2 Corintios 8

1Atzu'n ja'lo, e'ntzik ex e'witz'in, qajb'ile' tu'n txiqma'ne' kyeye' se'n xtyek'uya' Dyos t-xtalb'il kye okslal aj Masedon. 2Tu'npetzu'n mache b'jik' toj yajb'il, inxi'x che tzalaj; ex tu'npetzu'n prowqe'xi'x, ku'xi'xtej q'inunqe' tuk'i'l che oyin. 3Kanliwe' nwitz, xikq'o'n okslal lu kyoyaj tuk'i'l tzalajb'il se'nx nkub'ti'j kyu'n, expe' kub' kq'o'nch'i'ntl tib'ajxi' tu'n tkyaqil kk'u'j. Aye'x e'kub' ximante, 4tzaj kkub'sa'n qeye' tu'n txi' qq'o'ne' anb'il kye, qu'n kyajb'ilxi'xtoq tu'n kyonin tu'n kq'onte oyaj tu'n txiq'et kye okslal toj Jerusalen. 5Kyb'inchaxi'xpe'tl kyetwitzju' xima'ntoq qu'ne', tnejelxi'x kyaq'kyib' tu'n kyajb'en te Qajaw, kyaq'tzun kyib'tz tu'n kyonin quk'i'le' se'nx tajb'il Dyos. 6Qu'mtzun xiqkub'sa'ne' te Tito tu'n t-xitljo'n tb'uyitju' oyaj lu kxole' kse'nx tzyet tb'uyinte nejtl. 7Aye' kyeju'ye' nb'ent-xi'x kyu'ne' toj tkyaqil: atixi'x kyokslab'le', b'a'nxi'x che yoline', atixi'x kyojtzqib'le', inxi'x kq'o'n kyib'e' tu'n kyajb'ene' ex atixi'x kk'u'jlalile' b'je'l kykno'ne' qi'je', ex ati tu'n kq'ontexi'xtle oyaj kxel q'et lu. 8Mya jun chaq'b'il nkub' nq'o'ne' kyeye'; naq o'kx wajb'ile' tu'n telkynik'e' ti'ju' b'a'n tb'is kyk'u'j txqantl okslal, tu'n tten anb'il kyeye' tu'n kyek'unteye' kk'u'jlalile' axxi'x. 9Qu'n matxi' tz'el kynik'e' ti'j Qajaw Jesukrist, q'inun extzun matz'ok te prow tu'n kpaje', tu'nju' tprowil ẍe oka'ye' q'inun. 10Kxe'l nq'o'n jun knab'le' ti'ju' ti'xti' lu te jun b'a'n kyeye'. Tzajx jnab'i, mya naqx tzyet-xi' kq'on kyoyaje', tzyet tkub' kq'o'ne' tuk'i'l ktzalajb'ile'. 11Japunx kyu'ne' ja'lo se'nx ttzajku' qe kyu'ne', kq'onku'ye' kyoyaje' tu'n tkyaqil kk'u'je' kse'nx tu'me'l tu'n kq'onteye'. 12Qu'n alkyete tajb'il tu'n tq'on toyaj, k'mo'n tu'n Dyos aju' makub' tq'o'n se'nx tu'me'l tu'n tq'onte. Min ntqani'nte Dyos aju' mixti' qe. 13Min nxinma'ne' kyeye' tu'nwt kyajtitlkye' naq tu'n mache onine' kyi'j txqantl. 14Atiku' ti'xti' kyeye' ja'lo tu'n tb'ent kyonine' kyi'ju' mixti'kye; tojtzun jumajtl aye'tlkye ati kye tu'n kyonin ti'ju' mixti' kyeye', tu'ntzun ttenyile kyeye' kyuk'i'l. 15Kse'n ntma'n toj Tu'jil: Mixti'tlte kyej kyeju' jawkyiq'i'n nim, ex kanun kwaju' naqch'i'n jaw kyiq'i'n, chij. 16Chjonte te Dyos, kub' tq'o'n toj tanmi Tito tu'n tb'ajx tk'u'j kyi'je' kse'nwe' ati nk'u'je' kyi'je'. 17Kub' toj twitz tej txinma'ne' te tu'n txi' xb'etzalkyeye', ma'tzun txi' tu'n tkyaqil tk'u'j ka'yilkyeye'. 18Matxi nchq'o'ne' jun okslal tuk'i'l Tito kxole', b'a'n che yolin okslal ti'j toj tkyaqil plaj, tu'nju' matxi' tz'aq'unan b'a'n tu'n tpakb'et tpakb'al b'a'n. 19Expe' aye' okslal e'jaw sk'onte tu'n tb'et quk'i'le' ex tu'n tonin b'uyilte oyaj lu te ninb'ilte Qajaw ex tu'n tyek'et tb'is qk'u'je' tu'n qonine'. 20Min qajb'ile' tu'n kyolin okslal qi'je' ti'ju' txqan oyaj saj q'o'n toj qq'ob'e' tu'n tb'uyet, 21qu'mtzun noktilil qu'ne' tu'n qb'inchanteye' toj tnik'alilti'j, mya o'kx twitz Dyos, ex ikx kwitz xjal. 22Ex matxi nchq'o'ne' juntl qitz'ine' kyuk'i'l, matxi' tz'ok qka'yi'ne' toj b'a'npun tu'me'l atixi'x tk'u'j tu'n tonin toj taq'un Dyos, expe' atixi'xtl tk'u'j ja'lo tu'nju' matxi' qe tk'u'j kyi'je'. 23Quk'i'lqe' qib' tuk'i'l Tito ex naq'unan wuk'i'le' tu'n qonine' kyi'je'. Aye'tzu'n kab'e'tl okslal, sanjeljqe' kyu'n okslal ex nknima'n Krist. 24Kyek'um tzune' kye qa nxi'x che kk'u'jla'ne' axxi'x, tu'ntzun kb'inte okslal ẍe'x chq'onkye qa ax qeye' nqo tzalaje' kyi'je'.

will be added

X\