Hechos 25

1Oktzun Pest toj toklen te kawil, tojtzun toxi'n q'ij toklen, tzaj Sesarey ex pon Jerusalen. 2Atzuntzu' xa'kq'o'n knejel pale exqe' aj Juda nimxi'x kyoklen jun b'ajsa'n ti'j Pawl te. 3Xikqani'n jun xtalb'il nimxi'x toklen te, tu'n tmante tu'n ttzaj q'i'n Pawl toj Jerusalen. Atoq kximju' tu'n tb'ant tkub' kb'yo'n Pawl toj b'e; 4atzunte Pest xittzaq'we'n kye qa axtzu' tu'n ttena'te Pawl toj kars Sesarey, ex intoq t-xima'n tu'n txi' Sesarey toj jte' q'ijtl. 5Xitma'n kye kjalu: —Qu'mtzun ati tu'n kxi' tzyul kawb'il kxole' wuk'i'le' Sesarey, atzuntzu' b'a'n kb'ajsana' ti'ju' ichan lu qa ati til, chij. 6Ten wajxaq mo lajoj q'ijtl Pest Jerusalen, anjtzun ti'jtz Sesarey. Tetzun juntl q'ij kub' qe toj toklen toj kawb'il ex tchaq' tu'n ttzaj q'i'n Pawl twitz. 7Tetzunj tokpun Pawl, eb'jo'k lq'e aj Juda tzajniqe'toq Jerusalen ex okx kb'ajsa'n tu'n txqan til kuwxi'x, extzun mixti'x jun b'ent kyek'unte. 8Atzunte Pawl, xitma'n kolb'iltib' kjalu: —Mixti' junwe' il matxi'wt nb'incha, ti'j kkawb'il aj Juda, mo ti'j tja Dyos mo ti'ju' ninimaqkawil aj Rom, chij. 9Atzunte Pest tajb'iltoq tu'n tkyaj b'a'n kyuk'i'l aj Juda, xitqani'n te Pawl: —¿Ma b'a'n tu'n txi'ya Jerusalen, tu'ntzun nka'yinteye' ttena atzu'? chij. 10Atzunte Pawl xittzaq'we'n kjalu: —Twitz tkawb'il ninimaqkawil aj Rom ta'qinwe', ex axtzu' tu'n woka'ye' toj xjel. Kanlina' twitza, mixti' junwe' il matxi'wt nb'incha kyi'j aj Juda. 11Qa ati junwe' wil matxi' nb'incha qa ati tu'n nkub'yo'ne' tu'n tpaj, lay kub'nxk'a'yu'n wib'e', qatzun mya axte' ẍeb'ajsana' wi'je', mix-a'lo'te ati toklen tu'n nxitq'o'ne' toj kq'ob'. Awe' kxe'l nqani'n tu'n woke' toj xjel tu'nku' ninimaqkawil, chij. 12Xjeluntzun Pest kyeju' q'ol tnab'l, tmatzuntz: —Mana' tqaniya tu'n toka toj xjel tu'n ninimaqkawil, twitz ninimaqkawil kxe'la'ya, chij. 13Tb'ajlenxi'tzun jte' q'ij, exi' nimaqkawil Akrip ex B'erenise Sesarey q'olb'elte Pest. 14B'a'npuntzun q'ij e'ten atzu', xitma'n Pest tten Pawl te nimaqkawil. Tma kjalu: —Ati jun ichan kyajni tjpu'n Peliks tzalu. 15Ex tej ntene' Jerusalen, eb'ajsan knejel pale exqe' tijwnaq kxol aj Juda ti'j nwitze', kqani tu'n tkub' nq'o'ne' tz'e'ysb'il twitz. 16Xinma'ne' kye qa min nb'inchet toj kkawb'il aj Rom tu'n tkub' q'et tz'e'ysb'il twitz jun xjal tu'n tkub'yet qa na'mtoq txiq'et anb'il teju' nb'ajsanjtz tu'n tklontetib'. 17Qu'mtzun min xinq'o'n toje tej kyul tzalu, te juntl q'ij nkub' qeye' toju' kawb'il ex xinma'ne' tu'n ttzaj q'i'n ichan. 18Aye'tzu'n eb'ju'l b'ajsal ti'j min kma junju' til ntoq chin ximane' tu'n kb'jo'ktz kma'n. 19O'kxte kmaju' qa ati til toju' kyokslab'l, ex ti'j jun ichan Jesus tb'i oje kyim, ex intma'n Pawl qa itz'. 20Mixna ti'we' b'i'n wu'n titi' kb'inchetel ti'ju' lu, xinqani'ne' te Pawl qa tajb'il tu'n txi' Jerusalen tu'n tok toj xjel kyi'ju' lu. 21Atzunte tqani tu'n tok toj xjel tu'n qman ninimaqkawil, nchaq'tzuntze' tu'n tkyaj jpet tzmax ajtb'ent txi' nsma'ne' te ninimaqkawil, chi Pest. 22Xi'tzun tma'n Akrip te Pest: —Ex wajb'ilwe' tu'n nb'inteye' tyol ichan lu, chij. —Najchi'j tb'iya—chi Pest xittzaq'we'n. 23Tetzun juntl q'ij e'pon Akrip tuk'i'l B'erenise ex e'okx tojun kmuj nim toklen toju' mqo'n, junx kyuk'i'l knejel xjal te q'oj exqe' nimaq kyoklen toju' nintnam. Xitma'n Pest tu'n ttzaj iq'i'n Pawl, 24ex tma: —Nimaqkawil Akrip exqe'ye' ta ate'ye' quk'i'le' ja'lo tzalu: luju' ichan lu. Kkyaqil aj Juda e'oktz b'ajsante nwitze', toj Jerusalen ex toj Sesarey tzalu, ex inxi'x jaw kẍch'i'n tu'n tkub' b'yet; 25atzunwe' toj nwitz mixti'te matxi' tb'incha tu'nwt tkub' b'yet. Axna' qaninte tu'n tok toj xjel tu'nku' ninimaqkawil, kub' nxima'ne' tu'n txinsma'ne' atzu'. 26Tu'n tpajtzu'n mixti'xi'x titi' kxel ntz'ib'a'ne' ti'j te ninimaqkawil, matzaj wiq'i'ne' kwitze', expe' twitza aya nimaqkawil Akrip, tu'ntzun txi ntz'ib'a'ne' jun til te ninimaqkawil tb'ajlenxi' kxjelu'ne' te. 27Naku'j mixya tu'me'l tu'n txi' nsma'ne' jun xjal jpu'n extzun mixti' kxe'l ntz'ib'a'ne' titi' xb'ajsanjtza', chij.

will be added

X\