2 Corintios 12

1Mixti'x tajb'en tu'n qla'jinte qib'. Oktzun chin yolile' kyi'ju' oje che wile' naku'j toj witzik' ex oje che tzaj tyek'u'n Qman Dyos weye'. 2Wojtzqi'ne' jun okslal ti'j Krist, mab'ent kyajlajoj ab'q'i xiq'i'n tzmax toj toxi'n kya'j. Min b'i'n wu'ne' qa xiq'i'n toj t-xmilal mujqa o'kx tanmi; o'kx Dyos b'ilte. 3Wile' xjal lu (min b'i'n wu'ne' qa tk'i'xi' t-xmilal mujqa o'kx tanmi, o'kx Dyos b'ilte) 4xiq'i'n toju' najb'il, atzuntzu' tb'iya' yol e'wa'n, mix-a'lo'x jun xjal q'o'n te tu'n txiq'mante. 5Jaku' jaw nnima'n wib'e' tu'nju' wojtzqiye' jun xjal ikyju', ex mya tu'n nnimante wib'e', naq o'kxwe' nchin lab'ti tu'nju' mixti' wipumale'. 6Jaku'tzun jaw nnima'n wib'e', ex mya okniwt toj nwitze', qu'n jaku' txinma'ne' ax; laytzun nb'inchaye', tu'ntzun lalun che ximan junjun wi'je' qa nimxi'x woklene' kyetwitz nxinma'ne', 7mujqa tu'n mix-a'lo' yolin tu'n ti'xti' nim toklen tzaj tyek'u'n Dyos weye'. Tu'ntzun lalun jaw nnima'n wib'e', matxi' chin yajtiye' tu'n jun k'ixk'oj naku'j ch'i'x toj nxmilale', tzaj tq'o'n tajaw il tu'n nyajtiye' tu'n. 8Oxmajxi' txinqani'ne' te Qajaw tu'n tel tiq'i'n yajb'il lu wi'je'; 9atzunte Qajaw tzaj tma'n weye': Yaqi'nte' tu'n matxinq'o'ne' nxtalb'ile' teya; qu'n intenxi'x wipumale' tuk'i'la qa mixti' tipumala, chij. Qu'mtzun nchin tzalaje' tu'nju' mixti' wipumale', tu'ntzun tten tipumal Krist wuk'i'le'. 10Ex nchin tzalaje' tu'nju' mixti' wipumale', nchin ilinjtze', mixti' ati weye', ljo'n toj nq'ije' ex nok q'oj wi'je' tu'n tpaj Krist, qu'n kse'n numjni qine' ntenxi'xtl wipumale'. 11Kyu'ne' ẍin oka'ye' se'n jun okni toj twi'. Qu'n aye'wtloye' nchi yolin b'a'n wi'je', qu'n mya naqch'i'nwe' woklen kyekwitzju' nok kyq'o'n kyib' te nimaq apostl. ¡Maskye mixti' woklene' toj kywitze'! 12Tu'nju' matxi' tzik'x wu'ne' toju' yajb'il, eb'a'nq'ob'aj exqe' ti'xti' te lab'te'n enb'inchaye', ekyile', aye'tzun yek'b'ilju' qa apostl qinxi'xe'. 13Naqjun ti'xti' b'a'n min kb'inchaye', makb'incha txqantl okslal kyoj txqantl tnam: ¡Min eonine' wi'je'! kynajsame' qa npaje' tu'n min xinqani'ne' kyeye'. 14Matxi' nb'incha wib'e' tu'n nxi'ye' toxmaji'n xb'etzalkyeye', ex lay txinqani'ne' tu'n kyonine' wi'je'. Myawe' njyo'n aju' ati kyeye', aye'kye' nche njyo'ne'; qu'n aye'nakye' manb'aj nche jyon pwaq kye kyk'wal, myaqe' k'walb'aj nche jyon pwaq te kman. 15Kb'el nnajsa'nwe' nmedi tu'n tkyaqil nk'u'je', expe' ayinku'ye' kb'el nb'ajsa'n wib'e' tu'n kyonete'. Inxi'xna' che nk'u'jla'nkye', ¿ma mixtzunti' kye' kk'u'j wi'je'? 16Kanli kwitze' min nokye' te jun iqtz kyeye'. Ate'tzun junjun nche q'mante qa naq e'kub' nsb'u'ne' ex e'kub'tz'aqe' toj xpatxab' wu'ne'. 17¿Ma eltzun wiq'i'ne' ti'xti' kyeye' kyu'nelju' qitz'in exinsma'ne' xb'etzalkyeye'? 18Xinchq'o'ne' Tito ka'yilkyeye', ex xinchq'o'ne' juntl okslal tuk'i'l. ¿Ma eltzun tiq'i'n Tito ti'xti' kyeye'? ¿Ma myatzun junx nqb'incha'ne' ex junx tb'is qk'u'je' kyeye'? 19Qapelo nkub' kxima'ne' qa nqo qanin najsb'ile' kwitze', mitzun kxa'te'. Ina' qoyolinqe' twitz Dyos ex te Krist qo'ye'. Ex tkyaqil ja'lu maqb'inchaye', e'ntzik ex e'witz'in atixi'x nk'u'je' kyi'je', tu'n kych'iye' toj kyokslab'le'. 20Qu'n nchin xob'e', qaj min nche knetku'ye' wu'ne' se'n wajb'ile' ajnxi'ye' ka'yilkyeye', ex qaj lay chin kyiltle' se'n kyajb'ile'. Nchin xob'e' qaj atiku' tx'a'ltik'u'jb'aj, ik'b'il, q'oj, ẍk'u'ẍil, jk'ujyoli'n, yol ti'j juntl, nimjtib'il ex xitb'il kyxole'. 21Ex nchin xob'e', qaj nchin kub'ku' ch'ixwiye' tu'n nmane' Dyos kyi'je' ajnpone' ka'yilkyeye', ex qaj nchin oq'ku'ye' tu'n kpaje' ajtok nka'yi'ne' txqan kxole' matxi' tzaj tq'ijlalil inx che b'inchan il ex b'ajx kyaja' kq'o'n ajpaji'n exju' iq'b'e'nx kyu'n kukxju'.

will be added

X\