Hechos 11

1Kyb'itzu'n apostl exqe' okslal toj tx'otx' Juda qa ojetoq kk'am mya aj Juda tyol Dyos. 2Tetzunj tpontl Luch Jerusalen, eyolin junjun okslal ate'xtoq toj ktxol aj Juda ti'j. 3Xikqani'n te: —¿Tiqu'ntzun xa'ya kk'etzju' mya aj Juda, ex ma wana kyuk'i'l? chechij. 4Xi'tzun tma'n Luch kye tzajx tnejel tkyaqilju' b'aj. Xitma'n kye kjalu: 5—Atintoqwe' toju' nintnam Jope, intoq chin na'n Dyose', tzaj q'o'n jun yek'b'il weye' kjalu: Wile' jun nakuj ninxb'alun, tzyu'nqetoq kyaje' ttxa'n, ku'tz toj kya'j ex k'u'l jatoq ta'qine'. 6Oknka'yi'ne' b'a'nxi'x titi'toq ati toj, ex wile' ate'toq txup kyaje' kqan etojk'ul txkup, ekan ex epich'. 7Ex nb'iye' jun tzaj yolin weye' kjalu: We'ktza Luch; b'yonqeku'ya ex ch'yonqe'xa, chij. 8Xintzaq'we'ne' kjalu: Lay Taye, b'ajxna' txa' nwan junwe' ti'xti' myab'a'n ex tz'il, nchije'. 9Tzajtzun jumajtlju' yol weye' toj kya'j, tma: Aju' matxi' nẍtilsaye' ayine' Dyos, lalun tz'ok tq'o'na te tz'il, chij. 10Oxmaj q'manjtz ja'lu, ex jawx jumajtlju' ninxb'alun toj kya'j kyuk'i'l kkyaqilju' ate' toj. 11Tojtzu'n kmuj lu e'pon oxe' xjal jyolweye' toju' ja jatoq ta'qo'ye', tzajniqe'toq chq'o'n tzmax Sesarey. 12Tchaq' Xewb'aj Xjan weye' tu'n lalun chin jawjeye' ex tu'nxi'ye' kyuk'i'l. Ex exi' qaq qitz'in lu wuk'i'le'. Qkyaqile' o'okxe' toj tja jun ichan, 13tzaj tma'n qeye' se'n ojetoq tila' jun anjl toju' tja, kub' we' ex tma te kjalu: Chq'onxa ttxokli Simon, ax tb'iju' Luch, toju' nintnam Jope tu'n tul; 14atzunte kq'malteju' teya se'n tu'n tkleta'ya kyuk'i'lju toj tjaya, chij te. 15Tetzunj ttzyet nyoline' kye, ulju' Xewb'aj Xjan kyib'aj kse'nx tej tul tnejel qib'aj. 16Tzaj nna'ntzuntze' aju' ojetoq tma Qajaw kjalu: Axte' jaw tq'o'n Xwan a' kwi' tu'n a', aye'tzunkye' kjawil a' kwi'ye' tu'n Xewb'aj Xjan, chij. 17Qana' matxi' tzaj tq'o'n Dyos kye kse'nxqe oje qo okslan te Qajaw Jesukrist, ¿se'n taq'wi tu'n nmaquntlwe' te Dyos? chi Luch. 18Tetzunj kb'inte okslal toj Jerusalen ja'lu, mixti'tlte kma ex jawkyajwali'n Dyos kjalu: —¡Ex matxi' tzaj tq'o'nte Dyos anb'il kyeju' mya aj Juda tu'n tanjtzkyi'j tuk'i'l ex tu'n kkanb'ante chwinqlal tejumajx! chechij. 19Aye'tzu'n okslal eb'ajx slamj tu'n tpaj ljonjtz toj kq'ij tej tkyim Steb'an, exi' oq junjun Penisya, Chipre ex Antyokyiy. Okxtzu' xa'kma'n tpakb'al b'a'n kye aj Juda ex min xikma'n kye txqantl xjal. 20Epontzun junjun okslal aj Chipre ex aj Sirene toj nintnam Antyokyiy ex eyolin kye mya aj Juda, xikma'n tpakb'al b'a'n ti'j Qajaw Jesus kye. 21Atitoq tipumal Qman Dyos kyuk'i'l, nimte' kyej kq'o'n ojtxi' kyokslab'l ex e'okslan te Qajaw. 22Tetzunj kb'inte okslal toj Jerusalen tqanil lu, xikchq'o'n B'ernab'e Antyokyiy. 23Tetzunj tpon B'ernab'e, til matxitoq che k'i'wlanjtz tu'n Dyos ex ojexi'x tzalaj. Xitq'o'n knab'l kkyaqil tu'n kwe' toj kyokslab'l ti'j Qajaw tu'n tkyaqil kk'u'j. 24B'a'n xjal toqte' B'ernab'e, nojni tu'n Xewb'aj Xjan ex atixi'x tokslab'l. Nim xjal eb'inte chik'b'ab'l tu'n B'ernab'e ex e'oklpe ti'j Qajaw. 25Yajxi'tzuntl, xi' B'ernab'e jyolte Sawl Tarso, 26tetzunj tknet tu'n, pon tiq'i'n Antyokyiy. Majx e'ten jun ab'q'i atzu' kyuk'i'l okslal, intoq kq'o'n xnaq'tzb'il kye nim xjal. Atzu' oka' q'o'na' kb'i xnaq'tzb'en tnejel maj te okslal te Krist toj Antyokyiy. 27E'tzaj jte' t-sanjelal Dyos toj Jerusalen ex e'pon Antyokyiy toju' tq'ijlalil lu. 28Juntzunkye Akab'o tb'i, wa'ltoq ex xewsanjtz te tu'n Xewb'aj Xjan, tma tqanil qa tzultoq jun we'yaj toj tkyaqil twitz tx'otx', ex japun toj tq'ijlalil nkawin ninimaqkawil Klawdyo. 29Kub'tzun kyxima'n xnaq'tzb'en toj Antyokyiy tu'n t-xikq'o'n jun o'nb'il kye okslal najlqe' toj Juda, kse'nxtoq tu'me'l tu'n kq'onte junjun. 30Xi'tzun kq'o'n, xiksma'n kyi'j B'ernab'e ex Sawl tu'n tpon q'o'n kye tijwnaq toj Juda.

will be added

X\