2 Corintios 4

1Qu'mtzun min nqokub'numje', qu'n tzaj toqxena'n Dyos aq'untl lu qeye' tu'n tlaqb'il tk'u'j. 2Min nqo b'inchantlqe' ti'xti' toj ewaj, mixti'tl tu'n qch'ixwa'ye'; min nqo sb'une' ex min nqchuku'ne' tyol Dyos. Inpe' oktilil qu'ne' tu'n qelb'a'ne' kwitz kkyaqil xjal twitz Dyos tu'n o'kxju' ax nxiqma'nne'. 3Qatzun e'wa'nxju' tpakb'al b'a'n te kolb'il nxi' qpakb'a'ne', o'kxtzu' e'wa'na' kyeju' nche'x toj naje'n. 4Mina'jon nkyoksla'n, axju' dyos toju' tq'ijlalil ja'lo nmoẍsante knab'l, tu'n lalun tz'el kynik' ti'ju' t-spik'umal tpakb'al b'a'n ti'j Krist tb'anilxi'x, itz' tilb'ilal Dyos. 5Min nqpakb'a'nqe' qib', a qeye' nxi' qpakb'a'n qa a Jesukrist Qajaw; naq ajb'el qo'qe' kyeye' tu'n tk'u'jlalil Jesus. 6Qu'n axte Dyos q'mante tu'n tten spik'un toju' qlolj, atzun saj q'onte spik'unju' toj qanmi, tu'n t-spik'e' tnab'l juntl, tu'n telkynik' ti'ju' tajwalil Dyos nqoptz'aj twitz Jesukrist. 7Atzu'n q'inumal lu ati toj qxmilal, kse'n jun tx'otx' k'wil, tu'n tq'ancha'lin qa tu'n Dyos te' nin ipumalj lu ex mya qu'n. 8Ikytzu'n, maskye nim tx'u'yb'il ati, atiqe tu'me'l qe; inb'ajx qk'u'j, ex min nqo k'oline'. 9Nljonjtz toj qq'ije', ex min nqokyaj leb'a'ne'; nqo niq'unjtze' ex min nqokub' xitje'. 10Jaxjaku' maqo'xa'ye', majx q'i'n tkamik Jesus qu'ne' toj qxmilale', tu'ntzun tq'ancha'lin tchwinqlal toj qxmilale'. 11Akxku' itz'qo'ye' twitz tx'otx', nelje qi'je' kukxju' tu'n qkyime' naq tu'nel Jesus, tu'n tyek'et qa ntzaj tq'o'n Jesus tchwinqlal te tchwinqlal qxmilale' ati tu'n tkyim. 12Tu'ntzu'n nelje qi'je' tu'n qkyime', ma kk'ame' kychwinqlale'. 13Intma'n toj Tu'jil: Xiwoksla'ne', qu'mtzun xinma'ne', chiju' tz'ib'a'n. Ikxtzun qeju'ye', tu'nxju' qokslab'le', nqoksla'ne' ex nxiqma'ne'. 14Qu'n b'i'n qu'ne', a Dyos jaw anq'in Qajaw Jesus kxol kyimni tu'n, ex qo jawil anq'in tuk'i'l Jesus tu'n, qo xe'l tiq'i'n junx kyuk'i'le' twitz Dyos. 15Tkyaqil ja'lu matzik'x qu'ne' te jun b'a'n kyeye', tu'n kyk'monte nim xjal t-xtalb'il Dyos, ex nim xjal tu'n kq'on chjonte te Dyos ex tu'n tjaw kyajwali'n. 16Qu'mtzun min nqo kub'jumje'. Maskye xi' tb'aj qxmilale', atzu'n qanmiye' xitok ak'a'jxi'x atl junjun q'ij. 17Mya nimte' yajb'ilqe ja'lo ex lwiy nnik'; atzu'n ktzajel q'o'n qe tu'nju' lu jun qoklen nimxi'x ex tejumajx. 18Qu'n myatzu' toka' qwitz ti'ju' q'ancha'l, xi'toka' qwitz ti'ju' min q'ancha'l, qu'n aye' ti'xti' q'ancha'lqe' lwiy nche ik', aye'tzunkye' min q'ancha'lqe' tejumajxqe'.

will be added

X\