktzajel q'o'n qetzb'il, kse'nxju' tb'is tk'u'j, qu'n ate nb'inchante tkyaqil kse'nxju' tajb'il. 12Atoqtzunte Dyos tajb'il tu'n tokqe qk'u'j ti'j Krist tnejelxi'x ayoqo' aj Juda, tu'ntzun qajwalinte tb'i te qkyaqilx. 13Naq tu'n t-xtalb'il Qajaw Jesukrist, ikxkye' matxi' kyb'iye' tyol axxi'x, exju' tpakb'al b'a'n te kolb'il, ex mache okslane' te, matz'ok kyechile' tu'n Xewb'aj Xjan ttziyan Dyos. 14Matzaj q'o'n Xewb'aj Xjan qe tu'n tqexi'x qk'u'j ti'ju' qetzb'il tzultq'o'n Dyos. Ajtzun tjapun tq'ijlalil tu'n qtzaqpet ex ajqok te ttanam, Qkyaqilxtzuntz qo' ajwalil tb'i Dyos nimaqtipumal. 15Tu'nju' matxi' wile' qa ati kyokslab'le' ti'j Qajaw Jesukrist ex nkk'u'jlan kyib'e' kxolilexe', 16qu'mtzun nchin nq'on chjonteye' kukxju' te Dyos kyi'je', ex kukx nche tzaj nna'ne' toj nna'j Dyose'. 17Inchin kub'sane' te Dyos Tman Qajaw Jesukrist, aju' Manb'aj nimxi'x tajwalil, tu'n ttzaj tq'o'nju' Xewb'aj Xjan kyeye' tu'ntzun tten knab'le' ex tu'n telkynik'e te Dyos axxi'x. 18Inxi' nqanine' te Dyos tu'n tjqonteju' knab'le', tu'ntzun telkynik'e ti'j titi'ju' ktzajel q'o'n kyeye' toj kya'j, tu'nju' mache txokliye' tu'n ex tu'n telkynik'e' ti'j qa aju' etzb'il ktzajel tq'o'n Dyos kyeju' ttanam tb'anilxi'x, 19ex tu'n telkynik'e' ti'j qa aju' tipumal Dyos nimxi'x ex mixti'x b'ajsb'il te, ex lu ati quk'i'l. Aju' ipumalj lu axju' tyek'u Dyos ojtxi' 20tej tjaw anq'in Jesukrist tu'n kxol kyimni ojtxi' ex ma'tzun kub' tq'uqb'an Jesukrist toj tb'a'nq'ob' toj kya'j, 21ex matxi' tq'o'n ipumalj te, ex toklen tu'n tkawin kyib'aj kkyaqilju' nche kawin ex kyib'aj kkyaqil ti'xti' toju' tq'ijlalil ja'lo ex tjax chix. 22Matxi' kub' tq'onte Dyos tkyaqilju' ti'xti' tjaq' tkawb'il Jesukrist, ex matxi' q'o'n toklen tu'n tok nejenel kye kkyaqil okslal. 23Qu'n kkyaqilju' okslal mache ok te t-xmilal Qajaw Jesukrist, qu'n tu'n Krist tz'aqlqeyaju' okslal ex kkyaqilju' ti'xti' toj kya'j ex twitz tx'otx' nojnqe' tu'n tchwinqlal Jesukrist.

will be added

X\