2 Corintios 3

1Ajt-xi' qma'ne' lu, ¿maxi' tjaw qnima'ntl qib'e' toj kwitze'? ¿Ma ilti'j tu'n qyek'unteye' jun u'j oqxenb'ilqeye' kyeye', mujqa tu'n qkub'sane' tu'n ttzaj kq'o'ne' jun u'j oqxenb'ilqeye' kse'n nkb'incha'n junjun? 2Aye'nakyeju'ye' te txel u'j oqxenb'ilqeye': tz'ib'a'n toj qanmiye', kkyaqil xjal nche jaw ẍch'inte ex kyojtzqi'n. 3Ex q'ancha'lxi'x aye'ye' jun u'j aku' Krist tz'ib'ante tu'n qaq'unb'ene'; mya tu'n tz'ib'b'il tz'ib'a'na', tz'ib'a'n tu'n T-xew Dyos itz'; jun u'j mya twitz ab'j toka', toj kyanmi wnaq tz'ib'a'na'. 4In qma'ne' lu, qu'n q'uqli qk'u'je' ti'j Dyos tu'nel Krist. 5Mya atiwt tu'me'l tu'n tb'ant junqe' ti'xti' qu'ne' qu'nxwite'; tkyaqilte' nb'ant qu'ne', tu'n Dyos te', 6ate Dyos okq'onte qoklene' tu'n qajb'ene' toju' ak'a'j yol, myatzu' tzajna' ti'j jun kawb'il, ti'j taq'un Xewb'aj tzajna'. Ate' kawb'il ntma'n tu'n tkyim xjal, atzunte' T-xew Dyos ntq'o'n chwinqlal. 7Tyek'u pena'te Dyos tajwalil tej ttzaj tq'o'n kawb'il te Moyses, tz'ib'a'n twitz ab'j ex nche'x tq'o'n xjal toj kamik, mixpeti'x b'ent t-xikyka'yi'n aj Israel twitz Moyses inxi'xtoq qoptz'aj, maskye atitoq tu'n tkub'aju' spik'umal twitz, 8¡mastzun tb'anilxi'xtlte' tej sul tpakb'alju' ak'a'j yol tzajni ti'j Xewb'aj! 9Qa tb'anilku'xi'x oka' tej ttzaj q'o'n kawb'il ajb'en tu'n kyxi' xjal toj naje'n, ¡mastzun tb'anilxi'xtl soka' tej sul tpakb'al b'a'n tu'n qk'met tu'n Dyos! 10Qu'n mixti'tl toklen tajwalil ojtxi' kawb'il kse'n ja'lu, majx tb'anilxi'xtl. 11Tb'anilxi'xtoqju' ojtxi' kawb'il ex atitoq tu'n tkyaj naj, tb'anilxi'x tzuntlju' ak'a'j yol kjel tejumajx. 12Tu'ntzu'n q'uqli qk'u'je' ti'ju' lu, min nqo xob'e' tu'n qyoline' ti'j. 13Min nqb'incha'ne' kse'nte Moyses intoq oktktxu'n twitz tu'n xb'alun tu'n lalun tz'ok kka'yi'n aj Israel aj tyupju' t-spik'umal, qu'n atitoq tu'n tkub'aju' tqoptz'ajel twitz. 14Aye'tzunkye min kane toj kwitz, ex min nelkniky' ti'ju' ojtxi' kawb'il ja'lo ajtjaw kẍch'i'n, axju' xb'alun lu nmqonte kwitz tu'n lalun tz'el kynik' ti'j, na'mx telju' kutxb'il knab'l, qu'n o'kx Krist nnel q'inte ti'j kwitz xjal. 15Jpu'nx kynab'l tu'n xb'alun toju' tq'ijlalil ja'lo ajtjaw kẍch'i'n tuj Moyses. 16Ajtzun tanjtzti'j jun xjal tuk'i'l Qajaw, inelju' xb'alun ti'j maqb'ilte tnab'l. 17Qu'n ate Qajaw Xewb'aj; ex xi'ta' tzaqpib'l jata' T-xew Qajaw. 18Qu'mtzun, qkyaqil mya jpu'ntl qwitz kse'n nejtl, ikyqo' se'n jun lispej ntqoptz'a'n tajwalil Dyos, ex xi'qch'exb'et tu'n tb'ent qilb'il se'n tilb'ilal Krist, qu'n atl junjun maj nq'ancha'linxi'x t-spik'umal Qajaw qi'j, atzunte Qajaw nb'inchante ja'lu, tu'nel Xewb'aj Xjan.

will be added

X\