2 Corintios 2

1Qu'mtzun min nxi'tle' xb'etzalkyeye' naq tu'n ttzaj kyb'ise'. 2Qu'n qama tzaj kb'ise' wu'ne', ¿alkyetzun kq'olte ntzalajb'ile', qa mya qe'ye', ju' matxitoq tzaj kb'ise' wu'ne'? 3Qu'mtzun xxa'ntz'ib'a'ne' ja'lo, qu'n min wajb'ile' tu'n nxi'ye' tu'n tok nb'ise' kyu'ne', aye'wtloye' tu'n kytzaj q'onte ntzalajb'ile'. Q'uqlitoq nk'u'je' kyi'je' qa che tzalajele' ti'ju' nchin kytzalaje' ti'j, 4tetzunj xkub' ntz'ib'a'ne' u'j lu, inxi'xtoq chin ximane' ex nchin b'isune', expe' nchin oq'e'. Ma'tzun kub' ntz'ib'a'n we' wuj, mya tu'n ttzaj kb'ise', tu'n klonteye' inxi'x che nk'u'jla'ne'. 5Aju' okslal okq'onte nb'ise', mya o'qinkxe' ẍin b'isun tu'n, ex ikxkye' kkyaqile' mache b'isun ch'ine' tu'n. Nxinma'ne' Mache b'isun ch'ine' tu'n lalun txinma'nxi'xtle'. 6Tk'i'xtzunte tz'e'ysb'il twitz okslalju' lu kub' kq'o'n knimal kb'aje'. 7A tu'n tb'inchetju' ja'lo tu'n tkub' najset til ex tu'n tonet, tu'n lalun tzajxi'xtl tb'is. 8Qu'mtzun nxi' nkub'sa'ne' kyeye' tu'n kyek'untetle' kk'u'jlalile' ti'j. 9Xintz'ib'a'ne' kyeye' tnejel ti'ju' lu, tu'ntoq tel kynik'tzile' qama kyaq'kyib'e' tu'n t-xikb'incha'ne' nxinma'ne' kyeye'. 10Atzunju' makub' kynajsa'ne' til, ex kb'el nnajsa'ne' til. Kb'el nnajsa'ne' qa ati tu'n tkub'a' najset til, kyu'nele' ex twitz Krist. 11Tu'ntzun lalun kanb'antl Tajaw il qi'j, qu'n b'i'ntl qu'n myab'a'n qe' t-xim. 12Tej npone' toj nintnam Troade q'malte tpakb'al b'a'n ti'j Krist, q'onjtz anb'il weye' tu'n waq'unane' toj taq'un Qajaw. 13Mixtoqtzun ti'x nchin tzalaje', qu'n min okyalju' witz'ine' Tito wu'ne'. Qu'mtzun nik'b'ete' kxol ex nxi'ye' Masedon. 14Chjonte te Dyos, ntq'o'n anb'il tu'n qkanb'an tu'n Krist, ex tu'n qpakb'ab'le' nxityek'u'n tpakb'al b'a'n, matxitzun b'injtz toj tkyaqil plaj naku'j tk'ok'jal npuk'chaj. 15Qu'n ikyqo'ye' se'n tk'ok'jal sturak nxitq'o'n Krist te Dyos, ex npuk'chaj tk'ok'jal kxolju' nche klet ex kxolju' nche'x toj naje'n. 16T-xew kamik nela' kyeju' nche'x toj naje'n, atzu'n kyeju' nche klet, jun tk'ok'jalte' ntq'o'n chwinqlal. ¿Alkyetzun jaku' tzik'xju' aq'untl lu tu'n? 17Min tokju' tyol Dyos qu'ne' te qkanb'ab'le', kse'n nkb'incha'n txqan; inpe' qoyolinqe' axxi'x twitz Dyos, chq'o'nqo'ye' tu'n Dyos ex nqo ajb'ene' te Krist.

will be added

X\