Hechos 9

1Kukxtoqtzun t-xob'san Sawl tu'n kkub' tb'yo'n okslal ti'j Qajaw. Tu'ntzunju' pon tk'etz knejel pale, 2ex xitqani'n tuj te toklen tu'n txi' kyoj ja te k'u'lb'il toj Damask, jyolkye ate' toju' ak'a'j txol, ichan ex qya, tu'n kb'ajx tiq'i'n toj kars toj Jerusalen. 3Tetzunj nqaku'toq ta'tl tk'etz nintnam Damask, naq mixnab'en ttzaj txaqli jun spik'un toj kya'j ti'jile. 4Majxtzun kub' tz'aq Sawl twitz tx'otx', ex tb'i ttzaj jun yol te intoq tma'n: Sawl, Sawl, ¿tiqu'n ljo'na' toj nq'ije' tu'na? chij. 5Xi'tzun tqani'n Sawl: ¿Altzun kyeya Taye? chij. Tzaj tzaq'we'n te: Ayinweju'ye' Jesus, ayinxju'ye' ljo'n toj nq'ije' tu'na. 6We'ktza ex kutokxa toju' nintnam Damask; atzuntzu' kxe'la' q'ma'n teya titi' tu'n tb'inchanteya, chij. 7Majx eb'ajxob'ju' intoq che b'et tuk'i'l Sawl, qu'n xikb'i'n yol, ex mix-a'lo'xte okkyka'yi'n. 8Jawtzun we' Sawl twitz tx'otx'; tetzunj tjaw ka'yin, mixti'xtoq nb'ent tka'yin. Xikxko'ntzuntz ex xikyiq'i'n Damask. 9Ten oxe' q'ij atzu' mixti'xtoq nka'yin, mixti'x wan ex mixti'x k'wan. 10Najlitoqtzun jun okslal Damask, Ananiy tb'i, kub' tyek'u'ntib' Qman Dyos te toj jun witzik' ex tma: ¡Ananiy! chij. Xi'tzun ttzaq'we'n: Luqine' lu, Taye, chij. 11Tzaj tma'n Qman Dyos te: We'ktza ex kutxi'ya toju' b'e Toj Tzinun tb'i, ex qaninkxa tja Judas ati jun ichan aj Tarso Sawl tb'i. In na'n Dyos, 12ex matxi' til tojun witzik' matz'okx jun ichan Ananiy tb'i ex makub' tq'o'n tq'ob' toj twi' tu'n tka'yin jumajtl, chi Dyos te. 13Tetzunj tb'inte Ananiy ja'lu, tma: Taye, nimxi' matxi' tz'oka' nb'i'ne' tqanil ti'ju' ichan lu ex ti'j tkyaqilju' myab'a'n matxi' tb'incha ti'ju' ttanama xjan toj Jerusalen. 14Matxitzun tzul ja'lo tzalu, q'o'n toklen kyu'n knejel pale, tu'n kb'ajx tiq'i'n kkyaqilju' nche na'nte tb'iya toj kars, chij. 15Atzunte Qman Dyos tzaj tma'n te: Kutxi'ya, qu'n matxi' jawnsk'o'ne' ichan lu tu'n tyolin wi'je' kye xjal kyoj txqantl nimaqtnam ex kye nimaqkawil, ex ikxkye aj Israel. 16Kxe'l nyek'u'ne' te qa kyajtel nim tu'n npaje', chi Dyos. 17Xi'tzun Ananiy toju' ja jatoq ta' Sawl. Tetzunj tokx tuja, e'kub' tq'o'n tq'ob' toj twi' ex xitma'n te: —Sawl, witz'in, machin tzaj tchq'o'ne' Qajaw Jesus, aju' kub' tyek'u'ntib' twitza toj b'e jatoq ljo'n ttzaja'ya, tu'n tka'yin jumajtla ex tu'n tnoja tu'n Xewb'aj Xjan, chij. 18Textzu'n kmuj eb'je'l tz'aqi naku'j ttxa twitz Sawl kyi'j twitz, ex ka'yin jumajtl. Jawe'tzuntz ex jaw a' twi'. 19Wantzuntz ex oktl tipumal, kyejtzun ten jte' q'ij kk'etzju' okslal najlqe'toq Damask. 20Aq'witzun Sawl pakb'alte kyoj ja te k'u'lb'il qa ate Jesus Tk'wal Dyos. 21Kkyaqiltzu'n nche b'inte majxtoq nche jawsak'puj, ex intoq kma'n: —¿Ma myatzun xjalju' lu ljoltetoq toj kq'iju' nche na'nte tb'i Dyos toj Jerusalen? ¿Ma myatzun ax xjalju' sul tzalu tzyulkye ex tu'n kyxitq'o'n toj kyq'ob'ju' kynejel pale? chechij. 22Atzunte Sawl xi'toq toktenxi'xtl q'malte tuk'i'l tipumal, ex majxtoq kyej chukji knab'l aj Juda najlqe' toj Damask tu'n, inxi'xtoq tchik'b'a'n qa ate Jesus Krist. 23Tb'ajlenxi'tzun b'a'npun q'ij, b'entti'j kyu'n aj Juda tu'n tkub' kb'yo'n Sawl, 24Tb'itzun Sawl ja'lu. Intoq che ayon ti'j q'ijtl ex qonik'an kyojile ttzi nintnam tu'n tkub' kb'yo'n, 25aye'tzun t-xnaq'tzb'en ku'x kq'o'n tojun nin chi'l ex ku'tz kq'o'n te qonik'an tib'aju' nintapi ti'jile nintnam. 26Tetzunj tpon Sawl Jerusalen, tajb'iltoq tu'n tten kxolju' okslal; kkyaqilxtoqtzun nche xob' te, qu'n mixti'xtoq nxikyoksla'n qa ojetoq tz'okslan. 27Xi'tzun q'i'n tu'n B'ernab'e ex xityek'u'n kyeju' apostl. Xitma'n kye qa ojetoq til Sawl Qajaw toj b'e, ex ojetoq tzaj yolin Qajaw te, ex min nxob' Sawl okten q'mal tpakb'al ti'j Jesus toj Damask. 28Iktzu'n kyejten Sawl toj Jerusalen, ex intoq b'et kyuk'i'l. Mixtoqti' nxob' ajtokten q'mal tpakb'al ti'j Qajaw, 29intoq yolin extoq nche wulj kyuk'i'l aj Juda ntoq che yolin toj kryek; aye'tzunkye kyajb'iltoq tu'n tkub' kb'yo'n. 30Tetzunj tok kka'yi'n okslal, xikyiq'i'n Sawl Sesarey, xiksma'ntzuntz Tarso. 31Mixtzunti'tl yajb'ilkye okslal toj tkyaqil tx'otx' Juda, Kaliley ex Samarya, ex intoq che ch'iy twitz Dyos. Intoq che anq'in tjaq' tchiylal Qman Dyos ex intoq chmet-xi'x kyb'aj tu'n tonb'il Xewb'aj Xjan. 32Intoqtzun b'et Luch xb'etzalkye okslal, ex xi' ka'yilkye okslal najlqe' Lida. 33Knettzun jun ichan Eneas tb'i tu'n atzu', ma'toq b'ent wajxaq ab'q'i k'oljni tkub' twitz kuẍb'il. 34Xitma'n Luch te kjalu: —Eneas, kq'ananjtzela tu'n Jesukrist. We'ktza ex q'inktza tkuẍb'ila, chij te. Textzu'n kmuj jawe' Eneas. 35Kkyaqilju' najlqe' Lida ex Saron kyil tej tjawe', kyajtzun kq'o'n ojtxi' kb'e ex e'okslan te Qajaw. 36Atitoqtzun jun qya okslal ti'j Qajaw toj nintnam Jope Tab'ita tb'i, a tz'elpuna' Dorkas toj kryek. Intoq tb'incha'n qya lu b'a'n ex intoq onin kyi'j prow toj tkyaqilju' tchwinqlal. 37Yab'ti Dorkas toju' tq'ijlalil lu ex kyim. Tb'ajlenxi'tzun txjo'n t-xmilal, kub' q'o'n tojun mqo'n toju' kol jawl. 38Nqayintoq ta' tnam Jope tk'etz Lida, jatoq ta' Luch; kb'itzu'n okslal qa atitoq Luch atzu', xikchq'o'n kab'e' ichan q'malte te: Wix kuttzaja toju' tnam Jope, chechij. 39Xi'tzun Luch kyuk'i'l. Tetzunj tpon, xiq'i'n toju' mqo'n jatoq ta' kyimni; ex intoq che oq' kkyaqilju' qya kyimni kychmil, b'jo'k kb'u'yi'n kyib' ti'j Luch ex eb'ajx kyek'u'n xb'alun eb'aj tb'incha'n Dorkas tej itz'xtoq. 40Eb'je'tztzun tchq'o'n Luch kkyaqil, ex kub' meje ex na'n Dyos; xika'yintzuntz ti'ju' kyimni, tma: —¡Tab'ita, we'ktza! chij. Jawtzun ka'yin Tab'ita, ex tej tlonte atitoq Luch, jaw qe. 41Xi'tzun Luch tzyulkye tq'ob' ex jaw twab'a'n; e'tzajtzun ttxko'n okslal exqe' qya kyimni kychmil, xityek'u'n kye itz'toq. 42B'injtz tqanil ja'lu toj tkyaqilju' nintnam Jope, ex nim xjal e'okslan te Qajaw. 43B'a'npun q'ij kyejten Luch toju' nintnam, tja jun tzq'ajsal tz'u'n Simon tb'i.

will be added

X\