1 Xintz'ib'a'ne' teya, qman Teopl, toju' tnejel wuje' ti'j tkyaqilju' matxitoq che tb'incha Jesus ex matxitoq che t-xnaq'tza tej ttzaj qekuxi'x 2 tzmax toju' q'ij tej tjawx toj kya'j. Na'mtoqtzun txi', b'aj kyej ttx'olb'a'n kye t-xnaq'tzb'en titi' tu'n kyb'inchante. 3 Ex tkyimlenxi', kub' tyek'u'nkutib' kywitz, iktzu'n tyek'uya' kye qa itz'toq. Ale'xtzu'n tb'aj kab'naq q'ij tyek'utib' kye ex intoq yolin kye ti'ju' tkawb'il Dyos. 4 Tetzunj atitoq kyuk'ilju' apostl, xitab'tzi'n Jesus kye tu'n lalun che etznaj toj Jerusalen, kjalu: —Kyyonku'ye' ajtjapunju' ttziya Nmane' kyeye', aju' xinma'ne' kyeye'. 5 Axte' qa jawsan Xwan a' tuk'i'l a', atzun toj jte' q'ijtl kjawil a' kywi'ye' tu'n Xewb'aj Xjan, Chij. 6 Aye'tzu'n b'u'yi'ntoq kyib' tk'etz Jesus, xikyqani'n te: —Taye, ¿Makjel tq'o'na kyoklen aj Israel ja'lo tu'n tten kykawb'il kyex? chechij. 7 Xittzaq'we'n Jesus kye kjalu: —Mixti' tu'n kyb'intekye' jtoj ex alkye kmuj japun ja'lu, qu'n o'kxte Manb'aj toj kya'j ati toklen tu'n tb'inchante; 8 ajtzun tulju' Xewb'aj Xjan kyuk'ile', ktenb'el kyipumale' ex che elexe' tziyal wi'je', toj Jerusalen, toj tkyaqil kytx'otx' aj Juda ex kytx'otx' aj Samarya, ex tzmax mankb'il twitz tx'otx', chij. 9 Tb'ajlentzun tma'n ja'lu, intoq che ka'yin te, jaw q'i'n Jesus, okjupliti'j tu'n jun muj ex min b'entl kyka'yinte. 10 Intoqtzun che ka'yinx ti'j twitz kya'j, kyil xi'toq t-xilq'exi'x Jesus najchaq, kub' kyek'u'n kyib' kab'e' ichan saq kyxb'alun kyk'etz, 11 ex kyma kye kjalu: —Ayeqeye' aj Kaliley, ¿tiqu'n majx mache kyej ka'yine' twitz kya'j? Axnate Jesusju' xten kyxole' ex matxi' txiq'i'n toj kya'j, tzul jumajtel kse'nx tej xi'kyka'yine' xxi' toj kya'j, chechij. 12 E'tzajxju' apostl twi' witz Olib'o tb'i, anjkyi'j toj Jerusalen: nqayinxtoq, kyin kse'n q'o'n tu'n qb'etinte toj q'ij te ojlab'l. 13 Tetzunj kypon toju' nintnam, e'jax toju' kol tzmax jawl toju' ja jata'qe'toq. Aye' Luch, Xwan, Santyay, Leẍ, Pelip, Tomas, B'artolome, Matey, Santyay tk'wal Alpey, Simon toktoq kyxol Selot ex Judas titz'in Santyay. 14 Kykyaqil intoq kyb'u'yi'n kyib' kukxju' tu'n kyna'n Dyos kyuk'i'l junjun qya, tuk'i'l Mariy ttxu Jesus, ex kyuk'i'l titz'in. 15 Kyojtzu'n q'ij lu jawe' Luch kxolju' xnaq'tzb'en b'u'yi'ntoq kyib', qapelo qaqnaq kyb'aj, ex xitma'n kye kjalu: 16 E'ntzik ex e'witz'in, atitoq tu'n tjapunte' ojetoq tma Xewb'aj Xjan toj ttzi Dab'i, ojetoq tma toj Tu'jil ti'j Judas, aju' xiyek'ulte Jesus kyeju' etzyunte. 17 Atoq junte Judas qxol, ex atitoq taq'un qxol. 18 (Xi'tzun ex lq'et jun piẍ tx'otx' tu'n pwaq xiq'o'n te twitk'u'j tu'n myab'a'n tb'incha; etz t-xon tib' ex majx el laqj, majx b'je'tzju' toj tk'u'j. 19 Tetzunj kb'inteju' najlqe' toj Jerusalen, okkq'o'n tb'i tx'otx' lu Aseldama toj kyol aramey, a tz'elpuna': Tx'otx' te chik'.) 20 Ti'jtzu'n lu intma'n toj Tu'jil B'itz kjalu: Kyajxwitju' tja te jun chq'ajlaj, ex mixwit alo'tl najan toj. Ex ikx: Junxi'tlwit ten toju' toklen. 21 Ate'kye' ichan qxol tzalu mache ten quk'i'l tkyaqilju' tq'ijlalil xten Qajaw Jesus qxol, 22 tzajx tej tjaw a' twi' tu'n Xwan tzmax tjax toj kya'j. Ilxi'xti'j tu'n tok junkye' quk'i'le', tu'n ttziya'n junx quk'i'le' ti'j Jesus jawni anq'in, chij. 23 Kub'tzun kq'o'n kab'e' tu'n tjaw sk'et jun kyxol: aju' Jse, B'arsab'as tb'i, ex Just tkab' tb'i, extzu'n Matiyas. 24 Ena'n Dyos kjalu: Nman Dyos, aya ojtzqilte kyanmi xjal, yek'untza qeye' alkye matxi' jaw t-sk'o'na kxolju' kab'e' lu 25 tu'ntzun t-xitiq'i'n oklenj te chq'o'n kyej tq'o'n Judas tu'n tpaju' til, tej txi' toju' najb'il jatoq tu'n t-xa', chechij. 26 Xi' kse'ntzuntz, ex atzu' kub'a' tz'aq ti'j Matiy, kyajtzuntz kxolju' apostl texju' kmoj lu.
