2 Corintios 1

1Ayine' Pawl, t-apostl Jesukrist qine' tu'n Dyos, nche'x qq'olb'e'ne' tuk'i'l qitz'in Timotey, aye' okslalqe'ye' te Dyos toj nintnam Korint exqe' txqantl okslal toj tkyaqil tx'otx' Akaya. 2Awt Qman Dyos tuk'i'l Qajaw Jesukrist tzaj q'onte t-xtalb'il ex tnak'b'il kyib'aje'. 3Ajwalinjtzwit Dyos Manb'aj te Qajaw Jesukrist, ate Manb'aj ntzaj laqj tk'u'j qi'j ex a ntzaj q'uqb'ante qk'u'j kukxju'. 4A ntzaj q'uqb'ante qk'u'j toj tkyaqilju' yajb'il nik'x qu'n, tu'n tb'ant qq'uqb'ante kk'u'ju' nche yajti, tu'nxju' q'uqb'ab'l qk'u'j ntzaj tq'o'n Dyos. 5Kse'n yajb'il ik'xtu'n Krist, ikxtzu'n nqo yajta' tuk'i'l, ex ikx tu'nel Krist ntzaj tq'uqb'a'n qk'u'j. 6In qo yajtiqe', tu'n tq'uqb'anjtz kk'u'je' ex tu'n kyklete'; qatzun maq'uqb'anjtz qk'u'je' tu'n Dyos, ex tu'n tq'uqb'anjtz kk'u'je' ex tu'n kykuwixe' tu'n kyik'xju' yajb'il kyu'ne' aye'xju' nche ik'x qu'ne'. 7Q'uqlixi'x qk'u'je' kyi'je', qu'n b'i'n qu'ne', kse'n matxi' che yajtiye', ex ati tu'n tq'uqb'et kk'u'je'. 8E'ntzik ex e'witz'in, qajb'ile' tu'n kb'inteye' nim yajb'il tzaj qi'je' toj tx'otx' Asya. Jun tik'lel qwitzlalile' kuw mixtoqti'x nqipa'ntle', mixpeti' qmaye' qa qo eletze' itz'qo'xe'. 9Majx qna'ye' naku'jtoq qob'el b'yo'ne'. Ajb'en tzunte' lu qeye' tu'n lalun tz'okqe qk'u'je' qi'jxe', tu'n tqe qk'u'je' ti'j Dyos jaw anq'in Krist tu'n kxol kyimni. 10Ex o'tkole' Dyos ex qo tkla'ye' te xob'ajil te kamik. Q'uqli qk'u'je' qa qo tkla'ye' kukxju', 11qama qo kyoniye' tu'n kna'n Dyose' qi'je'. Qa nim okslal ẍena'n Dyos qi'je', ex nim che q'ol chjonte te Dyos tu'nju' tk'i'wb'il ktzajel tq'o'n qeye'. 12In qo tzalaje', ex nxitna'n qk'u'je' b'a'n matxi' qb'inchaye' ex min nqo chanyole' twitz tx'otx', axi'xpe' nmujb'ab'le' kyuk'i'le'. Myatzu' lepcha' qo'qe' ti'j knab'l xjal, q'uqliqe' qk'u'j ti'ju' t-xtalb'il Dyos. 13Mixti'qe' xiqtz'ib'a'n kyoju' quje' junxi'tlwit kyetwitzju' kjawil kyẍch'i'ne' ex kkaneb'el toj kwitze'. Wajb'ilwe' tu'n tkane b'a'nxi'x toj kwitze', 14kse'n matxi' tz'el ch'i'n knik'e' wi'je', tu'n ktzalaje' qi'je' ex tu'n qtzalaje' kyi'je' ajtul Qajaw Jesus. 15Q'uqlitzun nk'u'je' ti'ju' lu, kub' nxima'ne' tu'ntoq nxi'ye' ka'yilkyeye' nejtl, tu'n nten kamaje' xb'etzalkyeye'; 16xima'ntoq wu'ne' tu'n wik'e' nejtl ajnxi'ye' Masedon, ex ajtanjtz wi'je' tu'n wik' jumajtle', tu'nwtzulo kyonine' wi'je' toju' nb'eye' tu'n npone' Juda. 17¿Mamixwittzulo ti'x kub' nxima'ne' b'a'nxi'x tej tkub' nxima'ne' lu? ¿Matuk'il wittzulo kab'e' nk'u'je' ajtb'aj nk'u'n jun nxime' qa inma'ne' okyi ex laytl? 18Ate Dyos ojtzqilte ajtb'aj qnk'u'n junqe' qxim, minti' miltz'ujqe' ti'j qyol. 19Qu'n ate Jesukrist Tk'wal Dyos, ju' nxi' qpakb'a'ne' kxole' kyuk'i'l Silb'ano ex Timotey, min nmiltz'ete ti'j tyol. Junxte yolin tu'n Dyos ex axxi'x, 20tu'nte njapuna' tkyaqilju' ttziya Dyos. Qu'mtzun nxiqma'ne' Ikxwitju' naq tu'nel Krist Jesus ajtjaw qajwali'ne' Dyos. 21Ex ate Dyos nkuwsanqe kyuk'i'le' toj qokslab'l ti'j Krist, ex maqo eltpa'n tu'n qok teku'. 22Matz'ok tq'o'n qechel tu'nku' t-sey, ex matzaj tq'o'n Xewb'aj Xjan toj qanmi te techelju' qk'ma' te. 23Atzu'n tu'n na'mx nxi'ye' Korint se'n xima'ntoq wu'ne', a Dyos ojtzqilte ex a nkub' nq'o'ne' te tziyal wi'je', tu'ntoq lalun tzaj kb'ise' wu'ne'. 24Myayo'qe' tajaw kyokslab'le'; a qeye' qajb'il tu'n qonine' kyuk'i'le', tu'n ktzalaje', matxina' che kuwixkye' toj kyokslab'le'.

will be added

X\