2 Corintios 7

1Aye'tzun yolju' e'tzaj ttziya'n Dyos qe, e'ntzik ex e'witz'in. Qu'mtzun qẍtilsam qib' te tkyaqilju' ntz'ilsante qxmilal ex qanmi; qq'onk tilil tu'n qxjansante qib' toj tchiylal Dyos. 2¡Kyb'inku' ch'ine' qyole'! Mixti' jun xjal myawt b'a'n nqb'incha'ne' te; mixa'lo'xi' jun xjal tz'el txalpuj qu'ne'; mixa'lo'xi' jun kub' qsb'u'ne'. 3Mya inwt chin iline' kyeye', kse'n matxi' txinma'ne' kyeye', majx ate'ye' tink'u'je' tu'n qanq'in junx ex tu'n qkyim junx. 4Q'uqlixi'x nk'u'je' kyi'je' ex nchin tzalaje' kyi'je'. Q'uqliwe' nk'u'j ex nchin tzalajwe' toj tkyaqilju' yajb'ilqeye'. 5Atxi'x qpone' Masedon, b'ajx qo ojlana' jun kmuje', inpe' qoyajtiye' toj tkyaqil plaj: inxi'x che q'ojin xjal qi'je' ex nqo xob'jeye' toj qanmiye'. 6Atzunte Dyos kuwsan kyeju' numjni, o'tkuwsaye' tej tul Tito qk'etze'; 7ex myanaq o'kx tej tul, ex tu'nju' qb'inteye' intoq tzalaj Tito kyi'je'. Tzaj tma'n qeye' qa kyajb'ilxi'xe' tu'n qok kka'yi'ne', ex tzaj tma'n qa nche b'isune' ex nb'ajx kk'u'je' wi'je'; ojexi'x chin tzalaje' tu'n ja'lu. 8Maskye tzaj kb'ise' tu'nju' u'j xintz'ib'a'ne' kyeye', min nchin b'isune' ja'lo tu'n. Inb'isune' tnejel tu'n tpaj ojexi'x che b'isun jte' q'ije' tu'nju' u'j lu, 9atzu'n ja'lo nchin tzalaje'; mya tu'nju' eb'isune', ate' tu'n kb'ise' lu matz'anjtz kyi'je' tuk'i'l Dyos, qu'mtzun mixti' junqe' taq'wix xqb'incha kyeye'; 10Qama tzaj qb'is kse'nx tajb'il Dyos inanjtzti'j qanmi tu'n, tu'n qklet, ex mixti'tl tu'n qb'isun tu'n. Atzu'n kye xjal kb'is ntzaj kamik tu'n. 11¡Kximankutzune' titi' sul tq'o'n kb'ise' tzaj kse'nx tajb'il Dyos! Matzaj kna'n kyib'e' ex makkol kyib'e'; tzaj ktx'u'jile' ex ten tchiylal Dyos kyeye'. Yajxi'tzuntl kyajb'ile' tu'n klontetl nwitze', atixi'x kk'u'je' wi'je' ex makub' ktz'e'ysa'ne' twitzju' b'inchante myab'a'n. Tu'ntzu'n tkyaqil ja'lu makyek'uye' qa mixti'kye' kpaj ti'ju' il lu. 12Ate' u'j xintz'ib'a'ne' mya tu'n tpaju' b'inchan il ex mya tu'n tpaju' b'inchanjtz il ti'j, ate' tu'n telkynik'e' ti'j qa inxi'x qoximane' kyi'je' twitz Dyos. 13Maqe qk'u'je' tu'n ja'lu. A xqo tzalajxi'xju'ye' ti'j kyetwitz ja'lu, tej sok qka'yi'ne' Tito inxi'x tzalaj; kkyaqile' ẍe'x q'onte ttzalajb'il. 14Oje txinma'ne' te Tito qa nchin tzalaje' kyi'je', mya taq'wix ẍin kyaja'ye' kyu'ne'. Apete' tu'n tkyaqilju' ax oje txiqma'ne' kyeye', matz'el q'ancha'lixju' xiqma'ne' te Tito toj ax qa nxi'x qo tzalaje' kyi'je'. 15Ex inlaqxi'x tk'u'j Tito kyi'je' ajttzaj tna'n qa xikyb'i'ne' ex kk'ame' tuk'i'lxi'x jun ninb'il. 16¡Nchin tzalaje' tu'n maqe nk'u'je' kyi'je'!

will be added

X\