2 Corintios 10

1Ayine' Pawl, nchin kub'sane' kyeye', tu'n t-xtalb'il Krist ex ati tk'u'j qi'j, maskye makmaye' qa me's qine' se'n antine' kxole', atzu'n qa najchaq ta'qine' kuw chin yoline' kyeye'. 2Lan chin okkyq'o'ne' yolil kuw kyuk'i'lju' nche poqonqeye' qa nqb'incha'ne' qaq'une' tu'nx qnab'le' ajnpone' ka'yilkyeye', qu'n luqinwe' tu'n nyolin kyuk'i'lku'. 3Xjal qona'qe', ex minqo q'ojine' kse'nkye xjal te twitz tx'otx'. 4Myaye' kyq'ojb'il xjal nche ajb'en qu'ne', aqe' najb'en qu'n aju' tipumal Dyos kb'antel kyxitj ipumalj tu'n. Iktzu'n che qxitu'ye' poqb'il qeye' 5ex tkyaqil kninb'il kyib'ju' kyajb'il tu'n kmaqun tu'n lalun tz'el kynik' xjal te Dyos. Tkyaqil knab'l xjal kjel qq'o'ne' toj tq'ob' Krist, tu'n kniman te, 6ex luqo'qe' tu'n ttz'e'yset kwitzju' min nche b'in, naqa xxikynima'nkye' tkyaqilju' nxi' qpakb'a'ne'. 7O'kxtzu' toka'kye' kwitz ti'j se'n nok kka'yi'ne'. Qa ati jun q'uqli tk'u'j qa te Krist, ximanx qa ikx te Krist qo'ye'. 8Maskye machin yolinxi'x ch'intle' ti'ju' qoklene', lay chin ch'ixwiye' ti'j; Ate Qajaw tzaj q'onte qoklene' tu'n kych'iy okslal, mya xitulte. 9Min wajb'ile' tu'n tkane toj kwitze' qa xob'tzb'il kyeye' nche'xa' nq'o'ne' wuje'. 10Ate' nche q'mante qa kuwqe'xi'x nyole' kyoj wuje', atzu'n nchin yoline' kxole' mya kuw ex mixyab'a'n tb'inx, chechij. 11Aye'tzu'n nche q'mante ikju', ati tu'n telkynik' ti'j, ikxtzu'n se'n qo yoline' najchaq qa toj u'j mujqa ayo'ku'ye', ikxtzun qaq'unb'enju'ye' ajqtene' kxole'. 12Axxi'x lay tz'ok qq'o'nqe' qib' junx se'nqe' nknima'n kyib'. Aye'tzunkye nok toj kwitz tu'nju' nxi'x knima'nkyib' ex nkub' kmojb'a'n kyib' kyuk'i'l txqantl. 13Lay jaw qnima'nxi'xtlqe' qib'. Ate Dyos tzaj q'onte alkyechaq qaq'une' tu'n qb'inchanteye', ex a q'olte tu'me'l tu'n qpon kanune' kxole' toj Korint. 14Qu'mtzun min nqo ik'qe' tib'aj, ku'xwitloj min opone' nejtl kxole'. O'yo' qeju'ye' opone' nejtl q'olte tpakb'al b'a'n tu'n Krist kyeye'. 15Ex myanaqwit njaw qnima'n qib'e' ti'j kyaq'un txqantl matxi' b'ent. Qajb'ilpe'ye' tu'n qaq'unanxi'xtle' kxole', nche ch'iyxi'ye' toj kyokslab'le', tojxju' qaq'une' tzaj tq'o'n Dyos. 16Ex qajb'ile' tu'n qxilq'eye' pakb'alte tpakb'al b'a'n najchaq kyi'jxi'ye', naq o'kx lay tz'okx qq'o'n qib'e' toj kyaq'un txqantl, tu'n lalun jaw qnima'n qib'e' ti'j kyaq'unb'en txqantl. 17Alkyete tajb'il tu'n tajaw tnima'ntib', nima'nktz tb'i Qajaw. 18Qu'n myate xjal njaw tnima'ntib' b'a'n toj twitz Dyos, ate' b'a'n tb'inchb'aj twitz Dyos.

will be added

X\