Hechos 4

1Inxtoqtzun che yolin Luch ex Xwan kyeju' xjal, tej kpon pale ex nejenel kye xq'uqil toj tja Dyos exqe' Sadusey. 2Intoq che tx'u'jin qu'n intoq che q'on Luch xnaq'tzb'il kye xjal tuk'i'l Xwan, intoq xikyma'n qa matxitoq yek'unju' kjawlen anq'in kyimni tu'nju' tjaw anq'in Jesus. 3Etzyet kyu'n ex e'okx kjpu'n, texi' juntl q'ij kyetz ktzaqpi'n qu'n matxitoq qo'qex. 4Nimtzunte' e'okslan kxolju' eb'inte tpakb'al b'a'n; ex oqe'kxju' ichan qapelo japun kyajlal toj kab'lajk'al lajnaq (5,000). 5Tetzun juntl q'ij b'aj kb'u'yi'nkyib'ju' nejenel kxol aj Juda, etijwnaq exqe' xnaq'tzal kawb'il. 6Ate'toq Anas ex Kaypas, knejel paleqe', exqe' Xwan, Ljantr ex kkyaqilju' toj kja knejel pale. 7Kchaq' tu'n kxiq'i'n Luch ex Xwan, e'pon q'i'ntzuntz kwitz, xikqani'n kye kjalu: —¿Alkye xiq'onte kyoklene', mujqa altoj qb'i ẍekb'inchaye' ti'xti' lu? chechij. 8Nojnitoq Luch tu'n Xewb'aj Xjan, xittzaq'we'n kye: —E'nejenel kye tnam ex e'tijwnaq: 9inche xjelune' qeye' ti'ju' b'a'n xb'ent te jun yab', tu'n kb'inteye' se'n xq'aneta'. 10Okna' kxe'l qchik'b'a'ne' kwitze' ex kwitz kkyaqilju' aj Israel, aju' ichan ati tzalu kwitze' kykyaqile', maq'anet toj tb'i Jesukrist aj Nasaret, axju' jaw kq'o'ne' twitz krus ex matxi' jaw anq'in tu'n Dyos. 11Ate Jesus ab'j matxi' tz'el kyik'o'ne' aye'ye' b'inchal ja, ex matxi' tz'ok te ab'j nim toklen. 12Ex mix-a'lo' juntl kolol, qu'n mix-a'lo' juntl xjal twitz tx'otx' q'o'nwt toklen tu'n qklet tu'n, chi Luch. 13Tetzunj klonte tzyul kawb'il kuwqe' Luch ex Xwan tej kyolin, elkynik' kye qa mixti' nimaq kyxnaq'tzb'il, majx eb'jaw sak'puj ex elkynik' kye qa t-xnaq'tzb'en Jesus qe'. 14Expe' atitoqju' ichan q'anet kk'etz, qu'mtzun mixti'toq tu'me'l tu'n kmante jun taq'wix kyi'j. 15Kchaq'tzuntz tu'n kyetz toju' chmab'l, e'kyajten tzunkyetz yolil kxolx. 16Intoq kma'n: —¿Ti'tzu'n qb'incha' kyi'ju' ichan lu? kkyaqil xjal aj Jerusalen kanli kwitz mab'entju' b'a'nq'ob'aj lu kyu'n, ex lay b'ent tkub' qewa'n. 17Tu'ntzun lalun txi' puqlixi'x tyolji ja'lu, che xe'lqxob'sa'n tu'n lalun che yolintl ti'j tb'i Jesus kye xjal, chechij. 18E'tzaj ktxko'ntzuntz ex kychaq' kye tu'n lalun txikma'ntl ex tu'n lalun kyaq'tl xnaq'tzb'il ti'j tb'i Jesus. 19Aye'tzunkye Luch ex Xwan xiktzaq'we'n kye kjalu: —Kximanku'ye' b'a'nxi'x qa b'a'n toj twitz Dyos a kxe'l qb'i'ne' nkyma'ne' ex myaju' ntma'n Dyos. 20Lay kyej qnunb'a'nqe' tq'umjiju' matxi' qile' ex matxi' qb'iye', chechij. 21Eb'aj xob'tza'n kyu'n tzyul kawb'il, ex eb'je'tz tzaqpi'n. Mixti'x elyal jun kyil tu'n tkub' tz'e'ysa'n kwitz, qu'n kkyaqilju' xjal ntoq jawkyajwali'n Dyos tu'nju' matxitoq b'aj. 22Ojetoq tzik' tab'q'iju' ichan q'anet tu'n b'a'nq'ob'aj tib'aj kab'naq. 23Tetzunj kyetz tzaqpi'n Luch ex Xwan, exi' kxolju' kyuk'i'l ex xiktx'olb'a'n tkyaqilju' matxitoq txikma'n knejel pale kye exqe' tijwnaq. 24Tetzun tb'aj kb'i'n, kkyaqil ena'n Dyos junx, kma: Qman Dyos, aya b'inchante kya'j, tx'otx', ninnjab' ex tkyaqilju' ati kyoj, 25tmaya tu'nel Xewb'aj Xjan toj ttziju' ojtxi' qchmane' Dab'i, ju' tmajina, kjalu: ¿Tiqu'n nche jawtilju' tnam? ¿Tiqu'n nkub' knk'u'n kxim mixti'x ttx'o'lajil? 26Njaw kyiq'i'n kyib' nimaqkawil exqe' nche kawin ex noktilil kyu'n junx ti'j Qman Dyos ex ti'ju' Krist sk'o'n tu'n, chij. 27Axxi'x b'aj kb'u'yi'n kyib' Erodes tuk'i'l Pons Pilat tzalu toju' nintnam, kyuk'i'l najchaq xjal exqe' aj Israel, ti'j Jesus ju' tmajina xjan, aju' jaw t-sk'o'na te Krist. 28Iktzu'n kb'inchaya' tkyaqilju' t-xima ojetoq b'aj tnk'u'na qa atitoq tu'n tb'aj. 29Atzun ja'lo, Taye, ka'yintza kxob'tzab'l ex q'ontza kyipumalju' tmajina tu'n lalun che xob' tu'n t-xikma'n tpakb'al b'a'n. 30Yek'uma tipumala, tu'n kq'anet yab' ex tu'n kb'ent techlal ex b'a'nq'ob'aj toj tb'i Jesus ju' tmajina xjan, chechij. 31Tetzunj kb'aj na'n Dyos, yukchiju' jata'qe'toq; ex kkyaqil enoj tu'n Xewb'aj Xjan, ex inxi'xtoq xikma'n tyol Dyos kye xjal. 32Kkyaqilju' okslal, nimtoq txqan kb'aj, junxtoq kxim ex junxtoq knab'l. Mix-a'lo' jun inq'mante qa teju' ti'xti' te tjunal, kyeyiletoq kkyaqil. 33Ljo'ntoq t-xikma'n apostl jun tziyb'il nim tipumal ti'ju' tjawlen anq'in Qajaw Jesus, ex intoq che tk'i'wla'n Dyos kkyaqil. 34Mixtoq alo' jun ati nojqelan te kxol, qu'n alkye atitoq ttx'otx' mo tja, intoq b'ajx tk'ayi'n, atzunju' pwaq 35intoq pon kq'o'n kyeju' apostl, tu'n tb'ajx ksipa'n kxol kkyaqil kse'n nojqelan te junjun. 36Atitoqtzun jun aj Leb'i Jse tb'i, aj Chipre, okq'o'n tb'i B'ernab'e kyu'n apostl, (a tz'elpuna': Q'uqb'al k'u'jb'aj). 37Atitoq jun ttx'otx'ju' ichan lu, xitk'a'yi'n ex xitq'o'n pwaq toj kq'ob'ju' apostl.

will be added

X\