Hechos 16

1Pontzun Pawl Derb'e ex Listra, ja okyala' jun okslal twitz, Timotey tb'i, tal jun qya okslal aj Juda, tk'wal jun ichan aj kryek. 2B'a'ntoq che yolin okslal aj Listra ex aj Ikonyo ti'j. 3Tajb'iltoq Pawl tu'n txi' Timotey tuk'i'l, na'mtoqtzun txi', oktq'o'n techel ti'j tchib'jil tu'n lalun tzaj ktx'u'jil aj Juda najlqe'toq kyoju' najb'il lu, kkyaqil toqna' b'ilte qa mya aj Juda tman Timotey. 4Xikma'n kxnaq'tzb'ilju' apostl exqe' tijwnaq kxol okslal toj Jerusalen kye okslal kyojile kkyaqilju' tnam jatoq nche ik'a'. 5Iktzu'n intoq ten kyipumalju' okslal toj kyokslab'l, ex intoq chmet kb'aj junjun q'ij. 6Mixtzunti' taj Xewb'aj Xjan tu'n t-xikma'n tpakb'al b'a'n toj tx'otx' Asya, eb'jik'x toj tx'otx' Prijya ex Kalasya, 7ex e'pon ttzi nqach te Misya. Kub'tzun kxima'n tu'n kyokx toju' tx'otx' B'itinya, ex mixti' taju' T-xew Jesus. 8Majxtzun e'ik'x toj Misya, eku'x ttzi ninnjab' Troade. 9Atzuntzu' oka' jun nakuj witzik' te Pawl te qonik'an; oktka'yi'n jun ichan aj Masedonya, wa'ltoq nkub'san te kjalu: Kutik'tza Masedonya ex qotoniya, chij. 10Naqxtzun tej tk'monte Pawl witzik' lu, qb'incha qib'e' tu'n qxi'ye' Masedonya, q'uqli qk'u'je' qa a Dyos ntoq txkonqeye' tu'n qxi'ye' q'malte tpakb'al b'a'n atzu'. 11O'okxtzuntze' toj b'ark Troade, majx oxi'ye' toju' swejtx'otx' Samotrasya, tojtzun juntl q'ij opone' Neapolis. 12Oxi'tzuntze' Pilipo, juntoq tnam tzyu'n tu'n Rom ex jun nintnam nim toklen toj Masedonya. Oten jte' q'ije' atzu'. 13Tojtzun sab't qexe' ti'jxi' nintnam, ttzi nin a', jaxima'ntoq qu'ne' qa ati janche na'na' Dyos aj Juda. Okub' qeye' ex o'aq'wiye' q'malte tpakb'al b'a'n kyeju' qya matxitoq b'aj kb'uyi'n kyib'. 14Lidya tb'iju' jun; aj Tyatira ex intoq k'ayin tb'anil xb'alun kyeq twi' wi'yal. Na'l Dyos toqju' qya lu, intoq b'in ti'ju' tyol Dyos, jqet tanmi tu'n Dyos tu'n tkub' tb'i'nxi'xju' nxitma'n Pawl. 15Jawtzun a' twi' kyuk'i'lxi' toj tja, kub'santzuntz qeye' kjalu: —Qa okslal qinxi'xe' ti'j Qajaw toj kwitze', kukyaj tene' njaye', chij. Ilxi'xtoqti'j tu'n, tu'n qkyaje' tja. 16Atzun jumaj, xi'toq qxi'ye' ja noka' na'j Dyos, elyal jun txin qwitze' tzyu'ntoq tu'n jun xewb'aj tu'n tpon tnab'l. Lq'o'n majintoq, nimtoq pwaq nkykanb'a'n tajaw tu'nju' npon tnab'l kyi'j ti'xti'. 17Intoq oklpeju' txin lu ti'j Pawl ex qi'je', intoq jawt-ẍch'i'n: —¡Ajb'el qekye' ichan lu te Qman Dyos nim toklen, ex nxikma'n tb'eyil kolb'ilkyeye'! chij. 18B'a'npun q'ij tb'inchaju' txin lu ikju', tzmax myatoq tajb'itl Pawl, anjtzun ka'yin Pawl ti'j, ex xitma'n teju' Xewb'aj tzyulte kjalu: —Toj tb'i Jesukrist, kxe'l nma'ne' teya tzaqpinkja txin lu, chij. Textzu'n kmoj lu kyej tzaqpi'n tu'n xewb'aj. 19Tetzunj kyka'yinte tajawju' txin min nche kanb'antl pwaq tu'nju' minpontl tnab'l kyi'j ti'xti', etzyet Pawl ex Silas kyu'n ex exi' kyiq'i'n kwitz tzyul kawb'il, jata'qe'xi' nim xjal. 20E'okx kyek'u'n kwitz ajkawil ex xikma'n: —Ate'qe'ku' aj Juda lu q'ol xitb'il toju' ninqtaname', 21ex inkq'o'n xnaq'tzb'il ti'ju' nkb'incha'nju' lay b'ent qk'monteye' ex lay b'ent qb'inchanteye', qu'n aj Rom qo'ye', chechij. 22Ejawtzun tilju' xjal kyi'j Pawl, ex kychaq'u' ajkawil tu'n tb'je'l q'i'n kyi'j ex tu'n kb'aj juma'n tu'n tq'ob' tze. 23Kyb'ajlenxi'tzun kjuma'n nimxi'x, e'okx kq'o'n toj kars, ex kychaq' teju' xq'uqil kars tu'n kxi tka'yi'n b'a'nxi'x. 24Tetzunj tk'monte xq'uqil chaq'b'il lu, e'okxtq'o'n tzmax t-xexi' kars ex e'kyaj t-xmo'n kqan toju' tze. 25Tetzunj intoq che na'n Dyos Pawl ex Silas te qonik'an ex intoq che b'itzan te Dyos, ex intoq che b'in txqan xjal jpu'nqe', 26naqx mixnab'en ttzaj jun kyajnajnab' kuw majx yukchi tq'uqlil kars tu'n. Textzu'n kmuj eb'aj jaqli kykyaqil tjpel kars, ex b'je'l pujli xpatx'k'uxb'il kyi'j kkyaqilju' jpu'nqe'. 27Tetzunj tka'yinte xq'uqil kars jqo'miletl qekye' tjpel, jawtiq'i'n tk'uẍtx'e'nb'il tu'ntoq tkub' tb'yo'ntib', qu'n chilo qa matxitoq che b'ajx oqu' jpu'nqe'. 28Atzunte Pawl xit-ẍch'i'n te kjalu: —¡Lalun tk'ixb'sa tib'a, luqo'qe' ato'ye' qkyaqile' tzalu!, chij. 29Xi'tzun tqani'n xq'uqil kars jun kantil, ojqel tokx toju' kars, intoq lu'lun tu'n xob'el, kub' meje kwitz Pawl ex Silas. 30Eb'je'tz tiq'i'ntzuntz ex xitqani'n kye: —Taye, ¿Titi' tu'n nb'inchanteye' tu'n nklete'? chij. 31Xi'tzun ktzaq'we'n te kjalu: —Tz'okslana te Qajaw Jesus, kkleteltzuntza, aya exqe' toj tjaya, chechij. 32Xi'tzun kma'n tpakb'al b'a'n ti'j Qajaw te ex kyeju' ate'toq tja. 33Textzu'n kmuj lu te qonik'an, b'aj ttxjo'n xq'uqil kars kk'ixb'lenju' apostl, jawtzun a'tz kwi' kyuk'i'lxi' toj tja. 34Exitiq'i'ntzuntz tja ex xitq'o'n kwa, inxi'xtoq che tzalaj kyuk'i'lju' toj tja tu'nju' e'okslan te Dyos. 35Tetzun prim, e'pon kychq'o'n ajkawil junjun xq'uqil q'olteju' chaq'b'il teju' xq'uqil kars tu'n kxi' ttzaqpi'n Pawl ex Silas. 36Xi'tzun tma'n xq'uqil kars te Pawl kjalu: —Ma kychaq'u' ajkawil tu'n kxintzaqpi'ne'; b'a'n tu'n kxi'ye' ja'lo toj tzalajb'il, chij. 37Atzunte Pawl xitma'n kyeju' xq'uqil kjalu: —Ayo'ye' aj Rom qo'ye', maqob'aj jiku'ne' kywitz xjal na'mxtoq qokye' toj xjel, ex maqo okx jpu'ne'; ¿tzun ja'lo, makyajb'il tu'n qxi' kytzaqpi'ne' toj ewaj? ¡Lay! Aye'ku'kye tu'n kyul q'ilmix qeye', chij. 38Exi'tzu'n xq'uqil q'malte kye ajkawil, aye'tzu'n ajkawil eb'aj sak'puj tej kb'inte qa aj Romqe'. 39Epontzun ajkawil qanil najsb'il kwitz Pawl ex Silas ex eb'je'tz kyiq'i'n toj kars, ex xikkub'sa'n kye tu'n kyetz ti'jxi' nintnam. 40Kyetzlenxi'tzun toj kars, exi' Pawl ex Silas tja Lidya, kb'ajlenxi'tzun kka'yi'n okslal ex eb'aj kkuwsa'n, e'ik'b'et atzu'.

will be added

X\