Hechos 10

1Atitoq jun ichan toju' nintnam Sesarey Kornelyo tb'i, nejenel te jun tnej xjal te q'oj Italyano tb'i. 2Intoq niman ichan lu te Dyos, intoq che k'ulun te Dyos junx kyuk'i'l toj tja. Ex intoq q'on pwaq o'nb'il kye aj Juda, ex intoq k'ulun te Dyos kukxju'. 3Tojtzun jun q'ij, ntzaj oxe' kmuj te qale, okq'o'n jun nakuj witzik' te kjalu: Tilkuxi'x jun tanjl Dyos okx jatoq ta' ex tma te kjalu: ¡Kornelyo!, chij. 4Majxtzun kyej ka'yin Kornelyo ti'ju' anjl, ex inxi'xtoq xob', xitqani'n te: ¿Ti'tzun Taye? chij. Xitma'n anjl te kjalu: Matxi' tb'i Dyos tna'j Dyosa, ex matxi' tilju' o'nb'il nxitq'o'na kye prow. 5Chq'onxa jun ichan toju' nintnam Jope txkolte jun ichan Simon tb'i, expe' ax juntl tb'iju' Luch. 6Xi' ta'ya' tja juntl ichan Simon tb'i, jun tzq'ajsal tz'u'n najli ttzi ninnjab', chiju' anjl. 7Tetzunj txi' anjl matxitoq b'aj yolin tuk'i'l, e'tzaj ttxko'n Kornelyo kab'e' tmajin ex jun xjal te q'oj nimalxi'x te Dyos ex q'uqli tk'u'j Kornelyo ti'j, 8ex tb'ajlenxi' tma'n tkyaqil kye, exi' tchq'o'n Jope. 9Tetzun juntl q'ij, ljo'ntoq b'e kyu'n ex xi'toq kypon lq'e tk'etzju' nintnam Jope, Jawx Luch na'l Dyos twi' ja, tetoqlo wanq'ij. 10Tzaj we'yaj ti'j ex tajb'iltoq tu'n twan, tzmatoqtzun nb'inchanjtz twa, tzaj q'o'n jun nakuj witzik' te kjalu: 11til jqetju' kya'j ex xi'toq tku'tz jun nakuj ninxb'alun, tzyu'nqetoq kyaje' ttxa'n. 12Ate'toq tkyaqil ch'ix txkup kyaje' kqan toju' ninxb'alun, exqe' nche qitinje ex pich'. 13Ex tb'i jun yol tzaj q'ma'n te kjalu: We'ktza Luch, b'yonqeku'ya lu ex ch'yonqe'xa, chij. 14Xi'tzun ttzaq'we'n Luch kjalu: Lay Taye, b'ajx txa'xi' nwan junwe' ti'xti' tz'il, chij. 15Tzaj jumajtlju' yol te kjalu: Aju' matxi' nẍtilsaye' ayine' Dyos, lalun tz'ok tq'o'na te tz'il, chij. 16Oxmaj q'manjtz ja'lu, jawxtzun jumajtlu' ninxb'alun toj kya'j. 17Tzmatoqtzun ximan Luch ti'j titi' tz'elpuna' yek'b'il lu tzaj q'o'n te, tej kponju' ichan exi' chq'o'n tu'n Kornelyo ttzija, matxitoq b'aj kxjelu'n jata' tja Simon. 18Tetzunj kpon, okx kqani'n tuk'i'l tq'ojq'ojel kwi' kuw qa atoqtzu' ta'ju' jun ichan Simon tb'i, ex ax tb'iju' Luch. 19Inxtoqtzun ximan Luch ti'ju' tzaj yek'u'n te, tma Xewb'aj Xjan te kjalu: Ka'yinxa, luqe' oxe' ichan nche jyon ti'ja. 20We'ktza, kutku'xa ex lalun jawje tk'u'ja, kutxi'ya kyuk'i'l qu'n ayine' ẍin tzaj chq'onkye, chij. 21Ku'tztzun Luch ex xitma'n kyeju' ichan: —Ayinwejuye' nchin kjyo'ne'; ¿ti'tzu'n tb'is kyk'u'je'? chij. 22Xi'tzun ktzaq'we'n te: —Maqotzaj chq'o'ne' tu'n Kornelyo nejenel kye xjal te q'oj, jun ichan tnik'alti'j, ink'ulun te Dyos ex b'a'n tilwi kyu'n kkyaqil aj Juda. Tzaj q'ma'n te tu'n jun tanjl Dyos tu'n tul txokb'aja, tu'n txi'ya tja ex tu'n tb'inteju' oktma'ya te, chechij. 23E'okx txko'ntzuntz tuja tu'n Luch, ex e'kyaj wtan tk'etz te qonik'an lu. Xi'tzun Luch kyuk'i'l te juntl q'ij, ex exi' junjun okslal najlqe' Jope tuk'i'l. 24Epontzuntz Sesarey te juntl q'ij, jatoq nayona' Kornelyo kyi'j kyuk'i'l twitze'l ex tamiw matxitoq che b'aj ttxko'n. 25Tetzunj tpon Luch tja, etz Kornelyo k'molte, ex kub' meje twitz k'ulul. 26Atzunte Luch jaw twab'a'n ex xitma'n te: —We'kuya, ex ichan qinwe' kse'n aya, chij. 27Intoqtzun yolin tuk'i'l, okx tuja ex til nimtoq xjal b'u'yi'nkyib'. 28Xitma'n Luch kye kjalu: —B'i'n kyu'ne' min q'o'n toj kyokslab'l aj Juda tu'n tmojb'ante tib' jun aj Juda kyuk'i'l najchaq xjal mujqa tu'n tokx toj kja. Atzunte Dyos machin tzaj t-xnaq'tza'ne' tu'n mix-a'lo' tu'n tok nq'o'ne' te tz'il. 29Qu'mtzun min xkub' nxk'a'yu'n wib'e' tej ẍin ktxoke', machin tzaje'. Wajb'ile' tu'n nb'inteye' titi' kyajb'ile' tu'nju' ẍin ktxokye', chij. 30Xi'tzun ttzaq'we'n Kornelyo: —Mab'ent kyaje' q'ij qloqx ja'lu, atintoqe' toju' njaye' tzalu, intoq chin na'n Dyose' ajttzaj oxe' te qale, tej tkub' tyek'u'ntib' jun ichan nwitze' inxi'xtoq qoptz'aj t-xb'alun. 31Tzaj tma'n weye' kjalu: Kornelyo, matxi' tzaj tb'i'n Dyos tna'j Dyosa ex matxi' tilju' tonb'ila kyi'j prow. 32Chq'onxa ttxokli Simon, ax tb'iju' Luch, atiku' toj nintnam Jope. Ati tja juntl ichan Simon tb'i, jun tzq'ajsal tz'u'n najli ttzi ninnjab', chij. 33Lwiyxi'xtzun xinchq'o'ne' tjoyliya, ex b'a'n xtb'inchaya matzula. Luqotzune' qkyaqile' ato'ye' twitz Dyos ja'lo, ex qajb'ile' tu'n qb'inteye' tkyaqilju' matchaq' Qman Dyos teya tu'n tmanteya qeye', chi Kornelyo. 34Tzyettzun tyolin Luch, tma kjalu: —Matxitzun kane toj nwitze' ja'lo, junelni kye xjal kyilwi tu'n Qman Dyos, 35te alkyexku' nintnam, k'mo'n qekye' tu'n Dyos alkye nniman te ex nb'inchante b'a'n. 36Tzaj tq'o'n Qman Dyos tyol kye tyajajil Israel, tzaj tma'n tpakb'al b'a'n te nak'b'il tu'nel Jesukrist, ju' ati toklen kyib'aj kkyaqil. 37Kanli kwitze' aju' b'aj toj tkyaqil ktx'otx' aj Juda, tzyet-x toj Kaliley, tb'ajlenxi' tpakb'a'n Xwan qa ilxi'xtoqti'j tu'n tjaw a' kwi' xjal. 38B'i'n kyu'ne' tzaj tq'o'n Dyos tipumal Jesus aj Nasaret ex tnojsa tu'n Xewb'aj Xjan, ex tb'incha Jesus b'a'n tej xten, etq'a'na' kkyaqilju' ntoq che yajti tu'n tajaw il. B'ajb'ent tu'n qu'n atitoq Dyos tuk'i'l, 39ex tziyal qo'ye' ti'j tkyaqilju' tb'incha Jesus toj ktx'otx' aj Juda ex toj Jerusalen. Kub' kb'yo'ntzun xjaltz, jaw kyob'a'n twitz krus. 40Jaw anq'intzuntz tu'n Dyos toj toxi'n q'ij, ex tb'incha Dyos tu'n tkub' tyek'u'ntib' qwitze'. 41Min kub' tyek'u'ntib' kwitz tkyaqilju' tnam, o'kxtzun kub'a' tyek'u'ntib' qwitze', jawni qotoq t-sk'o'ne' Dyos te tziyal ti'j. O'wane' ex o'k'wane' tuk'i'l tjawlenxi' anq'in. 42Ex tchaq' qeye' tu'n txiqma'ne' kye tnam qama tz'oktq'o'n Dyos toklen te ajkawil kyeju' itz'qe'x ex kyeju' mache kyim. 43Ojetoq che yolin kkyaqilju' t-sanjelal Dyos ti'j Jesus, ex ojetoq kma qa alkyeqe' mache okslan te, kb'el najsa'n kyil naq tu'nel. 44Inxtoqtzun yolin Luch, tej tul Xewb'aj Xjan kyib'aj kkyaqilju' ntoq che b'inte tyol Dyos. 45Aye'tzu'n okslal aj Judaqe' e'pon lpe ti'j Luch, eb'jaw lab'ti tu'nju' tzaj q'o'n Xewb'aj Xjan kyeju' xjal mya aj Judaqe', 46qu'n intoq che kb'i'n intoq che yolin kyoj junxi'tl yol ex intoq kyajwali'n Dyos. 47Tmatzun Luch kjalu: —¿Alkyetzun kq'malte qa lay jaw a' kywi' xjal lu, matxi' kk'am Xewb'aj Xjan kse'nxqe? chij. 48Tchaq'tzuntz tu'n tjaw a' kwi' toj tb'i Jesukrist. Ekub'santzuntz te Luch tu'n tkyejten jte' q'ij kyuk'i'l.

will be added

X\