Hechos 6

1Xi'toqtzun tchmet-xi'x kyajlalju' okslal toju' tq'ijlalil lu, e'aq'wiju' nche yolin toj kryek wuljel kyi'ju' nche yolin toj eb'rey, kyma qa min nche'x k'u'jla'nxi'xju' qya kryekqe' tu'n kywa ajtb'je'x sipa'n. 2Eb'ajtzun kyb'u'yi'n apostl kykyaqilju' okslal ex xikyma'n kye: —Myab'a'n tu'n tkyaj qtzaqpi'ne' tu'n tpakb'etju' tyol Dyos, tu'n ka'yb'enteju' wab'j ex pwaq. 3Qu'mtzun e'ntzik ex e'witz'in, kyjyome' wuq ichan q'uqlixi'x kyk'u'jlalil kyxole', ati kynab'l ex nojniqe' tu'n Xewb'aj Xjan, tu'n tkyaj qq'o'ne' aq'untl lu toj kyq'ob'. 4Ayo'tzunqe' kxe'l qljo'ne' tu'n qna'n Dyose' ex tu'n tpakb'etju' tyol Dyos, chechij. 5Kykyaqil b'a'n ela' toj kywitz, ex e'jaw ksk'o'n Steb'an, atixi'x tokslab'l ex nojni tu'n Xewb'aj Xjan, ex Pelip, ex Prokoro, ex Nikanor, ex Timon, ex Parmenas ex Nklas aj Antyokyiy ojetoq tz'ok nejtl toj kyokslab'l aj Juda. 6Exikyiq'i'ntzuntz kyk'etzju' apostl, ena'n Dyos apostl kyi'j ex kub' kyq'o'n kyq'ob' toj kywi'. 7Xi'toq t-ximlenxi'xtl tyol Dyos ex xi'toq kychmet-xi'xtlju' okslal toj Jerusalen. Expe' nim pale aj Juda e'okslan. 8Atitoq tipumal Steb'an ex ky'i'wla'ntoq tu'n Dyos, intoq che tb'incha'n b'a'nq'ob'aj ex techlal toju' tnam. 9Ate'tzun junjun toju' ja te k'u'lb'il Majin E'tzaqpet tb'i, kyuk'i'l junjun aj Sirene, aj Alejandriy, aj Silisya ex tzajniqe' toj tx'otx' Asya, e'aq'wi wulil tuk'i'l Steb'an; 10ex mixtoqti'x nmqet kyu'n, qu'n intoq yolin kye tuk'i'l nab'l ntzaj tq'o'n Xewb'aj Xjan. 11Kychojtzun junjun xjal tu'n kymante qa kyb'i tyol Steb'an te i'lb'il ti'j Moyses ex ti'j Dyos. 12Ikytzu'n b'jawa' kyiq'i'n kyib'ju' tnam, e'tijwnaq exqe' xnaq'tzal kawb'il; eb'jo'k tzaqpajtzuntz ti'j Steb'an, tzyet kyu'n ex xikyiq'i'n twitz K'loj Tzyul Kawb'il. 13Expe' e'kyjoy tziyal chalyolqe', kyma kjalu: —Kukx te xjalju' tyolin lu ti'ju' tja Dyos ex ti'ju' kawb'il. 14Matxi' qb'ixi'ye' intma'n qa kjawil t-xitu'n Jesus aj Nasaret tja Dyos ex che b'ajel tch'exb'e'n inche qb'incha'n se'n kyajni tma'n Moyses, chechij. 15Tetzunj kyxika'yin tzyul kawb'il ex kykyaqilju' ate'toq atzu' ti'j Steb'an, kyil ikytoq ka'yin Steb'anju' kse'n jun anjl.

will be added

X\