Hechos 12

1Tojtzun tq'ijlalil lu okten Erodes ljol toj kq'ij junjun okslal. 2Tchaq' tu'n tkub' b'yo'n Santyay, titz'in Xwan, tu'n k'uẍtx'e'nb'il; 3ex tej tlonte b'a'n ela'ju' tb'incha toj kwitz aj Juda, tb'incha tu'n ttzyet Luch. B'aj ja'lu toj tq'ij waj wab'j mixti' ttx'amal. 4Ttzyetlentzun Luch, okx jpu'n tu'n Erodes ex e'kyaj tq'o'n kyaje' k'loj xq'uqil te kyajkyaj chaq xjal te q'oj. Xima'ntoq tu'n, tu'n tetz tyek'u'n twitz tnam tik'lenxi' Tq'ij Tzaqpib'l. 5Jpu'nkxtoqtzun Luch, xq'uqi'n b'a'nxi'x, aye'tzu'n okslal ljo'nxi'xtoq kna'n Dyos ti'j. 6Textzu'n qonik'an najchi'jtoq tz'etz tyek'u'n Erodes twitz tnam, intoq ktan Luch kxol kab'e' xjal te q'oj, xwaku'n toj kab'e' xpatx'k'uxb'il, ex ate'toq jte'tl xjal te q'oj intoq che xq'uqin twitz tjpel kars. 7Naqx minab'en tkub' tyek'u'ntib' jun tanjl Qajaw twitz, ex majxkub' txaqli jun spik'un toj kars. Oktzun yeku'n Luch ttx'u'k ex jaw k'asu'n tu'n anjl, ex tma te: ¡Wix we'ktza!, chij. Textzu'n kmuj b'je'l tz'aqju' xpatx'k'uxb'il kyi'j tq'ob' Luch, 8ex xitma'n anjl te: Q'onqe'ka ti'ja ex q'onqe'ka t-xajab'a, chij. B'jo'ktzun tq'o'n Luch, ex tmatl anjl te: Q'onka tpinpa'ta ex lpetza wi'je', chij. 9Etztzun lpe Luch ti'ju' anjl, min kane toj twitz qa axtoqju' ntoq tb'incha'n anjl. Toj tnab'l qa intoq witzk'an. 10E'ik'tzun kk'etzju' tnejel xq'uqil, e'ik'tl kk'etzju' tkab' tnej xq'uqil, ex tej kpon ttziju' tjpel tu'n qetz toj b'e, tjunalxju' tjpel el jaqli. E'etz, ex tej kb'etenje jun xkichb'e, kyej q'o'n tjunal tu'n anjl. 11Kanetzuntz toj twitz Luch, tma: Matxitzun wile' axxi'x matzaj tchq'o'n Qajaw tanjl klol weye' te Erodes ex te tkyaqilju' kyajb'iltoq aj Juda tu'n kb'inchante wi'je', chij. 12Tej teltnik' Luch ti'j, xi' tja Mariy ttxu Xwan ju' ax tb'iju' Kuẍ, jata'qe'toq b'a'npun b'u'yi'nkyib' toj na'j Dyos. 13Okx k'ojcha'n ttzija toj b'e, etztzun jun txin Rode tb'i ka'yilte alkyetoq. 14Tetzunj teltnik' ti'ju' toj twi' Luch, ojexi'x tzalaj, min okx tjqo'ntlu' ja, okx ojqelan q'malte tuja qa atoq Luch ati ttzija. 15—¡Matz'okta toj twitz! chechiju' ate'toq tuja te: Atzunte xitma'n kye qa axtoq. Kmatzuntz: —Myate Luch sul, tanmilo te', chechij. 16Ljo'nxtoqtzun tk'ojchan Luch ttzija. Tetzunj tokx kjqo'n ja, ok kka'yi'n ex e'jaw sak'puj. 17Atzunte xit-se'n tq'ob' kye tu'n lalun che yukchi, ex xitma'n kye se'n etza' tu'n Qajaw toj kars. Ex xitma'ntl kye: —Kmanxe' lu te Santyay ex kye qtzik e'qitz'in, chij. Etztzuntz ex xi' tojun plajtl. 18Tetzunj qsqix, eb'jaw tilju' xjal te q'oj, mixti'xte b'i'n kyu'n jaxa' Luch. 19Tchaq' Erodes tu'n tjyet, mixtzunti'x jyet, oktq'o'n te kpaju' xq'uqil ex tchaq' tu'n kkub' b'yet. Yajxi'tzuntl etz Erodes toj Juda ex xi' najal Sesarey. 20Inxi'xtoq q'ojin Erodes kyi'j aj Tiro ex aj Sidon, b'enttzunti'j kyu'n tu'n kpon twitz. Ex kub'ti'j tnab'l B'lasto kyu'n, jun nim toklen toj kawb'il tk'etz nimaqkawil Erodes, ex kqani nak'b'il tu'nel, qu'n intoq kk'mo'n aj Tiro ex aj Sidon kwa toju' ttx'otx' nimaqkawil. 21Tojtzun jun q'ij e'ttxok Erodes, ex oktq'o'n t-xb'alun toj toklen, kub' qe toju' tq'uqb'il te kawb'il ex xitma'n jun tpakab'. 22E'aq'witzun xjal ẍch'ilte kjalu: ¡Mya ichante' nyolin lu, jun dyos te'! chechij. 23Textzu'n kmuj lu, tzaj jun yab'il ti'j Erodes tu'n jun tanjl Dyos, tu'n tpaj min jawtnima'n Dyos, ex kyim intoq wanjtz kyu'n ẍchuq'. 24Intoqtzun ximlenxi'x tyol Dyos ex intoq xiq'ma'n toj tkyaqil plaj. 25Tetzunj tb'aju' kyaq'un B'ernab'e ex Sawl toj Jerusalen, anjkyi'j, xikyiq'i'n Xwan kyuk'i'l, ju' ax tb'iju' Kuẍ.

will be added

X\