Hechos 24

1Tb'ajlenxi'tzun jwe' q'ij pon Ananiy, knejel pale, kyuk'i'l jte' tijwnaq ex jun yolil Tertulo tb'i, toj Sesarey. Epon b'ajsalte Pawl twitzju' kawil. 2Tetzunj tpon q'i'n Pawl, Tzyet tb'ajsan Tertulo te Peliks kjalu: —Chjonte teya, qman kawil, b'a'n to'qo'ye' tu'na, ex tu'nju' tnab'la b'a'n kawina, nim matxi' b'inchet b'a'n toju' ninqtaname'. 3Tkyaqilju' tonb'ila, aya qman Peliks, in qk'mo'ne' tuk'i'l aq'b'il chjonte kukxju' toj tkyaqil plaj. 4Tu'ntzun lalun tz'elqiq'i'nxi'xtle' anb'il teya, kxe'l nkub'sa'ne' teya tu'n qkub' tb'i'n jun kmoja. 5Matz'elyalju' ichan lu qu'ne' tok q'ol xitb'il qxole', ex tok q'ol pa'jtib'il kxol aj Juda toj tkyaqil twitz tx'otx', ex knejel jun k'loj xjal aj nasaren. 6Expe' tajb'iltoq tu'n tkub' ttxa'ju'n tja Dyos, tu'ntzunju' tzyeta' qu'ne'. Qajb'iltoqe' tu'n tok toj ttxolil kawb'il kse'nx qkawb'ile', 7naqtzun aju' chaq'ul Lisyas elq'inte toj qq'ob'e' ex tma tu'n qule' b'ajsalte twitza. 8Ex aya k'elel tnik'a ti'j ajtok toj xjel tu'na ti'ju' til nokx qma'ne' teya, chij. 9Exqe' aj Juda ate'toq ax xikma'nju'. 10Tzajtzun tyek'u'n kawil tq'ob' te Pawl tu'n tyolin, ex tma Pawl kjalu: —B'a'natzun, kxe'l nma'ne' nkolb'il wib'e' twitza, qu'n kanli nwitze' matxi' b'et ab'q'i aya ajkawil toju' nintnam lu. 11B'a'n tu'n t-xjelunteya tu'n tb'inteya qa ax nxinma'ne', mab'ent kab'lajoj q'ij npone' Jerusalen k'ulul te Dyos. 12Min nelyale' kyu'n inwt chin wulje' kyuk'i'l junjun, ex min e'jaw tilj xjal wu'ne' toju' tja Dyos, mo kyoj ja te k'u'lb'il, exwit toj juntl plaj toju' nintnam. 13Layxna' b'ent kyek'untekye' xjal lu qa ati wile' tu'nju' nchi noktz kb'ajsa'ne' twitza. 14Atzunwe' kxe'l nma'n teya, qa nchin ajb'ene' te Dyos ja e'ajb'ena' ojtxi' qchmane', kse'nxju' Ak'a'j B'e nok kq'o'n te chukjni tnab'l, qu'n inwoksla'ne' tkyaqilju' ntma'n kyoj tu'jil kawb'il ex kyuj t-sanjelal Dyos. 15Ex axweju'ye' q'uqla' nk'u'j ti'j Dyos kse'nxkye, qa che jawil anq'in kyimni, eb'a'n kten ex myab'a'n kten. 16Qu'mtzun noktilil wu'ne' tu'n ntene' b'a'n toj wanmiye' twitz Qman Dyos ex kwitz xjal. 17Tb'ajlenxi' jte' ab'q'i nchin b'ete' kyoj txqantl tnam, nnule' toju' ntaname' q'ol kotzb'aj ex q'ol oyaj. 18Atoqtzun nb'incha'nju'ye', matxitoq nẍtilsa wib'e' kse'nx ntma'n toj chaq'b'il, mixti'toq te txqan xjal wuk'i'le' ex mixti'qekye xjal inwt che jaw tilj wu'ne' tej wel yale' toj tja Dyos kyu'n jte' aj Juda tzajniqe'toq toju' tnej tx'otx' Asya. 19Aye'tzunkye ati tu'n kyulju' b'ajsal weye' twitza qati jun wile' kye. 20Qatzun mikxa'ju', tu'n kmanteju' ẍe ul b'ajsal weye' lu qa nelyale' toj wile' kyu'n tej ntene' twitzju' K'loj Tzyul Kawb'il kxol aj Juda. 21O'kxna' weju'ye' jaw nma'n kuw tej atinqintoqe' kxol kjalu: Machinokye' toj xjel kyu'ne' tu'n tpaj nwoksla'ne' qa che jawil anq'intl kyimni, nchije', chi Pawl. 22Tetzunj tb'inte Peliks ja'lu, b'i'ntltoqna' Ak'a'j B'e tu'n b'a'nxi'x, kyej tq'o'n tu'n tyoletti'j ja'lu yajxi'tl ex tma: —Knb'i'xi'xtle' nb'aj lu kxole' ajtul Lisya ju' chaq'ul, chij. 23Ex tchaq' Peliks te nejenel tu'n tjpetl Pawl, naq o'kx tu'n tq'onte ch'i'n tzaqpib'l te ex tu'n tq'onte anb'il tu'n kpon tamiw ka'yilte. 24Tojtzun jte'q'ijtl yajxi'tl pon jumajtl Peliks, k'le'n Drusila tu'n, ju' t-xu'jil, aj Juda toq. Ex tchaq' Peliks tu'n ttzaj txko'n Pawl, ex kub' tb'i'nju' ntoq xitma'n Pawl te ti'ju' okslab'l ti'j Jesukrist. 25Tetzunj tyolin Pawl te ti'ju' chwinqlal toj ttzinunal, ti'ju' tu'n qjk'unte qib' ti'ju' myab'a'n, exju' tz'e'ysb'il witzb'aj tzul tu'n Dyos, jawxob' Peliks ex tma: —Kutxi'ya ja'lo. Ktzajel ntxko'ntla ajttentl anb'il wi'je', chij. 26Ex tajb'iltoq Peliks tu'n txitq'o'n Pawl pwaq te; qu'mtzun b'a'npun maj intoq ttxko'n tu'n tyolin tuk'i'l. 27B'aj kab'e' ab'q'i tu'n iku'na'j; o'kxtzun tel Peliks te kawil, atl Porsyo Pest ok te t-xel. Tu'ntzunju' tajb'iltoq Peliks tu'n tkyaj b'a'n kyuk'i'l aj Juda, kyej tjpu'n Pawl.

will be added

X\