Hechos 28

1Tetzunj matxitoq qoklete' qkyaqile', qb'iye' Malta tb'iju' swejtx'otx' lu. 2B'a'n qilwiye' kyu'n xjal najlqe' atzu'; tu'ntzu'n intoq kub' jb'al ex atitoq che'w, kub' kk'opi'n jun ninq'aq' ex oxiktxko'ne' tu'n qok lq'eye' kk'etz. 3Matxitoqtzun jaw tb'uyi'n Pawl ch'i'n si tzqij, intoq okxtq'o'n toj q'aq' tej tetz oq jun q'antin toju' q'aq' ex okye' ti'j tq'ob' Pawl. 4Tetzunj tok kka'yi'n xjal najlqe' atzu' yo'loktoqu' q'antin ti'j tq'ob' Pawl, kma kxolx: B'yolxjal lote' ichan lu, maskye maklet toju' ninnjab', layx kyej anq'in tu'n Dyos, chechij. 5Atzunte Pawl elt-xonju' q'antin toj q'aq', ex mixti'te b'ajte. 6Kkyaqil ntoq che ayon tu'n txi' mal mujqa tu'n tkub' tz'aq Pawl kyimnitl tojun kmujx; tetzunj nimtoj nche ayon, tej kka'yinte mixti'te b'ajte, kych'exb'e knab'l ex kma qa jun dyos Pawl. 7Atitoqtzun ttx'otx'ju' xjal nim toklen toju' swejtx'otx' nqayin na'tz, Pub'lyo tb'i, otk'ame' ex oxitka'yi'ne' toj oxe' q'ij. 8Atitoqtzun tman Pub'lyo twitz kuẍb'il, yab' tu'n kyaq ex tu'n chk'oj. Xi'tzun Pawl ka'yilte, tetzunj tna'n Dyos ti'j ex kub' tq'o'n tq'ob' tib'aj, q'anet tu'n. 9Tu'ntzun ja'lu, ex eb'ju'l txqantl yab' ate'toq toju' Swejtx'otx' tk'etz, ex eq'anet. 10Ojexi'x oxikka'yi'ne', ex yajxi'tl, tej qokxtle' toj b'ark, tzaj kq'o'n qwaye' tkyaqilju' nojqelantoq toju' qb'eye'. 11Tb'ajlenxi'tzun oxe' xjaw, oxi'ye' tojun b'ark, matxitoq tzik'ju' jb'alil atzu'; jun b'ark tzajnitoq Alejandriy, toktoq kyilb'ilal dyos Kastor ex Poluks twitz. 12Opone' janche pona' b'ark Sirakusa, okyajten oxe' q'ije' atzu', 13xiqljo'ntl qb'eye' tzmax qpone' Rejyo. Te juntl q'ij tzaj kyq'iq' qi'je' toj tnayajkya'j, ex toj juntl q'ij yajxi'tl qpone' Poswoli, 14ja ekneta' jte' okslal qu'ne' ex oktxoke' tu'n qkyaj jun smane' kyuk'i'l; iktzu'n, b'ajsb'iltzun qpone' toj Rom. 15B'i'n qo'tltoqe' kyu'n okslal toj Rom; eb'je'tz k'lulqeye' tzmax Poro toj Apyo ex toj najb'il Oxe' Tenb'ilpun tb'i. Tetzunj kyok qka'yi'ne', q'on chjonte Pawl te Dyos ex tkuwsatib'. 16Tetzunj qpone' Rom, q'onjtz anb'il te Pawl tu'n tnajan toj juntl ja tjunal, naq o'kx xq'uqi'n tu'n jun xjal te q'oj. 17Tojtzun oxe' q'ij tponlen Pawl, xitma'n tu'n ktzaj txko'n nimaq kyoklen kxol aj Juda toj Rom. Tetzunj b'u'yi'ntoq kyib', xitma'n kye: —E'ntzik ex e'witz'in, mixti'we' matxi' nb'incha kyi'ju' qwnaqil aj Juda ex kyi'ju' kychaq'b'il ojtxi' qchman. Extzun nxiq'o'ne' toj kq'ob' aj Rom toj Jerusalen, 18woklenxi'tzune' toj xjel kyu'n, kyajb'iltoq tu'n wex ktzaqpi'ne', qu'n min elyal jun wile' kyu'n tu'nwt nkub' b'yo'ne'. 19Aye'tzu'n aj Juda min eq'ojin ex min kyaj tu'n ntzaqpete', nqani tzuntze' tu'n woke' toj xjel tu'nku' ninimaqkawil, expe' mixti'we' tu'n nb'ajsan kyi'ju' nwnaqile' toj nintaname'. 20Qu'mtzun ẍetzaja' ntxko'ne', tu'n kyok nka'yi'ne' ex tu'n nyoline' kyuk'i'le'; qu'n tu'n tpaju' ja q'uqla' qk'u'j ayo' aj Israelqo' tzyu'nqina'ye' toj xpatx'k'uxb'il tzalu, chi Pawl kye. 21Aye'tzunkye xikma'n te Pawl: —B'ajx tzaja' sma'n junqe' u'j tzmax Juda ti'ja, ex mixa'lo'xi' jun kxolju' qwnaqil aj Juda tzajniqe' atzu' ojewt tzul kma'n jun tqanil taq'wix ti'ja. 22Qajb'ile' tu'n qb'inteye' se'n t-xima, qu'n b'in qu'ne' toj tkyaqil plaj nche yolin xjal taq'wix ti'ju' ak'a'j okslab'l lu, chechij. 23Kyajtzun kma'n te Pawl alkye q'ij tu'n kyul, nimtzun xjal e'ul tk'etz Pawl jatoq ta'. Tzyet-x te prim ex ponb'aj te qale, yolin Pawl kye ti'ju' tkawb'il Dyos. Oktilil tu'n Pawl tu'n telkynik' ti'j Jesus, b'ajx tchik'b'a'n toj tkawb'il Moyses ex toj kyuj t-sanjelal Dyos. 24Ate' junjun kyokslaju' xitma'n Pawl kye, aye'tzun txqantl min kyoksla. 25Mixtoqtzun jun nmuje kyol kxolx, tzyet kb'jik' b'et. O'kxtzunte Pawl xitma'n kye: —Axte' tma Xewb'aj Xjan kye ojtxi' kyajilb'ene' toj ttzi Isayiy, tej tmante: 26Kutxi'ya ex q'manxa kye xjal lu: Maskye ma kb'iye' tu'nku' kẍkyine' lay kane toj kwitze'; maskye matz'ok kka'yi'ne', lay knet kyu'ne'. 27Ch'uẍxi'x kyanmi xjal lu, jpu'nqe' kẍkyin ex mtz'u'nqe' kwitz, tu'n lalun kyil ex tu'n lalun kb'i, ex tu'n lalun tz'el kynik' ti'j; tu'ntzun lalun tz'anjtz kyi'j wuk'i'le', ex lay che q'anet wu'ne', chij. 28Kyb'intztzune', kxe'l qex ja'lo, kxe'l q'et te' kolb'il tu'n Dyos lu kye mya aj Juda, oktzun b'el kb'i'nkye xjal lu, chi Pawl. 29Tej tb'aj tma'n Pawl ja'lu, eb'jik' b'etju' aj Juda, inxi'xtoq che yolin ti'j. 30Kab'e' ab'q'i kyejten Pawl toju' ja majina'ntoq tu'n, atzuntzu' nche tk'mo'na'toq kkyaqilju' nche pon ka'yilte. 31Mixtoqti' nxob' nxitma'n tkawb'il Dyos, intoq q'on xnaq'tzb'il ti'j Qajaw Jesukrist ex mixtoq alo'te nmyonte.

will be added

X\