2 Corintios 5

1Ikyqo' se'n jun ja twitz tx'otx', kse'n jun pach naq te jte' q'ij; b'i'n qu'n qama kub' xitju' tpach qanmi lu, ati jun qja tejumajx b'incha'n tu'n Dyos toj kya'j, mya b'incha'n tu'n kq'ob' xjal. 2Tu'ntzu'n tpaj nqo jiq'chana' toju' qja naku'j pach ja'lo, qajb'ilnaj tu'n qten toju' qja toj kya'j; 3Maskyetzun makyej qq'o'n kutxb'ilqe tok ja'lo, lay qokyaj ẍb'iqe. 4Ato'xku' toju' qxmilal naku'j pach nqo b'isun ex nqo sikt, mya awt qajb'ilju' tu'n qelq'i'n toj, a qajb'ilju' tu'n tokju' qxmilal naku'j qja ak'a'j. 5Matb'incha Dyos qten tu'n qok toju' lu, qu'n tzaj tq'o'n Xewb'aj Xjan tejun q'uqb'ab'l tk'u'jlalilju' qk'ma'. 6Qu'mtzun q'uqli qk'u'j kukxju'. B'i'n qu'n, tu'nju' nqo anq'in toju' qxmilal ja'lo, najchaq ta'qo' ti'j Qman Dyos. 7Nqo b'et toj qokslab'l tu'nju' q'uqli qk'u'j ti'j, mya tu'nwt nok qka'yi'n; 8q'uqlitzun qk'u'j ti'j, ex qajb'il naqwit qo elpa'n ti'ju' qxmilal tu'n qxi' najal tuk'i'l Qajaw. 9Qu'mtzun noktilil qu'n tu'nqel b'a'n twitz Qajaw, qa itz'qo'x tzalu twitz tx'otx' mujqa maqo'x tuk'i'l Qajaw. 10Qu'n qkyaqil ati tu'n qyek'unte qib' twitz tkawb'il Krist, tu'ntzun qk'monte teyile junjun kse'nx qb'inchb'en, qa b'a'n mo myab'a'n, tej xqoten toj qxmilal. 11Tu'ntzu'n matxi' tz'el qnik'e' qa atzu' tu'n qnimana' te Dyos, in oktilil qu'ne' tu'n tkub'ti'j knab'l xjal. Ojtzqi'n qoxi'xe' tu'n Dyos, qapelo ex ojtzqi'n qo'ye' kyu'ne'. 12Mya inwt qnima'n jumajtl qib'e', naq nxiqma'ne' tu'me'l kyeye' tu'n ktzalaje' qi'je', tu'n tb'ent ttzaq'wet kyu'ne' kyeju' nknima'n kyib' tu'n kka'yink ex myaju' tkub' toj kyanmi. 13Qama tz'ok toqwi'ye' toj kwitze', tu'nte' nqo ajb'ene' te Dyos; qatzun min, te jun b'a'nte' kyeye'. 14Matxi' qna'ye' tk'u'jlalil Krist tzajx telen qnik'e' qa kyim jun ichan tu'n kpaj kkyaqil xjal, ex kykyaqil xjal kyimniqe'. 15Kyim Krist tu'n kpaj kkyaqil xjal, tu'ntzun lalun che anq'intl kyex, tu'n kyanq'in te Krist, ju' kyim tu'n kpaj ex jaw anq'intl. 16Min nqoximantle' ti'j juntl xjal se'n che ximan xjal twitz tx'otx'; tnejel ikytoq nqxima'ne' ti'j Krist kse'n che ximan xjal, atzu'n ja'lo mikxa'tl qximju'ye' ti'j. 17Qu'mtzun aju' mujli tuk'i'l Krist, jun ak'a'j wnaqte'. Matxi' che kyej tq'o'n ojtxi' ti'xti'; mache b'jo'k te ak'a'j. 18Tkyaqil ja'lu tu'n Dyos, matb'incha qten tuk'i'l tu'nel Krist ex matzaj toqxena'n tu'n t-xiqpakb'a'n kye xjal tu'n tb'antile kten tuk'i'l Dyos. 19Oktilil tu'n Dyos tu'n tb'ant kten kkyaqil xjal tuk'i'l tu'nel Krist, min oktq'o'ntl twitz kyi'ju' kyil xjal; ex tzaj tq'o'n qoklene' tu'n txi' qchik'b'a'ne' tpakb'al b'a'n lu. 20Qu'mtzun t-sanjelal Krist qo'ye', ku'xwitloj aku' Dyos nkub'san kyeye' ajt-xi qma'ne' tyol Dyos kyeye'. Qu'mtzun nqo kub'sane' kwitze' tu'n kk'monteye' tu'n tb'ant ktene' tuk'i'l Dyos. 21Mixti'te Krist tb'inchawt jun til; naqtzun tu'n qpaj, oktq'o'n Dyos ku'wtloj ati til, tu'n qk'met tu'n Dyos tu'nel Krist.

will be added

X\