2 Corintios 13

1Toxmaji'ntzun chin xe'le' ka'yilkyeye'. Tkyaqil kb'antelti'j tu'n ttziyb'il kab'e' mo oxe' tziyal. 2Aye' eb'inchan il nejtl, ex kkyaqil, najchaqku' tinqina'ye' ja'lo, kxe'l wab'tzi'n jumajtle' wab'tziye' kyeye' tej npone' tkamaji'n xb'etzalkyeye', lay tzaj laqj nk'u'je' kyi'je', 3ina' kjyo'nkye' jun yek'b'il qa a Krist chq'ol weye' tu'n npakb'ane'. Mya numjnite Krist ajttzak'un kyi'je', ntyek'u'nte' tipumal kxole'. 4Jaw q'o'nte' twitz krus mixti'toq tipumal, itz' tu'nte' tu'n tipumal Dyos. Ikxtzun tu'me'lju' maqo okye' ttxa'n tnumje'n, ex mojliqo'ye' tuk'i'l tu'n qanq'ine' tu'n tipumal Dyos tu'n qonine' kyi'je'. 5Che ximanqe'ye' kyi'jxe' qa wa'lqeye' toj kyokslab'le'; tzik'ku' kwitze' kyi'jxe'. ¿Ma min b'i'n kyu'ne' qa ati Jesukrist toj kyanmiye'? ¡Qatzun min, mya okslal qe'tzuntze'! 6Tz'elxwit knik'e' qi'je' qa ax okslal qo'ye'. 7Ex nqo na'n Dyose' tu'n lalun kb'inchaye' jun ti'xti' myab'a'n; mya naqx tu'n tka'yinjtz qa okslal qo'ye', ate' tu'n kb'inchanteye' b'a'n, maskye maqo okq'o'ne' mya okslal qo'ye'. 8Qu'n mixti'qe' tu'n qb'inchante ti'ju' ax, naq o'kx tu'n qonine' ti'ju' ax. 9Qu'mtzun nqo tzalaje' se'n nqo numje', aye'tzunkye' kuwqe'ye'; ex kxe'l qljo'n qna'j Dyose' tu'n kyoke' okslalxi'x. 10Nxi' ntz'ib'a'ne' u'j lu kyeye' na'mxku' nxi'ye' ka'yilkyeye', tu'n lalun chin oke' kuwxi'x tu'n wipumale' ntzaj tq'o'n Dyos ajnpone' kxole', mya xitulkyeye', tu'n kych'iye' chin pomela'ye'. 11Aye'tzun nyolju'ye' kyeye' e'ntzik ex e'witz'in, che anq'inqe'ye' toj tzalajb'il ex kq'onk tilile' tu'n kyanq'ine' okslalxi'x. Kyipumalim kyib'e' ex che anq'inqe'ye' toj nuk'b'il ex nak'b'il. Atzunte Dyos k'u'jlalqe ex q'ol nak'b'il ktenb'el kyuk'i'le'. 12Kq'olb'em kyib'e' jun te juntl tu'n jun xjan ma'tz. 13Nche'x q'olb'e'ne' kyu'n kkyaqilju' okslal ti'j Qajaw ate' tzalu. 14Tenxwit t-xtalb'il Qajaw Jesukrist kyuk'i'le', che k'u'jlanjtzxwite' tu'n Dyos ex tenwtju' Xewb'aj Xjan kyuk'i'le'.

will be added

X\