Hechos 3

1Atzun jun q'ij exi' Luch tuk'i'l Xwan toj tja Dyos toj na'j Dyos tej ttzaj oxe' te qale. 2Atitoqtzun jun ichan kox titz'jlenx atzu', intoq pon q'i'n tkyaqil q'ij ex nkub' q'o'n twitz tjpel tja Dyos Xa'wanku'xi'x tb'i, tu'n tqanin tkotz kyeju' nche okx. 3Tetzunj tka'yinte ichan kox xi'toq kyokx Luch ex Xwan toj tja Dyos, xitqani'n tkotz kye. 4Majxtzun e'ok ka'yin ti'j, ex xitma'n Luch te: —Qotka'yintza, chij. 5Majxtzun okka'yin kyi'j, chilo qa kxe'ltoq q'o'n tkotz. 6Atzunte Luch xitma'n te: —Mixti'we' nsaqpwaq ex nq'anpwaq, atzunju' ati weye' kxe'l nq'o'ne' teya: kxe'l nma'ne' teya toj tb'i Jesukrist aj Nasaret, we'ktza ex b'eta, chij. 7Jawtzun ttzyu'n Luch tq'ob' toj tb'a'nq'ob' ex jaw twab'a'n, tentzun kyipumalju' tqan ex twonsil tqan. 8Kub'tzun we' kox, jaw lipan ex aq'wi b'etel; okxtzuntz kyuk'i'l toj tja Dyos nb'et, nxlik'pun ex njaw tajwali'n Dyos. 9Kykyaqilju' e'lonte intoq b'et ex ntajwali'n Dyos, 10majx eb'jaw sak'puj ex e'xob' tu'nju' b'ajte, qu'n kyojtzqi'n toqju' ichan ex kanli kywitz axtoqte ichanju' intoq kub' qe qanil tkotz ttzi tja Dyos, twitzju' tjpel ja Xa'wanku'xi'x tb'i. 11Majxtoqtzun lepchokju' ichan q'anet kyi'j Luch ex Xwan. Kykyaqil xjal eb'ajlab'ti, eb'ajx ojqelan toj tja Dyos jatoq ta'qe' tu'me'l Tjpel Salomon tb'i. 12Tetzunj tka'yinte Luch ja'lu, xitma'n kye: ¿Tiqu'n ẍeb'aj sak'puje' aj Israel? ¿tiqu'n nqo oka' kka'yi'ne' nakuj ayo'xqe' xqo q'anante ichan lu ex nakuj tu'nxqe' qipumal mo tu'n qokslab'le' xb'eta'? 13Anate Kydyos Ab'raam, Isaak ex Jakob', Kdyos ojtxi' qyajilb'en, matxi tq'o'n toklen Jesus ju' tmajin nimxi'x, aju' xikq'o'ne' toj kq'ob' tzyul kawb'il ex elkyik'o'ne' tej matxitoq kub' t-xima'n Pilat tu'n tetz ttzaqpi'n. 14A kyeju'ye' xikqani'n te t-xelju' Xjan ex Tnik'alti'j, tu'n tetz tzaqpi'n jun nim til. 15Iktzu'n kub'a' kb'yo'ne' ntzaj q'onte qchwinqlal. Jawtzun anq'in tu'n Dyos, ex tziyal qo'ye' ti'j. 16Tu'nte okslab'l ti'ju' tb'i Jesus soka' tipumalju' ichan nok kka'yi'ne' ex kyojtzqi'ne'. Tu'n okslab'l ti'j Jesus majx maq'aneta', kse'nx nok kka'yi'ne'. 17B'i'n wu'ne' e'ntzik ex e'witz'in, tej tkub' kb'yo'ne' Jesus kyuk'i'lju' knejele', min b'i'ntoq kyu'ne' ti'xi'xju' intoq kb'incha'ne'. 18Atzunte Dyos tu'nju' lu japuna' q'ma'ntltoq tu'n nejtl toj ktzi kkyaqilju' t-sanjelal: qa atitoq tu'n tkyimju' Tkrist. 19Qu'mtzun kutanjtz kyi'je' tuk'i'l Dyos ex kych'exb'em kyib'e', tu'n tkub' tnajsa'n kyile' 20ex ktzajel tq'o'n Qman Dyos Jesus q'ol nak'b'il kyeye', aju' sk'o'n tu'n atxi'x t-xetnejel. 21Maskye ktenb'el Jesukrist toj kya'j ja'lo tzmax ajtb'ajkub' tnk'u'n Dyos ti'xti', kse'nx tma toj ktziju' t-sanjelal xjanqe' eb'aj anq'in ojtxi'. 22Tma Moyses tpakb'alil kyeju' ojtxi' qchman: Ktb'incha' Qman Dyos tu'n tul jun t-sanjelal kyxole' se'nwe'. Kyb'inxe' toj tkyaqilju' matma, 23qu'n kykyaqilju' min xikyb'i'n t-sanjelal Dyos lu, che b'je'lex xla'ja'n toju' tnam. 24Ex kykyaqilju' t-sanjelal Dyos, tzajx ti'j Samwel, e'yolin ti'ju' tq'ijlalil lu. 25Aye'ye' etzal ti'ju' tziya'ntl tu'n Dyos toj kytzi t-sanjelal, ex etzalqe'ye' ti'ju' tziya'ntl tu'n Dyos kyeju' ojtxi' kychmane'. Qu'n tma Dyos te Ab'raam: Kykyaqilju' nimaqtnam twitz tx'otx' che k'i'wletel kyu'nelju' tyajajila, chij. 26Tej tjaw anq'inju' Tk'wal Dyos tu'n Dyos, tzaj tchq'o'n nejtl kyeye', tu'n kk'monteye' k'i'wb'il, tu'n kych'exb'ente kyib'e' tu'n tkyaj kq'o'ne' b'inchaj myab'a'n, Chi Luch b'aj tpakb'a'n.

will be added

X\