Hechos 2

1Tej tpon kanun tq'ij Kab'naqlajoj q'ij tik'lenxi' tq'ij Tzaqpib'l, kykyaqil ate'toq junx. 2Naqx minab'en ttzaj jun tq'ojq'ojel toj kya'j, kse'n jun kyq'iq' kuw, majx q'ajti tkyaqilju' ja jatoq ta'qe'. 3Ex okkyka'yi'n nakuj q'aq' b'ajx txoli'n kye, ex kub'ten junjun tib'ajile junjunkye. 4Ex kykyaqil eb'aj noj tu'n Xewb'aj Xjan, e'aq'witzuntz yolil kyoj junxi'tl yol, kse'nxju' ntq'o'n Xewb'aj xjan tu'n kyyolinte. 5Najliqe'toqtzun aj Juda toj Jerusalen, ju' njapun kyokslab'l kyu'n, tzajniqe'toq toj tkyaqil plaj twitz tx'otx'. 6B'aj kyb'u'yi'n kyib'ju' xjal tej kyb'inte tq'ojq'ojil, ex mixtoqti'x nkane toj kywitz, qu'n teyile junjun intoq tb'i'nju' nkyma'n xnaq'tzb'en tojku'xi'x tyol. 7Inxi'xtoq che lab'ti ex nche xob', intoq kyma'n: —¿Ma myatzun aj Kaliley qe' lu kykyaqil nche yolin? 8¿Tiqu'ntzun nche qb'i'n nche yolin tojku' qyol? 9Ate'kye xjal tzalu aj Partya, aj Medya, aj Elam, aj Mesopotam, aj Juda, aj Kapadosya, aj Ponto exqe' toj tx'otx' Asya, 10aj Prijya ex Panpilia, aj Ejipt ex kyoj tx'otx' Lib'ya nqayin tk'etz Sirene. Ex ate' xjal aj Rom najlqe' tzalu; 11junjun aj Judaqe' kyitz'jlenx, aye'tzun txqantl oje che ok toj kyokslab'l aj Juda. Ex ate' tzajniqe' Kreta ex Arab'ya. ¡Ex inche qb'i'n nche yolin tojileku' qyol ti'ju' tipumal Dyos! chechij. 12Kykyaqil eb'ajlab'ti ex mixtoqti'x nkane toj kywitz; intoq che xjelun kyxolx kjalu: —¿Ti'tzunlo tz'elpuna' tkyaqil ja'lu? chechij. 13Aye'tzun junjuntl, e'xmayin, intoq kyma'n: —¡Tx'ojtenil qenakye' lu! chechij. 14Kub'tzun we' Luch kyuk'i'lju' junlajojtl (11) apostl, ex jawtma'n kuw kjalu: E' aj Juda ex kykyaqile' najlqe'ye' toj Jerusalen, tz'elku' kynik'e' ti'ju' lu ex kyb'intze' kxe'l nma'ne' kyeye'. 15Min nche tx'ujti kye'lu kse'n nkyxima'ne', tzmapena' b'eljoj kmuj te prim ja'lo. 16A penate' nb'aj ja'lu, in japunju' tma Joel t-sanjelal Dyos, tej tmante kjalu: 17Chi Dyos kjalu: toj b'ajsb'il q'ij, ktzajel nq'o'ne' Nxewe' kyib'aj kykyaqil xjal; kb'ajxe'l kyma'n tk'wala ex tmyala tpakb'alil aku'ju' nyole', ktzajel ye'k'u'n ti'xti' kyeju' ku'xun kyxole', ex k'okyel kywitzik'ju' tijwnaq. 18Ex ktzajel nq'o'ne' Nxewe' kyoju' q'ij lu kyib'aju' nmajine' ichan ex qya, ex aku'ju' nyole' kxe'l kypakb'a'n. 19Che kxe'l nye'k'u'ne' nimaq ti'xti' twitz kya'j, e' chik', q'aq' ex tmujil sib' twitz tx'otx'. 20Kb'el qxopinixju' q'ij, exju' xjaw kjawil b'ent te chik', na'mxtoq tulkanun tu'n tulju' Qajaw, a q'iju' nim toklen ex tb'anilxi'x. 21Kykyaqiltzu'n nche na'n tb'i Dyos, che kletel, chiju' tz'ib'a'n. 22Kyb'inkutzune' kxe'l nma'ne' aj Israel: Kanlixi'xna' kywitze', tyek'u Dyos toklen Jesus aj Nasaret kwitzku'ye', nim ti'xti' te lab'te'n eb'aj b'ent tu'n, eb'a'nq'ob'aj ex e'techlal. 23Xiq'o'n ichan lu toj kyq'ob'e', kse'nx t-xim ex tb'is tk'u'j Qman Dyos, kub' kyb'yo'ne', jaw kyq'o'ne' twitz krus kyxol xjal b'inchal myab'a'n. 24Jawtzun anq'in tu'n Dyos, tkol teju' tipumal kamik, qu'n mixti'x tu'n tkub'ti'j tu'n tipumal kamik. 25Yolin Dab'i nimaqkawil ti'j Jesus, tma kjalu: Intoq nka'yine' Qajaw kukxju' nejli nwitze'; mix-a'lo' k'ik'el lmun weye', qu'n ati toj nb'a'nq'ob'e'. 26Qu'mtzun nchin tzalaje' toj wanmiye', ex nchin b'itzane' tu'n ntziye' toj tzalajb'il. Q'uqlokxi'x tk'u'j ti'j, 27qu'n lay chin kyej tq'o'na toj muqb'il ex lay taja tu'n tkub' tzuwix t-xmilalju' tmajina xjan. 28Tzaj tyek'u'na tb'eyil chwinqlal weye', ex okxi'x chin tzalajele' tu'nju' atiya, chij. 29E'ntzik ex e'witz'in, majx kxe'l nma'ne' kyeye', kyim nate' ojtxi' qchman Dab'i ex ku'x mqu'n, ex majx kyej tenju' muqb'ilte. 30T-sanjelal Dyos nate' Dab'i, ex b'i'ntoq tu'n qa ojetoq ttziya Dyos qa k'okyeltoq tq'o'n jun kyxolju' tyajajil te nimaqkawil. 31Ikytzu'n nakuj oktka'yi'n Dab'i nejtl qa kjawil anq'in Krist, yolin Dab'i ti'j ja'lu, tma qa laytoq kyejten Krist toj muqb'il ex laytoq tzuwix t-xmilal. 32Ja'lotzun, ax Jesusju' xjaw anq'in tu'n Dyos, ex qkyaqil kanli qwitz. 33Tjawlenxi'tzun nima'n ex tkub'lenxi' tq'o'n Dyos toj tb'a'nq'ob', ex t-xilen tq'o'n Qman Dyos Xewb'aj Xjan tziya'ntltoq tu'n te, matzaj tqo'n qib'aje' ja'lo. Atzunte xkyilju'ye' ja'lo ex makyb'iye'. 34Qu'n myate Dab'i xjax toj kya'j; qu'n axpena' q'mante kjalu: Xitma'n Qman Dyos te wajawe': Qeku'ya toj nb'a'nq'ob'e', 35tzmax ajkykub' nq'o'ne' tajq'oja tjaq' tqana, chij. 36Kyb'imtzune' kykyaqile' aj Israel, axxi'x, axte' Jesus jaw kq'o'ne' twitz krus, matxi' tz'oktq'o'n Dyos te Qajaw ex Krist, chi Luch b'aj tma'n. 37Tetzunj kyb'inteju' b'u'yi'ntoq kyib' ja'lu, tzaj kyb'is ex eb'jaw lab'ti, ex xikyqani'n te Luch ex kye txqantl apostl, kjalu: —E'qtzik ex qitz'in, ¿Ti'tzun qb'incha'ye' ja'lo? chechij. 38Xittzaq'we'n Luch kye kjalu: —Kutanjtz kyi'je' tuk'i'l Dyos ex tjaw a' kywi'ye' teyile junjun toj tb'i Jesukrist, tu'n tkub' tnajsa'n Dyos kyile', oktzun tzajel tq'o'n Xewb'aj Xjan kyeye'. 39Qu'n kyeye' tziyana'tl tu'n Dyos lu ex kye kyk'wale', ex kye kykyaqilju' ate' najchaq; kye kykyaqilju' mache ttxok Qman Dyos. 40Kyu'ntzu'n lu ex txqantl yol, yolin Luch kye ex xitq'o'n kynab'l, tma: —¡Kypa'mil kyib'e' kyi'ju' xjal pi'sqe' lu! chij. 41Aye'tzun ek'monteju' b'ajx tma'n kye, jaw a' kywi'; ex e'oklo wuqk'al lajnaq (3,000) kyuk'i'lju' ojetoq che okslan toju' q'ij lu. 42Ex intoq che ten toju' xnaq'tzb'il nkq'o'n apostl, intoq kub' kyaq'pu'nju' ati kye kyxol, ex intoq kyb'u'yi'n kyib' tu'n tkub' kyaq'pu'n wab'j tu'n kywan junx ex tu'n kyna'n Dyos. 43Kykyaqil tzaj xob'el kyi'j tu'nju' nim b'a'nq'ob'aj ex techlal intoq tb'incha'n Dyos kyxolju' apostl. 44Kykyaqilju' okslal atitoq mujb'ab'l kyxol ex intoq kub' kyaq'pu'nju' ati kye kyxol; 45intoq xikyk'a'yi'n ktx'otx' ex tkyaqilju' atitoq kye, ex intoq kub' kyaq'pu'n pwaq kse'nx nojqelan teyile junjun. 46Intoq kyb'u'yi'n kyib' tkyaqil q'ij toj tja Dyos, ex intoq kub' kyaq'pu'n wab'j ex nche wan junx kyoj ja tuk'i'l tzalajb'il ex me's kyanmi. 47Intoq kyajwali'n Dyos ex b'a'n e'ela' toj kywitz kykyaqil xjal; ex intoq chmet-xi'xtl kyb'aju' nche klet atl junjun q'ij tu'n Qman Dyos.

will be added

X\