Hechos 23

1Xi'tzun ka'yin Pawl kyeju' K'loj Tzyul Kawb'il ex xitma'n kye: —E'ntzik ex e'witz'in, na'n wu'ne' toj wanmiye' nchin anq'ine' b'a'n twitz Dyos ntzajlenxe' ojtxi' ex ikx ja'lo, chij. 2Xi'tzun tma'n Ananiy, knejel pale, kyeju' ate'toq tk'etz Pawl tu'n tok ktz'aju'n ttzi Pawl. 3Atzunte Pawl xittzaq'we'n te kjalu: —¡A Dyos k'okyel tz'ajunteya, xmletz'! Qa q'uqliya na'tz tu'n t-xjeluna weye' se'nx ntma'n kawb'il, ¿tiqu'ntzun ntma'na tu'n wok b'yo'ne' ex mikxa' atiju' toj kawb'il? chij. 4Aye'tzu'n ate'toq, kma te Pawl: —¿Tiqu'n nwulinaya te knejel tpale Dyos? chechij. 5Xi'tzun tma'n Pawl kye: —E'ntzik ex e'witz'in, min b'i'n wu'ne' qa knejel pale ja'lu; ina' tma'nte' toj Tu'jil kjalu: Lalun tz'ok twuli'na nkawin toj ttanama, chij. 6Tetzunj tlonte Pawl ate'toq junjun sadusey ex junjuntl parisey kxolju' K'loj Tzyul Kawb'il, jawtma'n kuw kjalu: —E'ntzik ex e'witz'in, parisey qinwe', tk'wal parisey qine'; ex nchin okye' toj xjel tu'nju' nchin ayone' tu'n kjaw anq'in kyimni, chi Pawl. 7Naqtzun nxitma'n Pawl ja'lu, e'aq'wi parisey wuljel kyuk'i'l sadusey kxolx, ex kub' aq'puju' b'uyjtib'il. 8Qu'n intoq kma'n sadusey qa lay che jaw anq'in kyimni, exqa mixti' qe'kye' anjl ex xewb'aj; aye'tzunkye' parisey intoq che kyoksla'n ja'lu. 9Kkyaqil intoq che ẍch'in; aye'tzun junjun xnaq'tzal kawb'il, kyuk'i'l pariseyqe', e'jawe' ex kma: —Mixti'te jun myab'a'n ma'wt tb'inchaju' ichan lu; qajlo mayolin jun xewb'aj mujqa jun anjl te, chechij. 10Xi'toqtzun tjawxi'xtl twitzju' wuljtib'il, xob'ju' chaq'ul, kub' t-xima'n qaj nkub'ku' kpẍu'n xjal Pawl, xitma'ntzuntz tu'n ktzaj txko'n jte' xjal te q'oj tu'n telkyiq'i'n Pawl atzu' ex tu'n t-xikyiq'i'ntl toj kja xjal te q'oj. 11Kub' tyek'u'ntib' Qajaw twitz Pawl tojuntl qonik'an ex tma te: Kuwsam tk'u'ja Pawl, qu'n kse'n xtziyana wi'je' tzalu toj Jerusalen, ex ktziyala wi'je' toj Rom, chij. 12Tojtzun juntl q'ij, b'entti'j kyu'n jte' aj Juda tu'n tkub'yet Pawl, ex kytziya jun kyol qa lay che wan ex lay che k'wan tzmaxi'j ajtkyim Pawl kyu'n, ex xikyqani'n tu'n ttzaj taq'wix kyib'aj qa min xjapun kyu'n. 13Iky' tib'aj kab'naq ichan etziyante tu'n tjapun ikju'lu kyu'n. 14Exi'tzuntz kk'etzju' knejel pale ex kk'etzju' tijwnaq kxol aj Juda, xikma'n kye: —Matxi' qtziyaqe' tu'n ttzaj taq'wix qib'aje' qa min xjapun qu'ne' tu'n lay qo wane' tzmaxi'j ajtkub' qb'yo'ne' Pawl. 15Aye'tzunkye' kyuk'i'lju' kyuk'i'le' toju' K'loj Tzyul Kawb'il kqaninxe' teju' chaq'ul tu'n ttzaj tiq'i'n najchi'j kwitze', ku'xwitloj chab'a tu'n tjyet ttenju' til; lwiyxi'xtzun qo xe'le' b'yolte na'mxtoq tpon kwitze', chechij. 16Tb'itzun tal tanab' Pawl kxim xjal lu, xi'tzuntz q'malte te Pawl toju' kja xjal te q'oj. 17Tzaj ttxko'n Pawl jun nejenel ex xitma'n te: —Q'inxa q'a lu tk'etzju' chaq'ul, qu'n ati jun tqanil kxe'l tma'n te, chij. 18Xi'tzun q'i'n tu'n nejenel twitzju' chaq'ul, xitma'n te: —Ma chinx ttxko'ne' Pawl jpu'n ex matzaj tma'n weye' tu'n ttzaj wiq'i'ne' q'a lu tzalu, ati jun tqanil tu'n teya, chij. 19Xi'tzun ttzyu'n chaq'ul tq'ob'ju' q'a, xitiq'i'n tojun plaj ex xitqani'n te: —¿Ti'tzu'n tajb'ila tu'n ttzaj tma'na weye'? chij. 20Xitma'n q'a te kjalu: —Mab'entti'j kyu'n aj Juda tu'n kyul qanilte teya tu'n txi' tiq'i'na Pawl twitz K'loj Tzyul Kawb'il najchi'j te prim, naku'xwitloj kyajb'il chab'a tu'n tjyetxi'x ttenju' til. 21Lalun che'x toksla'na, masinch'i'n kab'naq kxjal nche ayon toj ewaj, ex maktziya tu'n ttzaj taq'wix kyib'aj qa min xjapun kyu'n tu'n lay che wan ex lay che k'wan tzmaxi'j ajtkub' kb'yo'n Pawl; ex naq nche ayon ja'lo tu'n txitq'o'na tzaq'web'l kye, chij. 22Etztzun tchq'o'n chaq'ul ju'q'a, xitma'n te tu'n lalun txi' tyoli'n qa matxitoq pon tma'n tqanil lu. 23E'tzajtzun ttxko'n chaq'ul kab'e' tnejenel ex tchaq' kye tu'n kb'aj knk'u'n lajnaq xjal te q'oj tu'n kqan, atzun oxnaq lajoj ti'j chej ex lajnaq tuk'i'l kych'ut, tu'n kxi' Sesarey ajttzaj b'eljoj te qonik'an. 24Expe' xitma'n tu'n knk'unte qe' chej tu'n tjaw Pawl kyi'j, ex tchaq' tu'n tpon kyiq'i'n b'a'n twitz Peliks ju' kawil. 25Ex xit-sma'n jun u'j kyuk'i'l ntma'n kjalu: 26Ayine' Klawdyo Lisyas, nxi' ntz'ib'a'ne' teya, qman kawil, Peliks: nxi' nq'olb'e'na. 27Ojetoq tzyetju' ichan lu kyu'n aj Juda ex xi'toq tkub' kb'yo'n, tetzunj nb'inteye' qa aj Rom ttanamil, nxi'ye' kyuk'i'l nxjale' ex nkole'. 28Wajb'iltoqtzune' tu'n nb'inteye' titi' nkpoqo'na', xiwiq'i'ne' twitz K'loj Tzyul Kawb'il kxol aj Juda, 29intoq kpoqo'n tu'n tpaj jun til se'nxju' kkawb'il; myatoqtzun tu'me'l tu'n tkub'yet, mixpeti'x tu'n tokx jpet. 30Tu'ntzu'n manb'iye' qa ati kxim aj Juda tu'n tkub' kb'yo'n, matxi' nsma'ne' teya; ex matxi' nma'ne' kyeju' nche poqonte tu'n tkub' knk'u'n twitza titi' til kye, chiju' xittz'ib'a'n. 31Aye'tzu'n xjal te q'oj, kse'nxju' chaq'b'il xiq'o'n kye, xikyiq'i'n Pawl te qonik'an tzmax Antipatris. 32Tetzun juntl q'ij anjtzkyi'ju' xjal te q'oj tu'n kqan toju' kja, aye'tzu'n iqa'nqe' kyu'n chej xikljo'n kb'e tuk'i'l Pawl. 33Tetzunj kpon Sesarey, xikq'o'n u'j te kawil ex xikyek'u'n Pawl twitz. 34Tb'ajlentzun t-ẍch'i'n u'j, xitqani'n kawil tejatoq Pawl; tetzunj tb'inte qa aj Silisya, 35xitma'n te: —Kb'el nb'i'na ajkyulju' nche poqonteya, chij. Tchaq'tzuntz tu'n t-xq'uqinjtz toju' tja Erodes te kawb'il.

will be added

X\