Hechos 7

1Xi'tzun tqani'n knejel pale te Steb'an qa axju' nq'manjtz ti'j, 2xi'tzun ttzaq'we'n kjalu: E'ntzik, e'witz'in ex e'manb'aj te tnam, chin kb'intze': Kub' tyek'u'ntib' Qman Dyos xa'wankuxi'x teju' ojtxi' qchman Ab'raam tej atitoq Mesopotamya, na'mtoq txi' najal toj Aran, 3ex tma Dyos te: Tzaqpinkja ttx'otx'a exqe' twitze'la, ex kutxi'ya toju' tx'otx' kxe'l nye'k'u'ne' teya, chij. 4Ik'tzun b'et Ab'raam toj Kaldey ex xi' najal Aran. Yajxi'tzuntl kyimju' tman, ex tzaj tiq'i'n Dyos Ab'raam toju' tx'otx' lu, ja najla'qe'ye' ja'lo. 5Mixtzunti' xitq'o'n jun tetzb'il toj; tk'i'xpe'wt jatu'n tkub'a' tq'o'n tqan. Ttziyatzun Dyos tu'n ttzaj tq'o'n te, tu'n ktenju' tyajajil toj tkyimlenxi' Ab'raam (maskye na'mxtoq tten tk'wal Ab'raam toju' tq'ijlalil lu). 6Expe' tma Dyos te qa che anq'iltoqju' tyajajil najchaq xjalqe' toj junxi'tl tx'otx', ex che okyeltoq te majin k'a'yi'n, che yajlanjtzel toj junk'al (400) ab'q'i. 7Ex ikx tma Dyos: Kb'el ntz'e'ysa'ne' twitzju' nintnam kb'el yajunkye, yajxi'tzuntl che eletz atzu' ex che ajb'el weye' tzalu, chij. 8Tej ttziyante Dyos, tchaq' te Ab'raam tu'n tok kyechel ti'j kychib'jil. Qu'mtzun tej tel wajxaq q'ij Isaak ju' tk'wal, ok techel ti'j tchib'jil tu'n Ab'raam. Ikx tb'incha Isaak ti'j Jakob' ju' tk'wal, ex ikxte Jakob' tb'incha kyi'j tk'wal, aye' manb'aj kye kab'lajoj tnej tyajajil Israel. 9Aye'tzun tk'wal Jakob', aye' ojtxi' qyajilb'en, tzaj tx'a'lti'j kk'u'j ti'ju' kyitz'in Jse, ex xikk'a'yi'n Ejipt. Atitoqtzunte Dyos tuk'i'l Jse, 10tkol toj tkyaqilju' yajb'ilte. Tzaj tq'o'n tnab'l ex tb'incha tu'n telb'a'n Jse twitz paraon, nimaqkawil toj Ejipt, oktq'o'n Jse te kawil toj Ejipt ex toju' tja nimaqkawb'il. 11Tzajtzun nin we'yaj ex nim yajb'il toj tkyaqil Ejipt ex toj Kanaan, mixtoqti' kwaju' ojtxi' qyajilb'en. 12Tetzunj tb'inte Jakob' atitoq wab'j Ejipt, exi' tchq'o'n tk'wal, aye' ojtxi' qyajilb'en, tzmax Ejipt. A tnejel maj kqanju'. 13Tetzunj kxi' tkamaji'n, xityek'u'ntib' Jse kyeju' ttzik, iktzu'n ela' tnik' paraon ja tzajna' tyajil Jse. 14Yajxi'tzuntl tchaq' Jse tu'n kb'ajx Jakob' ju' tman ex kkyaqilju' toj tja Ejipt, oxnaq o'lajoj toq kb'aj. 15Iktzu'n xa'ya' Jakob' najal Ejipt; atzuntzu' kyima', ex atzu' ekyima' ojtxi' qyajilb'en. 16Xiq'i'n t-xmilal Jakob' Sikyem, ex okxmqu'n toju' jul ojetoq lq'et tu'n Ab'raam tu'n jun tajlal pwaq kye tk'wal Amor toj Sikyem. 17Tetzunj xi'toq tulkanun tu'n tjapunju' yol ttziya Dyos te Ab'raam, matxitoq ch'iyju' tnam Israel toj Ejipt, matxitoq chmet txqan kyb'aj; 18tzyettzun tkawin jun nimaqkawil toj Ejipt min ojtzqi'ntoq Jse tu'n. 19Aju' nimaqkawil na'j eb'aj t-sb'u'n ojtxi' qyajilb'en ex eb'aj tyaju'n; e'oktchq'o'n tu'n kyex kxon tal kne'ẍ tu'n kkyim. 20Tojtzu'n tq'ijlalil lu itz'ji Moyses. Jun ne'ẍ te lab'te'n majxtoq tb'anilxi'x, ex kub' ch'isa'n oxe' xjaw kyu'n tman toju' kja. 21Tetzunj atitoq tu'n tex kyiq'i'n toj kja, atlju' tmyal paraon jaw q'inte ex kub' tch'isa'n naku'xwitloj talkuxi'x. 22Iktzu'n xnaq'tzanjtz Moyses toju' nab'l kye aj Ejipt, ex ok jun ichan nim tipumal toju' tyol ex toju' tb'inchb'aj. 23Tetoqtzun kab'naq ab'q'i Moyses, kub' t-xima'n tu'n tex ka'yilkye aj Israel, twnaqil qekuxi'xtoq. 24Tetzunj tlonte toktoq jun aj Ejipt yajulte jun aj Israel, xi' Moyses klolte, ex majxkub' tb'yo'n aj Ejipt tu'n tok t-xel tu'n. 25Toj tnab'l Moyses qatoq k'elelkynik' aj Israel twnaqil qa tu'nel che tzaqpetela' tu'n Dyos; aye'tzunkye mixti'x elkynik' ti'j. 26Tojtzun juntl q'ij, til Moyses intoq che q'ojin kab'e' aj Israel, tajb'iltoq Moyses tu'n kkub' nak'e, xitma'n kye: Kyitz'ina kyib'e'; ¿tiqu'ntzun nkyili'na' kyib'e'? chij. 27Atzun intoq wulin teju' juntl, xitlmo'n Moyses ex xitma'n te: ¿Alkye sok q'onteya te nejenel ex ajkawil qxole'? 28¿Ma tajb'ila tu'n nkub' tb'yo'na kse'n aj Ejipt kub' tb'yo'na ewi? chij. 29Tetzunj tb'inte Moyses ja'lu, etz oq ex xi' toju' tx'otx' Madyan. Atzuntzu' najana' ex e'ten kab'e' tk'wal. 30Tojtzun kab'naq ab'q'itl yajxi'tl, kub' tyek'u'ntib' jun anjl tojun q'aq' nk'ant ti'j jun ch'i'x twitz Moyses toj chq'ajlaj nqayin tk'etzju' witz Sinayi. 31Jaw lab'ti Moyses ti'ju' yek'b'il oktka'yi'n, ex tej t-xilq'e ka'yiltexi'x, tb'i ttzaj yolin Qman Dyos te kjalu: 32Ayinweju'ye' Dyos ja ek'uluna' ojtxi' kyajilb'ene'. Ayine' Dyos ja ek'uluna' Ab'raam, Isaak ex Jakob', chij. Jawtzun xob' Moyses ex min xika'yintl ti'j. 33Tmatzun Qman Dyos te: Q'imila t-xajab'a, qu'n xjante' jata'ya. 34Matxi' nka'yiye' b'a'nxi'x inche yajti ntaname' ate' toj Ejipt. Matxi' nb'iye' nche oq' ex machin ku'tze' tzaqpilkye. Qu'mtzun kuttzaja, kxe'l nchq'o'na toj Ejipt, chi Dyos te. 35Maskye ojetoq tz'el kyik'o'n Moyses ex ojetoq kma te kjalu: ¿Alkye sok q'onteya te nejenel ex ajkawil? chechij, a Dyos xichq'onte te nejenel ex tzaqpilkye, tu'nelju' anjl kub' tyek'u'ntib' twitz jata' ch'i'x. 36Ex a Moyses etzq'inkye ojtxi' qyajilb'en toj Ejipt, kb'entlenxi' b'a'nq'ob'aj toju' tx'otx' lu, toju' Kyeq Ninnjab', ex toj chq'ajlaj toju' kab'naq ab'q'i. 37Axju' Moyses xiq'mante kye aj Israel kjalu: Kjawil tiq'i'n Dyos jun t-sanjelal kxole' kse'n ayine', chij. 38Ex tej b'u'yi'ntoqkyib' aj Israel toj chq'ajlaj, ax Moyses ajb'en tu'n tyolin kxolju' anjl tzaj yolin te twi' witz Sinayi kyuk'i'lju' ojtxi' qyajilb'en; a k'monteju' yol te chwinqlal tu'n tkyej tq'o'n qe. 39Aye'tzunkye' ojtxi' qyajilb'en min kyaj tu'n t-xikb'i'n, elkyik'o'n ex kyajb'iltoq tu'n tanjkyi'j Ejipt. 40Xikma'n te Aaron: B'inchanqeku'ya qdyos tu'n qok lpe kyi'j, qu'n min b'i'n qu'n titi' matxi' b'ajte Moyses etzq'inqe toj Ejipt, chechij. 41Kub'tzun kb'incha'n jun witzleb' wakx ka'yin, e'kub' kb'yo'n alu'mj te chojb'il twitz ex kub'kyik'sa'n jun ninq'ij ninb'ilteju' witzleb' aye'x e'kub' b'inchante. 42Qu'mtzun e'kyaj tzaqpi'n tu'n Dyos ex xitq'o'n anb'il kye tu'n kk'ulun kye che'w twitz kya'j. Iktzun tz'ib'a'nju' toju' kyuj t-sanjelal Dyos kjalu: Aj Israel, ¿Ma kub'tzun kq'o'ne' chojb'il ex oyaj nwitze' toju' kab'naq ab'q'i toj chq'ajlaj? 43Ape' xkyb'inchajuye', jaw kyiqa'ne' tja dyos Molok ex tche'w dyos Repan, ekyilb'ilal dyos kb'inchb'aj qe'xe' tu'n kk'ulune' kwitz. Qu'mtzun che elex nxla'ja'ne' toju' ktaname' tzmajx najchaq ti'jxi' B'ab'ilon. 44Atitoqju' ja teju' yol kyejni b'entti'j kye ojtxi' qyajilb'en, b'incha'n kse'nx tma Dyos te Moyses tej tmante tu'n tb'inchet kse'nxju' tilb'ilal ojetoq tz'ok tka'yi'n. 45Kk'am ojtxi' qyajilb'en ja'lu te jun etzb'il, ex ul kyiq'i'n e'ul tuk'i'l Joswe tej tkub'ti'ju' ktx'otx' txqantl tnam kyu'n, aye' eb'je'x t-xla'ja'n Dyos kwitzku'. Ten atzu' tzmax toj tq'ijlalil Dab'i. 46B'a'n ela' twitz Qman Dyos, ex xitqani'n jun najb'il jatu'n kynajana' tyajajil Jakob'; 47atzunte Salomon jawb'inchanteju' tja Dyos. 48Mixtzunti' najlite Qman Dyos nim toklen tojun ja b'incha'n kyu'n xjal. Kse'n tma t-sanjelal kjalu: 49A nq'uqb'ilju'ye' kya'j, atzun tx'otx' kkub'el nqane'. ¿Se'ntzun njaye' kb'el kyb'incha'ne'? chi Dyos; ¿jatzun tu'n wojlana'ye', 50extzun ayine' nb'inchante tkyaqilju' ti'xti' lu? chi Dyos. 51Aye'tzunkye'— chi Steb'an xitljo'n tmante—pi'sqe'ye' kukxju', kyẍkyin ex kyanmi k'lul witzleb' qe'ye'. Ajq'ojqe'ye' kukxju' ti'ju' Xewb'aj xjan. Ikqe'xju'ye' se'nqe' ojtxi' kyajilb'ene'. 52¿Alkye jun t-sanjelal Dyos min b'aj kyaju'n ojtxi' kyajilb'ene'? E'kub' kb'yo'nju' matxitoq che yolin ti'j tulelju' tnik'alti'j, atzun ja'lo oje tzulju' tnik'alti'j lu, kub' ksaqchb'e'ne' ex makub' kb'yo'ne'. 53Kk'ame' kawb'il tzaj tq'o'n jun anjl, ex min xi'knima'ne', chi Steb'an. 54Tetzunj tb'aj kb'i'n ja'lu, majxkub' ktx'a'n t-xe kwitzte tej tzaj ktx'u'jil b'a'nxi'x ti'j Steb'an. 55Atzunte Steb'an nojni tu'n Xewb'aj Xjan, xika'yin twitz kya'j ex tilju' tajwalil Dyos, ex til Jesus wa'l toj tb'a'nq'ob' Dyos. 56Tmatzuntz: —¡Inka'yi'ne' jqo'nqe' kya'j, exju' Tk'wal Dyos ati toj tb'a'nq'ob' Dyos!, chij. 57Aye'tzunkye b'aj kub'kyjpu'n kẍkyin, ex eb'jaw ẍch'in kuw eb'jo'k tzaqpajtzuntz ti'j. 58Etzkyiq'i'n toju' nintnam ex b'aj kxon toj ab'j; aye'tzu'n e'ok tziyal ti'j, b'aj kyej kq'o'n kxb'alun tk'etz jun ku'xun Sawl tb'i tu'n txi' tka'yi'n. 59Tetzunj te'qe'ktoq xolte toj ab'j, na'n Dyos Steb'an, tma: Wajaw Jesus, k'moma wanmiye', chij. 60Kub' mejetzuntz ex jawẍch'in kuw kjalu: ¡Nman Dyos, lalun tz'oktq'o'n twitza ti'ju' kyil nkyb'incha'n weye' lu!, chij. Tetzunj tb'aj tma'n ja'lu, kyimtzuntz.

will be added

X\