Hechos 17

1Eb'jik'x Pawl ex Silas toj Anpipolis ex toj Apolonya, e'pontzuntz Tesalonik, ja ta'toq jun ja te kk'u'lb'il aj Juda. 2Kse'nxtzu'n ntb'incha'n Pawl, oktljo'n oxe' sman tu'n txi' toju' ja te k'u'lb'il toj q'ij te ojlab'l. 3Intoq xitchik'b'a'n qa atitoq tu'n tkyim Krist ex tu'n tjaw anq'intl yajxi'tl. Intoq xitma'n kye: —Axju' Jesus nxinma'ne' kyeye', ate Kristju', chij. 4E'okslan junjun aj Juda, ex kmujb'akyib' kyuk'i'l Pawl ex Silas. Ex nim mya aj Juda e'okslan intoq che k'ulun te Dyos, ex nim qya ati kyoklen. 5Exky'aqlintzu'n aj Juda min e'okslan tu'n tpaju' lu, ex eb'aj kb'u'yi'n junjun xjal b'inchal myab'a'n naqtoq nche b'et tu'n kjaw tilju' xjal toju' nintnam kyu'n. Expe' e'oktzaqpaj ti'j tja Jason, intoq che jyon kyi'j Pawl ex Silas tu'n kyetz kyiq'i'n ex tu'n kxikq'o'n toj kq'ob'u' xjal; 6mixtzunti' e'knet kyu'n atzu', exi' kjwo'n Jason kyuk'i'l junjuntl okslal kwitzju' tzyul kawb'il toju' nintnam, intoq jaw kẍch'i'n kjalu: —¡Matxi' che oktenju' ichan lu txalpulkye kkyaqil xjal toj tkyaqil twitz tx'otx', ex matxi' che ul tzalu, 7ex e'kub' tk'mo'n Jason tja! ¡Kykyaqilx nche ik' tib'aj tkawb'il ninimaqkawil, nkma'n qa ati juntl nimaqkawil, aju' Jesus! chechij. 8Tetzunj tb'aj kma'n ja'lu, eb'jaw tilju' xjal kyuk'i'l tzyul kawb'il. 9Atzunte Jason kyuk'i'lju' eb'ajxtzyu'n tuk'i'l xikq'o'n pwaq tzuyb'ilkye, eb'je'tz tzaqpi'ntzuntz. 10Lwiyxi'xtzun exichq'o'n Pawl ex Silas kyu'n okslal tzmax B'erea. Tetzunj kpon atzu', exi' toju' ja te kk'u'lb'il aj Juda. 11B'a'n xjal qexi'xtoqju' aj Juda lu kyekwitzju' aj Tesalonik, intoq kk'mo'n tpakb'al b'a'n tu'n tkyaqil kk'u'j, ex intoq che kub'kxnaq'tza'n Tu'jil tu'n telkynik' qa ax ntoq xiq'ma'n kye. 12Nim e'okslan kxol, ex nim mya aj Juda e'okslan, eqya ati kyoklen ex ichan. 13Tetzunj kb'inte aj Juda aj Tesalonik qa intoq tpakb'a'n Pawl tyol Dyos toj B'erea, e'pon atzu' ex e'aq'wi xitulkye xjal tu'n kb'jaw tilj. 14Aye'tzu'n okslal oktilil kyu'n tu'n tex Pawl lwiyxi'x tu'me'l mlaj, aye'tzu'n Silas ex Timotey e'kyajten B'erea. 15Aye'tzu'n exi' wab'alte Pawl e'pon tuk'i'l tzmax toj nintnam Atenas. Ex b'ajx tma'n Pawl kye tej tanjkyi'j tu'n kpon Silas ex Timotey lwiy tk'etz. 16Tetzunj intoq ayon Pawl kye Silas ex Timotey toj Atenas, tzaj tb'is tej tka'yinte nim txqan witzleb' toju' nintnam. 17Tu'ntzunju' okten yolil ti'j kyuk'i'l aj Juda toju' ja te k'u'lb'il ex kyuk'i'l txqantl nche k'ulun te Dyos, ex ikx tkyaqil q'ij nyolin ti'j kyuk'i'l xjal jankb'u'yina' kyib'. 18Ex ikxqe' junjun jyol ojtzqib'l, aye' ljolte kxnaq'tzb'il epikureo exqe' ljolte kxnaq'tzb'il estoyk, e'okten wulil tuk'i'l Pawl. Junjun ntoq kma'n: —¿Titi'xi'xtzu'n ntma'n la'j xjal lu? chechij. Junjuntl ntoq kma'n: —Naku'j jun q'ol tqanilte' kyi'j kydyos najchaq xjal te'lu, chechij. Intoq kma'n ikju' qu'n intoq xitma'n Pawl tpakb'al b'a'n kye ti'j Jesus ex ti'ju' tjaw anq'in. 19Xi'tzun kk'le'n Pawl kyuk'i'l twi' witz Areopako, kwitz k'loj nejenel, ex xikqani'n te: —¿Ma b'a'n tu'n qb'inteye' titi'xi'xju' ak'a'j xnaq'tzb'il saj tiq'i'na qeye'? 20Junxi'tl tb'injtzju' intma'na qeye', ex qajb'ile' tu'n qb'inteye' titi' tz'elpuna', chechij. 21Qu'n kkyaqil aj Atenas exqe' najchaq xjal najlqe' atzu', o'kxtzu' toka' kwi' tu'n kb'inte ak'a'j tqanil ex tu'n kyolin ti'j. 22Kub'tzun we' Pawl kxol toj Aryopako ex xitma'n kye kjalu: Aye'ye' aj Atenas, toj tkyaqilju' matxi' tz'ok nka'yine', inxi'x che nimane' kye kydyose'. 23Tej ẍe oknka'yine' janche k'uluna'ye', matz'okyal jun q'olb'eb'l wu'ne' tz'ib'anqe'k yol ti'j kjalu: Te jun Dyos min ojtzqi'n, chij. Atzunju' Dyos nche k'ulune' te ex min ojtzqi'n kyu'ne', atzun weju'ye' ẍinul q'malte kyeye'. 24Aju' Dyos b'inchante tx'otx' ex tkyaqilju' ati toj, ate tajaw kya'j ex tajaw tx'otx'. Min najli kyoj ja b'incha'n kyu'n xjal, 25ex minojqelan kyajb'eb'l xjal te, qu'n ate ntzaj q'onte qchwinqlal, qxew ex tkyaqil ti'xti' qe te qkyaqil. 26Naq ti'j jun ichan saja' tq'o'n kyajajil xjal kyoj kkyaqil nimaqtnam toj tkyaqil twitz tx'otx'; ex kyajni tq'o'n tq'ijlalil tu'n kyanq'in ex ja che najala', 27tu'n kjyonte Dyos, ex tu'n tel yal kyu'n, nya'pena' najchaq ta'te Dyos tk'etz junjunqe. 28Qu'n tu'n Dyos nqo anq'ina', nqo yukchi ex itz'qo'; kse'n kma junjun tz'ib'al tb'anilxim kxole': Ti'j Dyos tzajna' qyajil, chechij. 29Tu'ntzu'n ti'j Dyos tzajna'qo', lalun kub' qxima'n qa ik Dyos kse'nqe' tilb'ilal q'anpwaq, saqpwaq mo ab'jqe' b'incha'n kyu'n xjal kse'nxju' kxim. 30Min ntzajtna'ntl Dyosju' matxi' kyej, tu'n tpaj min b'i'ntoq kyu'n xjal, atzu'n ja'lo intq'o'n chaq'b'il kye kykyaqil toj tkyaqil plaj, tu'n tanjtzkyi'j tk'etz Dyos. 31Qu'n oje kub' tq'o'n Dyos jun tq'ijlalil tu'n kyok kkyaqil xjal toj xjel tu'n tojxi'x tnik'alti'j, tu'nel jun ichan oje jaw t-sko'n; ex taq' jun yek'b'il ti'j tej tjaw anq'in tu'n, chi Pawl kye. 32Tetzunj kb'inteju' tjaw anq'in kxol kyimni, junjun exmayin, aye'tzun junjuntl kma: —Kqb'i'tl ja'lu teya tojumajtl, chechij. 33Ik'tzun b'et Pawl kk'etz. 34E'ik'tzun lpe junjun ti'j ex e'okslan. Atoq jun Dyonisyo, jun kxolju' k'loj nejenel, ex jun qya Damaris tb'i, ex txqantl.

will be added

X\