Hechos 8

1Atitoq Sawl na'tz, ajunte taq' tyol tu'n tkub'yo'n Steb'an. Axtzun q'iju' tzyet tljonjtz toj kq'iju' okslal ate'toq toj Jerusalen. Kykyaqil okslal eb'je'x slamj toj kytx'otx' aj Juda ex aj Samarya, oqe'kxju' apostl min eb'je'x slamj. 2Ate' junjun ichan nimalqe' te Dyos exi' mqulte Steb'an ex ojexi'x e'o'q' ti'j. 3Atzunte Sawl okten ljol toj kq'iju' okslal, intoq okx kyojile ja tu'n kyetz tjwo'n ichan ex qya ex ntoq che okxtq'o'n toj kars. 4Aye'tzu'n eb'je'x ti'jxi' Jerusalen intoq xikma'n tpakb'al b'a'n jaxjaku' nche pona'. 5A junju' Lip, xi'pona' toju' nintnam Samarya ex okten yolil kye xjal ti'ju' Krist. 6Intoq kb'u'yi'n kyib'ju' xjal ex kkyaqil intoq kub' kb'i'nju' nxitma'n Lip, intoq che kka'yi'n b'a'nq'ob'aj nche b'ent tu'n. 7Nim xjal tzyu'nqe'toq tu'n tajaw il intoq che q'anet, ex intoq che ẍch'in tajaw il ajkykyaj ktzaqpi'n xjal; ex nim k'oljniqe' ex kox intoq che q'anet. 8Tu'ntzunju' oje che tzalaj xjal toju' tnam lu. 9Atitoqtzun jun ichan atzu' Simon tb'i, intoq ajkab'in nejtl ex matxitoq che b'ajxi' t-sb'u'n xjal toj Samarya, majxtoq nim toklen toj kwitz xjal. 10Kkyaqil xjal, prow ex q'inun, inxi'xtoq che b'in te ex intoq kma'n: Tipumal Dyos te'lu nim toklen, chechij. 11Ex inxi'xtoq che niman te, qu'n nimxi'toq tq'ijlalil matxitoq sb'unxi' kyi'j tu'n tajkab'i'n. 12Atzun tej kyokslante tpakb'al b'a'n b'ajx tma'n Pelip kye ti'ju' tkawb'il Dyos ex ti'j Jesukrist, b'jaw a' kwi' ichan ex qya. 13Ex okslan Simon ex jaw a' twi', tzyet tb'ettzuntz tuk'i'l Pelip, intoq lab'ti kyi'ju' nimaq b'a'nq'ob'aj ex techlal ntoq che oktka'yi'n. 14Tetzunj kb'inte apostl ate'toq Jerusalen qa matxitoq kk'am aj Samarya tyol Dyos, exi' kychq'o'n Luch ex Xwan atzu'. 15Tetzunj kpon, ena'n Dyos kyi'ju' okslal toj Samarya tu'ntoq kk'monte Xewb'aj Xjan. 16Qu'n mixtoq a'loxi' junkye ma'toq tzul Xewb'aj Xjan tuk'i'l; naq o'kx ojetoq jaw a' kywi' toj tb'i Qajaw Jesus. 17Kub'tzun kq'o'n Luch ex Xwan kq'ob' toj kwi', iktzu'n kk'ama' Xewb'aj Xjan. 18Atzunte Simon tej tka'yinte intoq ul Xewb'aj Xjan ajtkub' kq'o'n apostl kq'ob' toj kwi' xjal, xitma'n tu'n tq'onte pwaq, 19ex xitma'n kye: —Ex kq'ontze' ipumalj lu weye', tu'ntzun alkye makub' nq'o'ne' nq'ob'e' toj twi', oktk'ma' Xewb'aj Xjan, chij. 20Xi'tzun ttzaq'we'n Luch te: —¡Najxwita tuk'i'lxi' tpwaqa, qu'n makub' t-xima'na tu'n tlq'onteya oklenj tu'n Dyos tu'n pwaq! 21Mixti'xta toklen tu'n tk'monteya, qu'n myab'a'n tanmiya twitz Dyos. 22Tzaqpinkja myab'a'n ntb'incha'na lu, ex kub'sana te Dyos qama kub' najsa'n tila tu'n xkub' t-xima'na iku'na'j. 23Qu'n nka'yi'ne' nim taq'wixil ati toj tanmiya ex tzyu'na tu'n myab'a'n, chi Luch te. 24Xittzaq'we'n Simon te kjalu: —Che na'nqe' Dyose' wi'je', tu'ntzun lalun tzaju' lu wi'je' se'n xkmaye', chij. 25Tb'ajlenxi'tzun kma'n ktziyb'il ex tb'ajlenxi' kma'n tyol Dyos, xikma'n apostl tpakb'al b'a'n kyoj b'a'npun kojb'il toj Samarya, ex anjkyi'j Jerusalen. 26Tb'ajlenxi'tzun ja'lu, xitma'n jun tanjl Dyos te Pelip kjalu: We'ktza ex kutxi'ya toj tnayajkya'j, toju' b'e ntzaj Jerusalen tu'n tpon Kasa, chij. Toj chq'ajlaj nik'a' b'e lu. 27Jawtzun we' Pelip ex xi'; eltzun yal jun xjal aj Etyope twitz toju' b'e. Juntoq xjal nim toklen tk'etz nimaqkawil, tk'u'l pwaq nimaqkawil toj Etyope, matxitoq tx'anj k'ulul te Dyos toj Jerusalen. 28Xi'toq tanjti'j toju' ttx'otx', q'uqlitoq toj tkarwaj ex intoq t-ẍch'i'n tuj Isayiy t-sanjelal Dyos. 29Xitma'n Xewb'aj Xjan te Pelip kjalu: Kutxi'ya ex lq'exa tk'etzju' karwaj lu, chij. 30Tetzunj tok lq'e Pelip, xitb'i'n intoq jawt-ẍch'i'n aj Etyope tu'jil tu'n Isayiy; xitqani'ntzuntz te kjalu: —¿Ma nel tnik'a ti'ju' njaw t-ẍch'ina? chij. 31Xi'tzun ttzaq'we'n aj Etyope te: —¿Se'n taq'wi tu'n tel nnik'e' ti'j, extzun mix-a'lo' ntzaj chik'b'ante weye'? chij. Ex kub'san twitz Pelip tu'n tjax qeb'el tk'etz. 32Atoq nt-ẍch'i'nju' toj Tu'jil aju' ntma'n kjalu: Xiq'i'n naku'j jun tal rit toj b'iyb'ilte; kse'n jun qpoj tman rit mixti'xte ntma'n kwitzju' nche eljonte ti'j, Ikxtzun teju' mixti'xte tma. 33Kub' me'ssa'n ex mya tnik'alti'j b'inchanjtz te; ¿Alkye kb'antel ttx'olb'ante ti'ju' tyajajil? qu'n kub' b'yo'n tu'n lalun tentl twitz tx'otx', chiju' tz'ib'a'n. 34Xi'tzun tqani'n xjal nim toklen aj Etyope te Pelip kjalu: —B'inchama xtalb'il, q'mantza weye', ¿alqi'jtzun nyolina' t-sanjelal Dyos lu: ti'jx mujqa ti'j juntl? chij. 35Atzunte Pelip, tzyet tyolin ti'ju' ntoq jawt-ẍch'i'n aj Etyope toj Tu'jil, xitma'n tpakb'al b'a'n ti'j Jesus. 36Yajxi'tzuntl, tej kyik' tojun tx'otx' ja ta'toq a', xitma'n xjal nim toklen te Pelip: —Atite a' tzalu; ¿Ma myatzulo b'a'n tu'n tjaw a' nwi'ye'? chij. 37Xi'tzun ttzaq'we'n Pelip te: —Qama tokslaya tu'n tkyaqil tk'u'ja, b'a'nte' tu'n tjaw a' twi'ya, chij. —Ma wokslaye' qa a Jesukrist Tk'wal Dyos, chij xittzaq'we'n. 38Xi'tzun tma'n tu'n twe' karwaj; eku'xtzuntz toj a', ex jaw tq'o'n Pelip a' twi' aj Etyope. 39Tetzunj kjatz toju' a', xiq'i'n Pelip tu'n T-xew Qman Dyos, ex min tiltlju' ichan nim toklen aj Etyope; xi'tzun tljo'n tb'e inxi'xtoq tzalaj. 40Pontzun Pelip toj tnam Asoto, ex intoq xitma'n tpakb'al b'a'n tojile junjun tnam, tzmax tpon toj Sesarey.

will be added

X\