Hechos 15

1Ate'toqtzun junjun tzajniqe'toq Juda ex e'pon Antyokyiy toju' tq'ijlalil lu, e'okten xnaq'tzalkye okslal qa laytoq b'ant kklet qa min sok kyechel ti'j kychib'jil kse'n ntma'n tkawb'il Moyses. 2Ok jun yol kuw kyuk'i'l kyu'n Pawl ex B'ernab'e, b'anttzunti'j kyu'n okslal atzu' tu'n kxi' kychq'o'n Pawl ex B'ernab'e kyuk'i'l jte'tl, tu'n kb'ajx Jerusalen yolil kyi'ju' lu kyuk'i'l apostl exqe' tijwnaq toju' nintnam lu. 3Exi'tzun chq'o'n kyu'n okslal toj Antyokyiy, tej kyik' kyoj tx'otx' Penisya ex Samarya, b'ajx kma'n se'n matxitoq kyaja' kq'o'n xjal mya aj Juda ojtxi' kyokslab'l tu'n kxilpe ti'j Dyos. Ex kkyaqilju' okslal ojexi'x e'jaw tzalaj tu'nju' tqanil lu. 4Tetzunj kpon Pawl ex B'ernab'e Jerusalen, ek'monjtz kyu'n okslal, e'apostl ex kyu'n tijwnaq, ex b'ajx ktx'olb'a'n tkyaqilju' matxitoq tb'incha Dyos kye. 5Ate'toqtzun junjun parisey ojetoq che okslan, ejawe' ex kma kjalu: —Ilxi'xti'j tu'n tok kyechelju' mya aj Judaqe' ti'j kychib'jil, ex tu'n t-xiq'met kye tu'n kb'inchante tkawb'il Moyses, chechij. 6B'ajtzun kb'u'yi'n kyib'ju' apostl kyuk'i'l tijwnaq tu'n kyolinxi'x ti'ju' lu. 7Kyb'ajlenxi'tzun yolin nim tib'aj, jawe' Luch ex tma kjalu: —E'ntzik ex witz'in, kanli kwitze' mab'et-xi' q'ij njaw t-sk'o'ne' Qman Dyos kxole' q'malteju' tpakb'al b'a'n kyeju' mya aj Judaqe', tu'n kyokslan te Qajaw. 8Ex tyek'u Dyos, ojtzqilte kyanmi xjal, qa etk'am, qu'n tzaj tq'o'n Xewb'aj Xjan kye kse'nxqe. 9Junelnite' qilwi tu'n Dyos kyuk'i'l, qu'n ex matxi' t-ẍtilsa kyanmi tu'nel kyokslab'l. 10Atzu'n ja'lo, ¿tiqu'n nxa' kxitu'na'ye' ntb'incha'n Dyos, inkub' kq'o'ne' jun iqtz kyib'aju' okslal lu, extzun min nb'ent qiq'inte ex min b'ent kyiq'inte ojtxi' qyajilb'en? 11In pena' qoksla'n qama qoklet toj t-xtalb'il Dyos tu'nju' matzaj q'aq'an tk'u'j Qajaw Jesus qi'j, kse'nxkye, chij. 12Kkyaqil eb'ajkub' nume tej kb'inte chik'b'ab'l kyu'n Pawl ex B'ernab'e kyi'ju' techlal ex b'a'nq'ob'aj matxitoq tb'incha Dyos kyu'nel kxolju' mya aj Judaqe'. 13Tetzunj kb'aj yolin, tma Santyay kjalu: —Chin kb'intze' ntzik ex witz'in: 14Maqb'i te Simon se'n tzaja' laqj tk'u'j Dyos kyi'ju' mya aj Judaqe', ex majaw t-sk'o'n jun ttanamku'xi'x kxol. 15Ax yolju' se'n tz'ib'a'n kyu'n t-sanjelal Dyos, kse'n ntma'n kjalu: 16Tb'ajlenxi'tzun ja'lu chin ultle' ex kjawil nb'incha'n jumajtle' tja Dab'i kub'ni tz'aqi ex kjawil nwab'a'n jumajtle', 17tu'ntzun kjyon txqantl xjal wi'je' ayine' Dyos. kyuk'i'l kkyaqil nimaqtnam matxi' che xjanset toj nb'iye'. 18Ayine' Dyos Manb'aj, exi' nyek'u'ne' ti'xti' lu atxi'x kyoju' tq'ijlalil ojtxi', oje nmaye' nyole', chij. 19Qu'mtzun nkane' toj nwitze', lay che kub'q'etju' iqtz lu min nche ojqelan kyib'aju' mya aj Juda, makyej kq'o'n ojtxi' ktxol tu'n kxilpe ti'j Dyos. 20O'kxte' tu'n txi' tz'ib'et kye tu'n lalun che'x kych'yo'n alu'mj kub'niq'o'n kwitz witzleb', exqe' alu'mj nkub' kjtz'o'nkyib' ex chik', ex tu'n lalun kb'incha ajpaji'n. 21Qu'n ttzajlenx kyoj tq'ijlalil ojtxi' ate'qe' nche pakb'ante tkawb'il Moyses kyoj ja te k'u'lb'il kyoj q'ij te ojlab'l, chi Santyay. 22B'anttzunti'j kyu'n apostl ex tijwnaq kyuk'i'l kkyaqil okslal, tu'n kjaw ksk'o'n junjun kxol tu'n kxi' kychq'o'n Antyokyiy kyuk'i'l Pawl ex B'ernab'e. Jaw ksk'o'n Judas, ax tb'iju' B'arsab'as, ex Silas, nim toklen kxol okslal, 23ex xiktz'ib'a'n u'j tu'n t-xikyiq'i'n kjalu: Ayo'ye' apostl exqe' tijwnaq, qitz'inqib' kyuk'i'le', nche'x qq'olb'e'ne' qtzik ex qitz'in mya aj Judaqe' najlqe' Antyokyiy, toj Sirya ex Silisya. 24Ma qb'iye' ate' junjun xjal exi' tzalu ex myaqo'ye' oxi' chq'onkye, ex matxi' che okten yajulkyeye' tu'n kyol, ex nkuxitj knab'le' kyu'n. 25Qu'mtzun mab'entti'j qu'ne', b'a'n sela' toj qwitze' tu'n kxi' qchq'o'ne' junjun qxole' tu'n kxi' ka'yilkyeye' junx kyuk'i'l qtzik B'ernab'e ex Pawl nqo tzalaje' kyi'j, 26matxi' kyaq'kyib' toj xob'ajil tu'n tpaj Qajaw Jesukrist. 27Qu'mtzun mache'x qchq'o'ne' Judas ex Silas: che yolilku'xi'x kyuk'i'le' tu'n tb'ajx kychik'b'a'n tkyaqil ja'lu. 28B'a'n sela' toj twitz Xewb'aj Xjan ex toj qwitze' tu'n lalun kub' q'o'n jun iqtz kyib'aje' kyib'ajxi'tlju' inxi'x che ojqelan lu: 29tu'n lalun che'x kych'yo'ne' alu'mj kub'ni q'o'n te chojb'il kwitz witzleb', ex chik' ex alu'mj kub'ni tjtz'o'ntib', ex lalun kb'inchaye' ajpaji'n. Qama txi' kka'yi'n kyib'e' kyeju' lu, che anq'ile' b'a'n. Awt Qman Dyos k'iwlankyeye', chiju' xiktz'ib'a'n. 30Tb'ajlenxi'tzun kq'olb'e'n kyib', exi' Antyokyiy, eb'aj kb'u'yi'n okslal ex xikq'o'n u'j kye. 31Tetzunj tb'aj kẍch'i'n okslal u'j, ojexi'x eb'jaw tzalaj tu'nju' xiq'uqb'a'n kk'u'j. 32Tu'ntzu'n t-sanjelal Dyos qekye' Judas ex Silas, e'okten q'uqb'alte kk'u'j ex q'olte kyipumalju' okslal tu'n kyol. 33Tb'ajlenxi'tzun jte' q'ij, eb'ajx q'olb'e'n toj tzalajb'il kyu'n okslal, tu'ntoq tanjkyi'ju' e'pon chq'o'n kxol. 34Atzunte Silas b'a'n ela' toj twitz tu'n tkyejten atzu'. 35Ekyajtzun ten Pawl ex B'ernab'e toj Antyokyiy, kyuk'i'l txqantl, intoq che q'on xnaq'tzb'il ex intoq xikypakb'a'n tpakb'al b'a'n ti'j Qajaw. 36Tb'ajlenxi'tzun jte' q'ij, xitma'n Pawl te B'ernab'e kjalu: —Qo' jumajtl ka'yilkye qtzik e'qitz'in kyoj kkyaqilju' nimaqtnam ja oje b'aj qpakb'a'na' tyol Dyos, tu'n qka'yinte se'n ta'qeya', chij. 37Tajb'iltoqtzun B'ernab'e tu'n txi' Xwan kyuk'i'l, aju' Kuẍ tb'i; 38atzunte Pawl min kub' toj twitz tu'n txi', qu'n ojetoq tz'anjtzxi'ti'j Kuẍ Panpilya ex min xitljo'ntl kyuk'i'l toju' aq'untl. 39Mixti'x moje kyol, ex majxkub' kypa'n kyib': Xitk'le'n B'ernab'e Kuẍ ex exi' toj b'ark tu'n kpon Chipre, 40Atzunte Pawl jaw t-sk'o'n Silas te tuk'i'l, ex chq'o'nqetoq kyu'n okslal toj t-xtalb'il Qman Dyos. 41E'ik'tzuntz Sirya ex Silisya, intoq che'x kyoni'n okslal.

will be added

X\