Hechos 27

1Tej tkub' kxima'n tu'n qxikysma'ne' Italya, e'xiq'o'n Pawl exqe' txqantl jpu'nqe' toj tq'ob' jun nejenel Julyo tb'i, kynejel k'loj xjal te q'oj tok tb'i te Ninimaqkawil. 2O'okxtzuntze' tojun b'ark toj tnam Adramityo ttzi ninnjab', kxi'toq txi' jachaq nche pona' b'ark Asya. Ex ajuntoq Aristark quk'i'le', aj Tesalonik toq, jun nintnam toj Masedon. 3Tetzun juntl q'ij qpone' janche pona' b'ark Sidon, b'a'n tilwi Pawl tu'n Julyo atzu', xitq'o'n anb'il te tu'n txi' ka'yilkye tamiw ex tu'n tka'yinjtz kyu'n. 4Tetzunj qik'b'ete' Sidon, oxi'ye' toj b'ark ttziyile swejtx'otx' Chipre, qu'n intoq qomqonjtze' tu'n kq'iq'. 5Oxi'ye' ttziyile tx'otx' Silisya ex Panpilya, opone' toju' nintnam Mira toj Lisya. 6Knettzun jun b'ark atzu' tu'n nejenel, te tnam Alejandriy xi'toq txi' Italya, tchaq' tu'n qokxe' toju' b'ark lu tu'n t-xiqljo'n qb'eye'. 7B'a'npun q'ij ob'ete' chab'a, nim aq'untl ok tu'n qpone' toj tnam Knido. Tu'ntzu'n atixtoq kyq'iq' mqolqeye', oxi'ye' ttziyile Salmona, oq'onwelte' ti'ju' swejtx'otx' Kreta; 8peni b'eta' b'ark qjaq'e' ttziyile tx'otx', opone' tojun tenb'il Tb'anil Qokyex tb'i, nqayin tk'etz tnam Lasea. 9Matxitoq tz'ex txqan q'ij, ex xob'ajilxtoq tu'n qb'et toj ninnjab' qu'n matxitoq tzul lq'e jb'alil. Qu'mtzun xitq'o'n Pawl knab'l: 10Aye'ye' taye, xob'ajilxte' tu'n qb'et ja'lu, jaku' kub'o'lju' b'ark kyuk'i'lxi' iqtz, expe' jaku' qob'aj, chij. 11Atzunte knejel xjal te q'oj, a tyol tajaw b'ark ex tyol nejenel ti'j b'ark xitb'i'n ex mya tyol Pawl. 12Ex mya'toq b'a'n tu'n tex jb'alil qu'ne' atzu', kkyaqilx eq'mante tu'n qik'b'ete' atzu' ex tu'n qxi'ye' Penise, janche pona' b'ark toj Kreta tu'me'l tb'a'nq'ob'kya'j teokni ex tu'me'l tnayajkya'j teokni, tu'n texju' jb'alil qu'ne' atzu'. 13Tzajtzun ch'i'n kyq'iq' toj tnayajkya'j, toj knab'l qa b'a'n tu'n qb'ete' tu'n t-xiqljo'n qb'eye', oik'b'ete' ex oxi'ye' toj b'ark ttziyile tx'otx' Kreta. 14Yajxi'tzun ch'i'ntl tzaj jun kyq'iq' jb'al tu'me'l tb'a'nq'ob'kya'j te elni, ul jumj ti'ju' b'ark, 15ex xitiqa'n b'ark. Mixtzunti'x b'ent tb'et b'ark qu'ne' twitzju' kyq'iq', naq qyoktle' qxi' iqa'ne' tu'n. 16Oik'e' ti'j jun tal swejtx'otx' Kawda tb'i, jamyaxi'xtoq kuw kyq'iq', peni ejatza' kolb'il qu'ne' atzu'. 17Tjatzlentzun qiq'i'ne', e'ajb'en aqwil kuwsb'ilte b'ark. Kkyaqil intoq che xob' qa jaku'toq kyaju' b'ark Sirte janpona' tchmo'ntib' tz'awun, ku'tz kyiq'i'n xb'alun linb'ilte b'ark tu'n kyq'iq', ex xiktzaqpi'n tu'n txi' iqa'n tu'n kyq'iq'. 18Tojtzun juntl q'ij, kuwxtoqju' q'ankyaq, e'aq'witzuntz q'ilmixkye iqtz toj b'ark ex eb'ajku'x kxon toj ninnjab'; 19tojtzun toxi'n q'ij, ayo'ku'ye' oku'x xonkye nche ajb'entoq linb'ilte b'ark toj a'. 20B'a'npun q'ij min qile' q'ij eche'w, ex tu'nju' nin q'ankyaq nxi'xtoq juman, mixti'tl qmaye' qa qo kletele'. 21Tb'ajlenxi'tzun b'a'npun q'ij minqo wane', kub' we' Pawl kxol kkyaqil ex tma: —Aye'ye' taye, b'a'nwtlote' naqwit xikb'i'ne' nyole' ex miwtjun o'ik'b'et Kreta; miwtlojun xqo ik' toju' yajb'il ex yajte'n lu. 22Atzun ja'lo, kkuwsam kyib'e', mix-a'lo'te junkye' kkyimel, naq o'kx b'ark kb'ajel. 23Makub' tyek'u'ntib' jun anjl nwitze' toju' qonik'an may, chq'o'n tu'n Dyos ja q'uqla' nk'u'je' ex janchin ajb'ena'ye', 24ex matma weye' kjalu: Lalun xob'a, Pawl, qu'n ati tu'n tpona twitz ninimaqkawil aj Rom, ex naq tu'nela che tkla' Dyos kkyaqilju' ate' tuk'i'la toju' b'ark, chij. 25Qu'mtzun, ayeye' taye, kkuwsamkyib'e', qu'n q'uqliwe' nk'u'j ti'j Dyos ex toj nnab'le' ate kb'ajelju' kse'nx tma anjl weye'. 26Oktzun qopomel xon toj jun swejtx'otx', chi Pawl. 27Tetzunj tb'aj kab'e' sman, ato'toqe' tojun qonik'an toju' ninnjab' Adryatico tb'i, intoq qo iqinjeye' tu'n kyq'iq', tojku' tk'u'j aq'b'il, elkynik'ju' iq'ilte b'ark qa xi'toq qpone' ttzi tx'otx'. 28Ku'xkyecha'n t-xe a', tetoq junaq qaqlajoj (36) metr t-xe; tetzunj qxilq'e ch'i'ntle' kux kyecha'ntl, junaq wuq (27) metr t-xe. 29Tu'ntzu'n kxob'el tu'n tpaj jakutoq tz'ok tjuma'ntib' b'ark ti'j jun ab'j, ku'x kxon kyaje' tzuyb'ilte b'ark ttze'lti'j, ex intoq che kub'san te Dyos tu'n qsqix. 30Kyajb'iltoqtzu'n q'ilte b'ark tu'n kyetz oq toju' b'ark, tzyet kku'x kq'o'n kolb'il, ku'xwitloj nku'x kq'o'n tzuyb'ilte b'ark twitzxi'. 31Xi'tzun tma'n Pawl te knejel xjal te q'oj kjalu: —Qa min ẍekyajten xjal lu toju' b'ark, lay b'ent kklonte kyib'e', chij. 32B'je'ltzun ktx'e'mu'n xjal te q'oj kkyaq'ilju' kolb'il ex exitz'aq toju' a'. 33Tetzunj ttzaj t-xe kya'j, xitoqxena'n Pawl kye kkyaqil xjal tu'n kwan ch'i'n. Tma kye kjalu: —Mab'ajxi' kab'e' sman, naqx tu'n qlonte ti'toq kb'ajel qi'j, b'ajx txa' kwan junkye' kwa. 34Kyb'inchame' xtalb'il kwanx jun kwaye'. Ilxi'xti'j tu'n qwan, qa kyajb'ile' tu'n kyanq'ine', mix-a'lo'te jun knajel k'i'xpe'wt jun t-xya'mal twi', chi Pawl. 35Tej tb'aj tma'n Pawl ja'lu, jaw ttzyu'n jun wab'j ex xitq'o'n chjonte te Dyos kwitz kkyaqil. Xitaq'pu'n kxol ex aq'wi wal. 36Ex kkyaqil kkuwsakyib' ex ikx ewan. 37Oxlajnaq qaqlajoj (266) qb'aje' tu'n qkyaqile' toju' b'ark. 38Tb'ajlentzun qwane' tkyaqilju' qajb'ile', ku'x kxon iq'ilte b'ark triy toj ninnjab' tu'n t-sasjixju' b'ark. 39Tetzunj qel spik'e', min elkynik'ju' q'ilte b'ark alkye tx'otx' ta'qo'ye', kyiltzun jun tq'ob' a' nimtoq tz'awun atitoq ttzi; e'ok-il tu'n t-xikylaq'b'a'n b'ark atzu'. 40B'je'l kytaqk'u'n tzuyb'ilte b'ark ex b'ajx kyxon toj ninnjab', b'ajx kyko'pi'n xqutz'b'ilte b'ark. Ex jawkyq'o'n xb'alun twitz b'ark lmob'lte tu'n kyq'iq', xi'tzun b'et b'ark ttzi a'. 41O'kxtzun tpon takpuj toj txqan tz'awun, majx kyajxuqj twi' b'ark toj, mix yukcha'tl, atzu'n ttze'lti'j tzyet ktoqj tu'n tipumal ninnjab' nul tjuma'ntib' ti'j. 42Aye'tzu'n xjal te q'oj ekub'toq kb'yo'n xjal jpu'nqe' tu'ntoq lalun che kub' oq ajkyetz nche xnu'xin, 43Atzu'n nejenel min taj, qu'n tajb'iltoq tu'n tklonte Pawl, tchaq'tzun tu'n tetzpun kxon kyib'ju' b'a'n che xnu'xin toj a' tu'n kpon nejtl twitz tx'otx', 44aye'tzu'n txqantl tu'n kyetz lpe kyib'aj tz'lan mujqa kyib'aj ttx'anqi'n b'ark. Ikytzu'n o'elula'ye' twitz tx'otx' b'a'nqo'ye'.

will be added

X\