Hechos 5

1Atitzun jun ichan Ananiy tb'i, tuk'i'l Sapira ju' t-xu'jil, xikk'a'yi'n ktx'otx'. 2B'entti'j kyu'n ichan lu tuk'i'l t-xu'jil, kyej tiq'i'n jni' ti'ju' pwaq twi' tx'otx', atzu'n jni'tl xitq'o'n toj kq'ob'ju' apostl. 3Xi'tzun tma'n Luch te: —Ananiy, ¿tiqu'n xa'tq'o'na anb'il te tajaw il tu'n tchan yola te Xewb'aj Xjan, ex makyej tiq'i'na jni' ti'ju' pwaq saj chjo'n teya ti'ju' tx'otx'? 4¿Ma myatzun teju'ya tx'otx'? Ex tej xitk'a'yi'na, ¿ma myatzun teju'ya pwaq? ¿Tiqu'n xtb'inchaju'ya lu? Mya kye ichan xchana' yola, teku' Dyos, chi Luch. 5Tetzunj tb'inte Ananiy ja'lu, kub' tz'aq majx kyim. Ex tzaj xob'el kyi'j kkyaqilju' eb'inte. 6E'tzajtzun jte' ku'xun, b'aj kb'altz'i'n toj xb'alun ex xikyiq'i'n toj muqb'il. 7Tojtzun oxe' kmujtl okxju' t-xu'jil Ananiy, min b'i'ntoq tu'n titi' matxitoq b'aj. 8Xitqani'n Luch te: —Q'mantza, ¿Ma ikxa' kk'a'yina' tx'otx' ju'ye' se'n xkmaye'? chij. —Ikju', ate twi'ju', chiju' qya xittzaq'we'n. 9Xitzun tma'n Luch te: —¿Tiqu'n xb'enta'ti'j kyu'ne' tu'n tok kq'o'ne' T-xew Qman Dyos toj joyb'ilti'j? Luqe' ẍetx'anj mqulte tchmila ate' ttzija, ex kxe'l q'i'na kyu'n ja'lo, chij. 10Textzun kmuj lu kub' tz'aq Sapira majx kyim t-xe tqan Luch. Tetzunj kyokxju' ku'xun ka'yilte, kyimnitltoq, xikyiq'i'ntzuntz toj muqb'il ex ku'x kmqu'n tk'etzju' tchmil. 11Tzajtzun xob'el kyi'j kkyaqilju' okslal ex kyi'ju' eb'inte ja'lu. 12Nim b'a'nq'ob'aj ex techlal b'ajb'ent kyu'n apostl kxol xjal; ex kykyaqil ntoq kb'u'yi'n kyib' twitzju' Tjpel ja tu'n Salomon. 13Mix-a'lo'qe' txqantl kmujb'akyib' kyuk'i'l, aye'tzun xjal intoq che tzalaj ti'ju' nkb'incha'n. 14Ex chmet-xi'x kyb'aju' e'okslan te Qman Dyos, e'ichan ex eqya. 15Ex intoq che b'je'tz q'i'n yab' kyoj b'e, ntoq che kub' q'o'n kyib'aj kuẍb'il, tu'ntzun ajtik' Luch ja ta'qe', tu'npe' aju' tewin tu'n tik' tib'aj junjun. 16Ex kyoju' tnam nqayin tk'etz Jerusalen, nim xjal intoq che tzaj kyiq'i'n yab' exqe' xjal yaju'nqe' kyu'n tajaw il; ex kykyaqil intoq che q'anet. 17Tzaj ttx'u'jil kynejel pale exqe' sadusey ate'toq tuk'i'l, 18ex e'tzyetju' apostl kyu'n ex e'okx kyq'o'n toj kars. 19Juntzun tanjl Qman Dyos jqonte kars te qonik'an ex eb'je'tz tiq'i'n, xitma'n kye: 20Kukxi'ye' ex che we'ku'ye' toj tja Dyos, kymanxe' tpakb'alil te chwinqlal lu kye kykyaqil xjal, chij. 21Tetzun juntl q'ij te prim eb'jo'kx toj tja Dyos, kse'nx matxitoq kb'i, ex e'aq'wi q'ol xnaq'tzb'il. Atzun knejel pale exqe' ate'toq tuk'i'l, eb'aj tzajkyb'u'yi'n kkyaqil tijwnaq kxol aj Israel toj jun chmab'l te K'loj Tzyul Kawb'il, ex kychaq' tu'n ktzaj iq'i'n apostl jpu'nqetoq toj kars. 22Tetzun kyponju' tmajin kawb'il ttzi kars, mixti'qe'tltoq. Anjtzun kyi'jtz q'malte, 23kjalu: —Jpu'ntoqte' kars b'a'nxi'x tej xqopone', ex ate'toqju' xq'uqil kywitzile tjpel ja; atzunj sokx qjqo'ne', mix-a'lo'tlte ati tojxi', chechij. 24Tetzunj kyb'inte, intoq che xjelun nejenel toj tja Dyos kyuk'i'l kynejel pale tib'aj se'n kpomela' b'aja' tkyaqil ja'lu. 25Tojtzu'n kmuj lu pon jun xjal q'malte kjalu: —Luqekye' e'okx kyjpu'ne', ate'qe' toj tja Dyos inche q'on xnaq'tzb'il kye xjal, chij. 26Xi'tzu'n nejenel kye xq'uqil kyuk'i'l t-xjal jyolkye; min e'oktzaqpaj kyi'j, qu'n intoq che xob' qa jaku' che b'ajxon kyu'n xjal toj ab'j. 27Tetzunj kpon, exi' kyiq'i'n twitzju' K'loj Tzyul Kawb'il, ex xitma'n kynejel pale kye: 28—Ojena' txiqma'ne' kyeye' tu'n lalun txikyxnaq'tza'ntl jun ti'xti'ye' ti'ju' xjal lu. ¿Ti'tzun matxi' kyb'inchaye' ja'lo? Matxi' b'ajkub' puqliju' kyxnaq'tzb'ile' lu toj Jerusalen, extzun kyajb'ile' tu'n tokkyq'o'ne' tkamikju' xjal lu te qpaje', chij. 29Xi'tzun ktzaq'we'n Luch kyuk'i'l txqantl apostl kjalu: —A qejuye' tu'n qb'inchante tu'n t-xiqb'i'ne' Dyos ex myaye' xjal. 30Ate Qman Dyos ja e'ajb'ena' ojtxi' qchman jaw anq'in Jesus tu'n, axju' kub' kb'yo'ne' twitz krus. 31Oje jawtiq'i'n Qman Dyos ex oje kub' tq'o'n toj tb'a'nq'ob', ex matxi' tz'oktq'o'n te Nejenel ex Kolol, tu'ntzun tanjtzti'ju' nintnam Israel tuk'i'l Dyos ex tu'n kykub'najsa'n til. 32Ti'jtzun ja'lu tziyal qo'ye', exju' Xewb'aj Xjan matxi' tzaj tq'o'n Dyos kyeju' nche niman te, chechij. 33Tetzunj kyb'inte ja'lu, tzaj kytx'u'jil ex kyajb'iltoq tu'n kykub' kyb'yo'n. 34Atitoqtzun jun parisey kyxolju' tzyul kawb'il lu, Kamalyel tb'i, jun xnaq'tzal kawb'il majxtoq oksla'n toju' tnam. Kub' we' ichan lu ex tma tu'n kyetz iq'i'n jun kmoju' apostl. 35Xitma'ntzuntz kye txqantl tzyul kawb'il: —Kyka'yinxe' aj Israel ti'ju' kyb'incha'ye' kyi'ju' ichan lu. 36Kyna'ntze' toju' tq'ijlalil matxi' kyej jawtiq'i'ntib' Tewdas, tma qa atitoq toklen, ex qapelo junk'al (400) xjal e'oklpe ti'j. Kub'tzun b'yo'n, aye'tzu'n t-xnaq'tzb'en eb'ajx sputj, ex mixti'tlte b'aj. 37Yajxi'tzuntl toj tq'ijlalil tjaw kyajlal xjal, jawtiq'i'ntib' Judas aj Kaliley, ex eb'jo'k lpe jte' xjal ti'j; ex kub' b'yo'n, ex kykyaqilju' eb'jo'k lpe ti'j eb'ajx sputj. 38Atzun ja'lo, awe' nyol kyeye', che tenku' xjalj na'j ex lalun tz'ok kq'o'n kyib'e' kyi'j. Qu'n qa kyu'n xjal te'lu, kb'el najte'; 39qatzun tu'n Dyos te'lu, lay kub'kyi'j kyu'ne'. Kka'yinxe', naq jaku' ti'j Dyos nche q'ojina'ye', chij kye. Xi'tzun knima'n tyol Kamalyel. 40E'tzajtzun ktxko'n apostl, eb'aj kjiku'n ex xikma'n kye tu'n lalun che yolintl toj tb'i Jesus; exi' ktzaqpi'ntzuntz. 41Inxi'xtoq che tzalaju' apostl tej kyetz kwitzju' tzyul kawb'il, qu'n matxitoq taq' Dyos anb'il kye tu'n kyyajti tu'n tpaj tb'i Jesus. 42Intoq che q'on xnaq'tzb'il tkyaqil q'ij ex intoq xikyma'n tpakb'al b'a'n ti'j Jesus ju' Krist, toj tja Dyos ex kyoj ja.

will be added

X\