1 Timoteo 5

1Lalun tz'ok tilina jun tijwnaq; ape' b'inchamjuya, q'onxa tnab'l nakuxwitloj tmana; ex yolina b'a'nxi'x kyuk'ilju' ku'xun nakuxwitloj titz'ina mo ttzika. 2Ex q'onqe'ka qya matxi' tzaj kywinqil naku'xwitloj ttxuya; ex ikxqeju' txin nakuxwitloj tanab'a tuk'i'l tkyaqil tanmiya. 3Tz'onina kyi'ju' qya mixti' kychmil aj atixi'x nojqelan toj kychwinqlal. 4Qatzun ati jun qya kyimni tchmil ate' tal mujqa tchman, ayekye' lu ati tu'n toktilil kyu'n tnejelxi'x tu'n tjapun kyu'n aju' tu'n kb'inchante toj kja, iku' se'nxju' ẍe'x ka'yi'n nejku' kyu'nju' kman, qu'n atzunte b'a'nju' toj twitz Dyos. 5Aju' qya qama kyejten axxi'x kyimni tchmil, qama kyejten tjunal, nok qexi'x tk'u'j ti'j Dyos ex inkub'san toj tnaj Dyos qonik'an ex q'ijtl. 6Atzunju' qya kyimni tchmil qa nxi' tq'o'ntib' toj achb'il, matxi' kyim maskye itz'x. 7Qu'mtzun q'maxa kye tkyaqilju' xinma'ne' teya, tu'ntzun mix-a'lo' jun kyolil kyi'j. 8Qu'n qa ati jun okslal minti' nb'ajx tk'u'j tu'n kyonitju' twitze'l exqe'ju' tojku' tja, matxi' tz'el tpa'n tib' ti'ju' tokslab'l expe' nimxi'x til kyekwitzju' na'm kyokslan. 9Oqe'kx qyaju' tu'n ttz'ib'it kb'i kxolju' qya mixti' kychmil qa matxi' che pon toj oxnaq ab'q'i exqa naq jun kychmil ati. 10Ex atzu' k'elela' knik'tzil tu'nju' kb'inchb'aj b'a'n, qama che kych'isa kyal b'a'n, qama txi' kq'o'n kposad xjal kja, qa matxi' che ajb'en tojxi'x tnik'alti'j kxolju' okslal exqa matxi' che onin kyi'ju' nche' yajt. Mujqa makyaq'kyib' tu'n kb'inchante tkyaqilju' b'a'n. 11Aye'tzunju' qya na'm tponju' kyab'q'i lalun che oktq'o'na toj tajlal; qu'n ajtpon kk'u'j ti'j jun ichan inel kypa'n kyib' ti'j Qajaw Jesukrist, ex kyajb'il tu'n kmje jumajtl 12ex tu'ntzun ja'lu noka' kyil tu'nju' minti' njapunju' xini kytziya'n. 13Ex ikx nche' nq'et tu'n kb'et jayi'n ex nche elky'ej; ex myanaq o'kx nche' b'je'l ky'ej, ex ikx nche' nq'et tu'n kjk'un yol, ex jaxjaku' nokxa' klmo'n kyib' ex nche okten q'mal yol myab'a'n tu'n kmante. 14Qu'mtzun awajb'ilju'ye' tu'n kmjeju' qya txinqe'x aj mixti' kychmil, ex tu'n kyalan, ex tu'n txi' kka'yinju' toj kja ex tu'n lalun txi' kq'o'n anb'il kyeju' kyajq'oj tu'n kxmayin kyi'j. 15Qu'n ate' junjun qya mixti' kychmil matxi' tz'el kpa'n kyib' ti'j Dyos ex matxi' che oklpe ti'j tajaw il. 16Qa ati jun qya okslal ati jun qya kyimni tchmil tk'etz, ati tu'n tonin ti'j, tu'ntzun lalun tz'ok te kk'a'ch okslal; tu'ntzun kyoninkye' okslal o'kx kyi'ju' qya mixti'x ati kye. 17Aye'ju' tijwnaq kxol okslal nkb'incha'n kyaq'un b'a'nxi'x, ati tu'n kxi' ka'yit b'a'nxi'x, ex aye'xi'xju' nche' pakb'an ex nche' xnaq'tzan ti'j tyol Dyos. 18Qu'n iku' ntma'n toju' Tu'jil tyol Dyos kjalu: Lalun tz'ok tq'o'na twi' ttxa'nju' wakx in triyan. Ex ikx intma'n: Aju' aq'unal ati toklen ti'ju' twi'tk'u'j. 19Qa ati jun xjal npoqin ti'j jun tijwnaq in kawin kxol okslal, lalun txi' tb'ina qa mixti' kab'e' mujqa oxe' tziyal ti'j. 20Qa ate junjun tijwnaq mache b'inchan il, tzak'unqe'xa kwitz kkyaqil okslal, tu'ntzun tten tchiylal kyeju' txqantl. 21Inxi' wab'tzine' teya twitzku' Dyos, twitz Qajaw Jesukrist ex kwitzku' anjl sk'o'nqe' tu'n, b'inchanxa tkyaqil matxi' txi' nma'ne' teya, ex b'inchama junelni kyib'aj kkyaqil, mya junwit b'a'n tilwi atzun juntel myab'a'n tilwi tu'na. 22Lalun txi' tq'o'na toklenju' jun okslal lwiyxi'x, ximankuya b'a'nxi'x, tu'ntzun lalun jaw tiqanjuya til. Xq'uqimta tib' tu'ntzun ttenju' tchwinqlala toj jun ẍtilun. 23Tu'ntzunju' jachq'al nyab'tiya tu'n tk'u'ja, lalun txi' tk'wana naq o'kx a', ex ikx k'wanxa ch'i'n b'in tuk'i'l. 24Ate' xjal q'ancha'lxi'xju' kyil na'mtoq kyok toj xjel, atzun txqantl tzmaxi' kchik'eb'el ajkyok toj xjel. 25Ex ikxtzunte b'a'n aq'untlju' nkub' chik'e b'a'nxi'x; ex aye'tzunju' aq'untl myab'a'n layx b'ent kkub' e'wa'n.

will be added

X\