Hechos 18

1Tb'ajlenxi'tzun ja'lu, ik'b'et Pawl toj Atenas ex xi' toj Korint. 2Oktzun yal jun aj Juda twitz atzu', Akyila tb'i, aj Pont. Tzqeyintoq kyetzlen Akyila tuk'i'l Prisila ju' t-xu'jil toj Italya, qu'n ojetoq tchaq' ninimaqkawil Klawdyo tu'n kb'je'tz kkyaqil aj Juda toj Rom. Xi' Pawl xb'etzalkye 3axtoqtzun taq'un Pawl se'nkye, intoq che b'inchan xb'alun te pach, kyejten kk'etz tu'n kyaq'unan junx. 4Ex atl junjun q'ij te ojlab'l intoq xi' Pawl toj ja te k'u'lb'il, intoq xitma'n tyol Dyos tu'n tkane toj kwitz aj Juda exqe' mya aj Juda. 5Tetzunj kpon Silas ex Timotey tzajniqe'toq Masedonya, majxtzun okten Pawl pakb'alte tyol Dyos ex nxitma'n kye aj Juda qa ate Jesus Krist. 6Aye'tzunkye e'okten q'ojil ti'j Pawl ex e'okten ililte; eltzun tchto'n Pawl ti'j t-xb'alun te yek'b'il qa myab'a'n nkb'incha'n, ex xitma'n: —A'ye'xkye' ti'j kpaj qama che'xe' toj naje'n; mya npajwe'. Ja'lo ma chinxwe' q'malte tyol Dyos kye mya aj Juda, chij. 7Etztzuntz toju' ja te k'u'lb'il ex xi' tja jun ichan Tisyo Just tb'i, nk'ulun te Dyos ex najli ttxlaju' ja te k'u'lb'il. 8Ex okslan Krispo te Qajaw, nejenel toju' ja te k'u'lb'il, kyuk'i'l kkyaqilju' toj tja. Ex nim aj Korint e'okslan tej kb'inte tyol Dyos, ex b'jaw a' kwi'. 9Tojtzun jun qonik'an tzaj tma'n Qman Dyos te Pawl toj witzik' kjalu: Lalun xob'a; ljonxa tu'n tpakb'ana ex lalun kub' numeya. 10Intina'we' tuk'i'la ex mix-a'lo'te kb'antel tb'inchante jun taq'wix ti'ja, nimwe' ntanam ati toju' nintnam lu, chij. 11Kyejtzun ten Pawl jun ab'q'i tk'i' nik'jan toj Korint, intoq xit-xnaq'tza'n tyol Dyos kye xjal. 12Tojtzu'n tq'ijlalil atoq Kalyon kawil toj Akaya, jaw kb'u'yi'nkyib' aj Juda ti'j Pawl; xikyiq'i'n twitz kawb'il 13ex kma teju' kawil kjalu: —Tokju' ichan lu q'olte knab'l xjal tu'n kk'ulun te Dyos tojun tu'me'l mya junx tuk'i'lu' kawb'il, chechij. 14Xi'toqtzun ttzyet tyolin Pawl, tej txitma'n Kalyon kye aj Juda kjalu: —Naqwit jun nimaq il xtb'inchaju' xjal lu, jaku'wtlo chin kub' tene' b'ilte kyole' aye'ye' aj Juda; 15atzunte' lu naq jun yol, jun b'iyj ex jun yol ti'ju' kkawb'ile', knk'unku'ye' kxolxe', qu'n min wajb'ile' tu'n tok nq'o'n wib'e' kyoju' ti'xti' lu, chij. 16Eb'je'tz tiq'i'ntzuntz toj tja kawb'il. 17Tzajtzun ktzyu'n Sostenes, ju' nejenel toju' ja te k'u'lb'il, ex b'aj kb'yo'n axtzu' twitz tja kawb'il, atzunte Kalyon mixti'xte ximan ti'j. 18Kyajxtentl Pawl nimtoj Korint. Yajxi'tzuntl e'kyaj tq'olb'e'n okslal, xi'tzuntz toj b'ark junx kyuk'i'l Prisila ex Akyila tu'n kxi' toju' tx'otx' Sirya. Ate'xtoqtzun Senkrea, na'mxtoq kyokx toj b'ark, eltjon Pawl twi' tu'n tjapun jun yol ttziya. 19Tetzunj kpon Epeso, eltpa'ntib' Pawl kyi'j Prisila ex Akyila, xi'tzuntz toju' ja te k'u'lb'il, yolin kyuk'i'l aj Juda ntoq kb'u'yi'n kyib' atzu'. 20Ekub'san twitz tu'ntoq tkyajtentl kyuk'i'l, atzunte min taj, 21e'kyaj tq'olb'e'n ex tma kye: Qa tajb'il Dyos, chin ul jumajtle' xb'etzalkyeye', chij. Ik'tzun b'et Pawl toj Epeso ex xi' toj b'ark. 22Tetzunj tpon Sesarey, xi' q'olb'elkye okslal toj Jerusalen, anjtzun ti'jtz Antyokyiy. 23Tb'ajlenxi'tzun jte' q'ij, xi' jumajtl Pawl xb'et-sal jachaq ta'qe' okslal tojile junjun tnam kyoj tx'otx' Kalasya ex Prijya, intoq che tkuwsa'n kykyaqilju' okslal. 24Pontzun jun aj Juda toj Epeso, Apolo tb'i, aj Alejandriy toq. Kyexi'xtoq yolin ex tojtzqi'nxi'x Tu'jil tyol Dyos. 25Xnaq'tza'ntoq tib' ti'ju' xnaq'tzb'il tu'n Qajaw, txoli'nxi'xtoq yolin, intoq q'on xnaq'tzb'il, inxi'x tchik'b'a'n ti'j Jesus, o'kxtoqpe' tojtzq'i'nju' jawsb'il a' tu'n Xwan. 26Okten Apolo yolil kwitz xjal toju' ja te k'u'lb'il; tetzunj kb'inte Prisila ex Akyila, xikyiq'i'n toj jun plajtl ex xikchik'b'a'nxi'xju' t-xnaq'tzb'il Dyos te. 27Tetzunj tajb'iltoq Apolo tu'n tik'x toj tx'otx' Akaya, xi' o'ni'n kyu'n okslal, ex xiktz'ib'a'n jun u'j kye okslal atzu' tu'n kk'monte b'a'n. Tetzunj tpon Akaya, ojexi'x onin kyi'ju' ojetoq che okslan tu'n t-xtalb'il Qman Dyos, 28inxi'xtoq xitma'n toj tu'me'l chik'lixi'x kye aj Juda kwitz kkyaqil, nxityek'u'n toj Tu'jil ex nxitchik'b'a'n qa ate Jesus Krist.

will be added

X\