Hechos 21

1Tetzunj qik'b'ete' kk'etz, o'tzaje' toj b'ark ex opone' Kos, te juntl q'ij opone' Rodas, ex o'tzajtle' opone' Patara. 2Knettzun jun b'ark qu'ne' iktoq ttzaj Penisya, o'tzajtzuntze' toj. 3Qile' swejtx'otx' Chipre tej qik'e', kyej toj qnayaje', qlaj qb'eye' tu'n qpone' Sirya. Atitoqtzun tu'n tkyaj tiqatz b'ark toj tnam Tiro, o'okxe' atzu'. 4E'knetju' okslal qu'ne', ex okyajten wuq q'ije' kyuk'i'l. Q'ma'ntltoqtzun kye tu'n Xewb'aj Xjan, xikma'n te Pawl tu'n laluntoq txi' Jerusalen. 5Atzun tb'aju' wuq q'ij, o'ik'b'ete'. Kkyaqil eb'ajtzaj kyuk'i'lxi' kxu'jil ekk'wal wab'alqeye' tzmax ttxa'n nintnam, okub' mejetzuntze' ttzi ninnjab' ex ona'n Dyose'. 6E'kyaj qq'olb'e'ntzuntze' ex o'okxe' toj b'ark, ex anjkyi'j kja. 7B'ajtzun qb'etze' tib'aj ninnjab' tej qule' Tolemayda, eb'aj qq'olb'e'ne' okslal atzu' ex o'kyajten jun q'ije' kyuk'i'l. 8Te juntl q'ij o'ik'b'ete' ex opone' Sesarey. Opone' tja Pelip ju' q'mal tpakb'al b'a'n, aj kyuk'i'lju' wuq onilkye apostl, ex okyaje' tuk'i'l. 9Ate'toq kyaje' tmyal Pelip na'mxtoq kmje, t-sanjelal Dyos qe'toq. 10Ma'toqtzun b'et q'ij ato'taqe' atzu', tej tpon jun t-sanjelal Dyos tzajni toj tx'otx' Juda, Akab'o tb'i. 11Tej tpon Akab'o qk'etze', eltiq'i'n k'alb'il tk'u'j Pawl, eb'ajtk'lo'n tq'ob' etqan toj, ex tma: —Intma'n Xewb'aj Xjan qa ik kb'ajel k'lo'na' tajaw k'alb'il ja'lu kjalu toj Jerusalen kyu'n aj Juda, ex kxe'l kq'o'n toj kq'ob' najchaq xjal, chij. 12Tetzunj qb'inteye', okub'sane' kyuk'i'l aj Sesarey twitz Pawl tu'n laluntoq txi' Jerusalen. 13Atzunte Pawl tzaj ttzaq'we'n qeye' kjalu: —¿Tiqu'n nche oq'a'ye' ex ntzaj nb'ise' kyu'ne'? Matxina' waq'we' wib', mya o'kx tu'n nb'aj k'lo'ne', ex ikx tu'n nkub' b'yo'ne' Jerusalen naq tu'nel Qajaw Jesus. 14Mixnati'x oxitb'i'ne', xiqtzaqpi'ne' tu'n txi', xiqma'ne' te: —B'ent-xwit tajb'il Qman Dyos, qo chije'. 15Tb'ajlenxi'tzun ja'lu, qb'incha qib'e' ex oxi'ye' Jerusalen. 16Exi' junjun okslal quk'i'le', oxi' kyiq'i'ne' tja jun ichan aj Chipre Mnason tb'i, matxitoq b'et q'ij okslatltel ex atoqtzu' tu'n qkyaja'ye' tja. 17Tej qpone' Jerusalen, o'k'amliye' toj tzalajb'il kyu'n okslal. 18Tetzun juntl q'ij oxi'ye' tuk'i'l Pawl xb'etzalte Jakob', ex ate'toq kkyaqilju' tijwnaq atzu'. 19Eb'aj tq'olb'e'n Pawl ex b'ajx tma'nju' ti'xti' matxitoq tb'incha Dyos tu'nel kxol aj Juda kye toj ttxolil. 20Tetzunj kb'inte, jawkyajwali'n Dyos. Xikma'n te Pawl kjalu: —Qtzik mo qitz'in, kanxtzuna nimte' matxi' che okslan kxol aj Juda, ex kykyaqil nche q'mante qa ilxi'xti'j tu'n txi' qljo'n tkawb'il Moyses. 21Ex matxi' kyb'i qa nxit-xnaq'tza'na kye kykyaqil aj Juda najlqe' kyoj najchaq tnam tu'n tel kypa'n kyib' ti'ju' tkawb'il Moyses, ex nxitma'na kye tu'n lalun tz'ok kyechel kyk'wal ti'j kychib'jil ex tu'n lalun txi' kljo'nju' nqb'incha'n. 22¿Ti' kxe'l qb'incha'n? Oklo kb'i' xjal qa matxi' tzula. 23Ate b'a'nju' b'inchama kxe'l qma'ne' teya: Ate' kyaje' ichan qxole' ati tu'n tjapun jun kyol. 24Q'inqe'xa tuk'i'la, ẍtilsam tib'a kyuk'i'l ex chjoma chojb'ilte tu'n tjoyet t-xya'mal kwi'. K'okyeltzun kka'yi'n xjaltz kkyaqil qa mya axju' matxi' q'manjtz ti'ja, qu'n expe' nxitb'incha'n ntma'n kawb'il. 25Aye'tzu'n mya aj Juda matxi' che okslan, oje txi' qtz'ib'a'nju' b'entti'j qu'n kye kjalu: tu'n lalun txi' kych'yo'n chib'j kub'ni q'o'n kwitz witzleb', mo chik', mo tchib'jil alu'mj kub'ni tjtz'o'ntib', ex tu'n lalun kb'incha ajpaji'n. 26Exi'tzun tiq'i'n Pawl kyaje' ichan, tetzun juntl q'ij t-ẍtilsatib' junx kyuk'i'l; okxtzuntz toj tja Dyos q'malte jtoj b'aj tq'ijlalil tu'n tjapunju' kyol tziya'n, aju' ajtkub' tq'o'n toyaj junjunkye. 27Xi'toqtzu'n tb'aju' wuq q'ij, ilwi Pawl toj tja Dyos kyu'n junjun aj Juda tzajniqe'toq Asya ex e'jaw tilj xjal kyu'n, e'oktzaqpaj ti'j Pawl, 28intoq che ẍch'in kjalu: ¡Aj Israel, qo kyonime'! Ate ichan ja'lu nb'et toj tkyaqil plaj xnaq'tzalkye xjal ex nyolin myab'a'n ti'j qtanam, ti'j tkawb'il Moyses ex ti'ju' tja Dyos. Expe' matxi' che okxtiq'i'n junjun aj Kryek toju' tja Dyos, ex matxi' kuttxa'ju'n tenb'il lu, chechij. 29Kma ikju', qu'n ojetoq tz'ok kka'yi'n intoq b'et Tropimo aj Epeso tuk'i'l Pawl toju' nintnam, chechilo qa matxitoq tz'okx tk'le'n Pawl toj tja Dyos. 30Kkyaqil xjal toju' nintnam eb'jaw tilj, ojqel kb'aj ponju' xjal. Tzyet Pawl kyu'n ex exkjwo'n ti'jxi' tja Dyos, ex lwiyxi'x e'kyaj kjpu'n tjpel. 31Xi'toq tkub' kb'yo'n, tej tpon tqanil teju' chaq'ul kye xjal aj Rom te q'oj qa matxitoq che b'jaw tilju' kkyaqil xjal toj nintnam Jerusalen. 32Eb'aj tb'uyi'n chaq'ul t-xjal te q'oj exqe' ajb'el te, xi'tzuntz ojqel jate'qetoqu' xjal. Tetzunj klonte chaq'ul kyuk'i'l xjal te q'oj, min e'oktentl b'yolte Pawl. 33Pontzun lq'e chaq'ul, xitiq'i'n Pawl toj kars ex tchaq' tu'n tkub' xmo'n toj xpatx'k'uxb'il. Yajxi'tzuntl xitqani'n alkyetoq ex titi' matxitoq tb'incha. 34Junjuntzun xjal njaw kẍch'i'n jun ti'xti' ex txqantl njaw kẍch'i'n juntl ti'xti', mixti'x b'ent tchik'e tu'n chaq'ul tu'n tpaj nche ẍch'in; tchaq'tzuntz tu'n txi' iq'i'n toj kja xjal te q'oj. 35Tetzunj kjax toju' peta'n, lwiyxi'x jawx tnu'n Pawl kyu'n xjal te q'oj, tu'n tpaj nimtoq ktx'u'jil xjal ti'j; 36qu'n kkyaqil lepchqe'xtoq ti'j, intoq jaw kẍch'i'n kjalu: ¡Tu'n tkyim! chechij. 37Tetzunj xi'toq tik'x q'o'n toj kja xjal te q'oj, xitqani'n Pawl teju' chaq'ul: —¿Ma b'a'n tu'n nyolin jun kmuje' tuk'i'la? chij. Xi'tzun ttzaq'we'n chaq'ul te kjalu: ¿Manb'ent tyolina toj kryek? 38¿Ma myatzunju'ya aj Ejipt mab'et q'ij tzyet tjawti'ntib' ex e'tzaj kyuk'i'l lajk'al q'ojil toj chq'ajlaj? chij. 39Xitma'n Pawl te kjalu: —Aj Juda qinwe', aj Tarso toj Silisya, ax ntanamilju'ye' ktanamil xjal nim kyoklen; naq a b'inchama xtalb'il, q'oma anb'il tu'n nyoline' kyeju' xjal, chij. 40Xi'tzun q'o'n anb'il te tu'n chaq'ul, kub'tzun we' Pawl kyoju' peta'n ex xityek'u'n tq'ob' kye xjal tu'n kkub' nak'e xjal. Tetzunj kkub' nak'e, xiyolin kye toj eb'rey, tma:

will be added

X\