Hechos 26

1Xitzun tma'n Akrip te Pawl: —B'a'n tu'n tmanteya tkolb'il tib'a, chij. Jawtzun tiq'i'n Pawl tq'ob' ex aq'wi q'malte kjalu: 2Inchin tzalaje' tu'n mab'ent nyoline' twitza ja'lo, qman nimaqkawil Akrip, tu'n nklonte wib'e' te tkyaqilju' b'ajsab'l soktz kma'n aj Juda wi'je', 3tojtzqi'nxi'x nata nimaqkawil tkyaqil nkb'incha'n aj Juda exqe' ti'xti' nqo yolin kyi'j. Qu'mtzun nxi' nkub'sa'ne' teya tu'n tten tpasensiya b'il weye'. 4Kkyaqil aj Juda ojtzqilte se'n ẍin anq'ina'ye' kxol, toj ntaname' ex toj Jerusalen. 5Ex kanli kwitz ex b'a'n tu'n kmante qa kyajb'il, parisey qine' kukxju', a k'loj xjalju' kuwxi'x toju' qokslab'le'. 6Tu'npenatzu'n q'uqli nk'u'je' ti'ju' ttziya Qman Dyos kye ojtxi' qyajilb'ene' ẍintzaja' kyiq'i'ne' tu'n woke' toj xjel ja'lo. 7Nche ayonju' qtzik kab'lajoj tnej tyajajil Israel tu'n tjapunju' yol tziya'n lu, tu'ntzunju' nche k'ulun te Dyos ex nche ajb'en te q'ijtl ex qonik'an. Tu'nxtzun tpaju' nqo ayon ti'j lu nchin b'ajsanjtza'ye' kyu'n aj Juda ja'lo, aya nimaqkawil Akrip. 8¿Tiqu'ntzun min nkyoksla'ne' qa nche jaw anq'in kyimni tu'n Dyos? 9Ayinx junweju'ye' xima'ntoq wu'ne' nejtl tu'n nb'inchante txqan ti'xti'ye' ti'ju' tb'i Jesus aj Nasaret, 10axtzun nb'inchaju'ye' Jerusalen. Tu'nju' woklene' tzaj kq'o'n knejel pale, nim okslal eb'jo'kx njpu'ne'; ex b'a'n nela' toj nwitze' ajkykub' b'yo'n. 11Nim maj kub' ntz'e'ysa'ne' kwitz nche oknchq'o'ne' tu'n tel kyik'o'n kyokslab'l. Intoq nb'incha'ne' lu kyoj ja te k'u'lb'il, ex intoq chin q'ojine' kyi'j, nok nljo'ne' toj kq'ij tzmax kyoj najchaq nimaqtnam. 12Atoqtzun tb'is nk'u'ju'ye' tej nxi'ye' toju' nintnam Damask, q'o'n woklene' ex chq'o'nqine' kyu'n kynejel pale. 13Tojtzu'n b'e lu, nimaqkawil, wile' jun spik'un tzaj qoptz'aj toj kya'j te wanq'ij, spik'unxi'x kyetwitz q'ij, kub' spik'chaj qi'jileye' kyuk'i'lju' ate'toq wuk'i'le'. 14Qkyaqile' okub'tz'aqe' twitz tx'otx', ex nb'iye' jun tzaj yolin weye' toj eb'rey kjalu: Sawl, Sawl, ¿tiqu'n noktljo'na' toj nq'ije'? Axa nb'o'ljsante tib'a, naku'j wakx nxajun ti'j jun ch'ut tze, chij. 15Xinma'ntzuntze': ¿Alkyetzuna, Taye? nchije'. Tzajtzun ttzaq'we'n Qajaw weye': Ayine' Jesus, ayinju'ye' toka ljolte toj nq'ije'. 16We'ktztzuna, we'ku'ya, qu'n makub' nyek'u'n wib'e' teya tu'n tok nq'o'na te nmajine' ex tziyal wi'je' ti'ju' xtila ja'lo ex ti'ju' oktla'ya wi'je'. 17Knkla'ya kye aj Juda ex kyeju' mya aj Juda, aye' kxe'l nchq'o'na kxol ja'lo. 18Kxe'l nchq'o'na kxol tu'n tjqonteya kwitz ex tu'n lalun che b'etl toj qxopin, tu'n kb'et toj spik'un; tu'ntzun lalun che tentl tjaq' tipumal tajaw il, tu'n kyoklpe ti'j Dyos; ex tu'n kyokslan weye' ex tu'n tkub' najset kyil ex tu'n kk'monte kyetzb'il toju' tnam xjan te Dyos, chi Qajaw. 19Qu'mtzun xinb'i'ne' tzaj q'ma'n weye' toj yek'b'il te toj kya'j, nimaqkawil, 20tnejel xinma'ne' tpakb'al b'a'n kyeju' ate'toq Damask, ex xinma'ntle' kye aj Jerusalen ex kye toj tkyaqilju' tx'otx' Juda, ex kyeju' mya aj Juda, nche ntxko'ne' tu'n tanjtzti'j kyanmi ex tu'n tanjtzkyi'j tuk'i'l Dyos, ex tu'n kb'inchante b'a'n te yek'b'ilte qama che ch'exb'et. 21Tu'ntzun tpaju' ntzyeta'ye' toj tja Dyos kyu'n aj Juda ex nkub'toq kb'yo'ne'. 22Tu'ntzu'n tonb'il Dyos antinxe' ja'lo, kuwqine' nchin yoline' ti'j Dyos kye kkyaqil xjal, ch'i'n kyoklen ex nimaq kyoklen. O'kxweju'ye' nxinma'n aju' kma t-sanjelal Dyos ex tma Moyses, ex mixti' juntl: 23qa atitoq tu'n tkyim Krist, tkyimlenxi'tzun atoq tnejenel tu'n tjaw anq'in, ex oktoq xe'l tpakb'a'n t-spik'umal kolb'il te qtanam ex kye txqantl nimaqtnam, chi Pawl. 24Tetzunj kxitma'n Pawl ja'lu te kolb'ilte, jawt-ẍch'i'n Pest kjalu: —¡Matz'ok toj twi'ya, Pawl! Matxi' tz'ok toj twi'ya tu'n txqan t-xnaq'tzb'ila nimxi'x, chij. 25Atzunte Pawl xittzaq'we'n: —Min sokwe' tojnwi', qman Pest; tu'me'l penate' nxinma'ne' ex ax. 26Lu nimaqkawil Akrip nb'in, tojtzqi'n qexi'xju' ti'xti' lu, qu'mtzun mixti' nxob'ele' nchin yoline' twitz; qu'n toj nnab'le' kanlite' tkyaqil ja'lu twitz, myana' ewaj eb'aja'kye ti'xti' lu. 27¿Mantoksla'na kma t-sanjelal Dyos, qman nimaqkawil? Toj nnab'le' intoksla'na, chi Pawl. 28Xitzun ttzaq'we'n Akrip te: —¿Manaq jun kmujx tu'n woka'ye' okslal ti'j Krist tu'na? chij. 29Xi'tzun tma'n Pawl te: —Qa tojun kmujx mujqa yajxi'tl, naqwit tb'incha Dyos, myanaq o'kxa qman nimaqkawil, kkyaqil witju' nche b'inweye' ja'lo tu'n kyok kse'nwe', mya kyuk'i'l xpatx'k'uxb'il lu, chi Pawl. 30Jawtzun we' nimaqkawil, exju' kawil, junx kyuk'i'l B'erenise ex kkyaqilju' q'uqlqe'toq atzu', 31exi'tzuntz toj jun plajtl yolil ti'ju' lu. Intoq kma'n: —Mixti'te ichan til na'j tu'nwt tkub' b'yet; mixpeti'te' tu'n tjpet, chechij. 32Tmatzun Akrip te Pest: —B'a'n tu'n t-xitzaqpette' ichan lu, naqwit min tqani tu'n tok toj xjel tu'nku' ninimaqkawil, chij.

will be added

X\