1 Timoteo 1

1Ayine' Pawl chq'o'nqine' tu'n Qajaw Jesukrist, ex chq'onqine' tu'n Dyos aj klolqe ex q'uqlok qk'u'j ti'j, 2nxi' nq'olb'e'na Timotey, aya nk'walku'xi'xa toj okslab'l. Awt Qman Dyos ex Qajaw Jesukrist k'iwlanxi'x teya, tzajxwit laqj tk'u'j ti'ja ex tenxwita toj nak'b'il tu'n. 3Kse'n xinkub'sa'ne' teya tu'n tkyeja toju' tnam Epeso, tej nxi'ye' toju' tx'otx' Masedonya, ex ikxtzun wajb'ile' tu'n txi'ya q'malte kyeju' junjun xjal tu'n lalun kyaq' xnaq'tzb'il myab'a'n 4ex tu'n lalun txi' kb'inju' yol naqx la'j ex tu'n lalun b'ajx kk'u'j ti'ju' tz'ib'a'n kyi'ju' ojtxi' kyajilb'en. Qu'n tkyaqil ja'lu naqx wuli'n ntzaj tu'n ex mixti' nonin tu'n telxi'x qnik' ti'ju' tyol Dyos aj najb'en qe toj qokslab'l. 5A tb'is tk'u'j yol lu aju' tu'n qk'u'jlante qib' qxolilex, tuk'ilju' jun tk'u'jlalil ntzaj anq'in toj qanmi majx ẍtilun, ex tu'n qb'inchante b'a'n intma'n qanmi ex tu'n tten qokslab'l axxi'x mya xmletz'. 6Qu'n ate' junjun matxi' che eltxalpuj ti'ju' okslab'l ex matxi' che b'ajxtzpet tu'n tpaj xi' nb'ajxa' kyk'u'j tiju' yol naqx la'j. 7Kyajb'il tu'n kyok xnaq'tzalte tkawb'il Dyos, extzun minti' nkane' toj kwitz aju' nkma'n extzunju' nkxnaq'tza'n. 8Qu'n kanli toj qwitz qa aju' kawb'il b'a'nte', qama b'inchet se'nxju' intma'n. 9Ex ati tu'n tkane' toj qnab'l qa aju' kawb'il myatzu' ta'xixte' tajb'en kyeju' nkb'incha'n b'a'n, atzu' ta'te' tajb'en kyeju' pi's exqe'ju' min nche okslan, kyeju' b'inchal myab'a'n ex aj il, kyeju' mixti' tchiylal Dyos kye, kyeju' nche kub' b'yonte kman ex kye kykyaqilju' nche b'yon wnaq, 10ex kyeju' ajpajil, ex kyeju' ichan nche ajpajin tuk'ilx juntl ichan, ex kyeju' nche elq'an xjal, ex kyeju' chalyol, ex kyeju' ntzaj kna'n Dyos ti'j jun ti'xti', ex kyeju' nche b'inchan txqan ti'xti' taq'wixi'x ex mya nkb'incha'n se'n ntma'nju' xnaq'tzb'il b'a'n. 11Atzunju' xnaq'tzb'il b'a'n saj oqxenante weye' tu'n nyoline' ti'ju' tpakb'al b'a'n tzaj tq'o'n Dyos. 12Inxi' nq'o'ne' chjonte te Qajaw Jesukrist, tu'nju' matzaj tq'o'n wipumale' toju' taq'un ex tu'nju' maqe tk'u'j wi'je' ex machin oktq'o'ne' te ajb'el te, 13extzun nejku' intoq xinma'n txqan nyole' taq'wixi'x ti'j, oknljo'ne' toj tq'ij ex intoq chin wuline' ti'j. Atzun ja'lo matzaj laqj tk'u'j Dyos wi'je', qu'n na'mxtoqna' wokslane' te ex na'mtoq tkane toj nnab'le' qa mya'toq b'a'nju' nb'incha'ne'. 14Atzunte Qajaw Jesukrist xb'inchante xtalb'il we'ye', matzaj tq'o'nju' wokslab'le' ex tk'u'jlalil, tu'nju' mujli qten tuk'i'l Jesukrist. 15Ate Jesukrist ul twitz tx'otx' klol kye aj il, expe' ayinx junwe' nimxi' wile', qu'mtzun qkyaqil ati tu'n qokslante. 16Atzunte Dyos tzaj laqj tk'u'j wi'je', tu'ntzun tel tnik'tzil qa nimte' Dyos tpasensi qi'j. Tu'ntzun ja'lu ẍi noka'ye' te jun yek'b'il kyeju' che okslal te Qajaw Jesukrist tu'n ttenju' kychwinqlal tejumajx. 17¡Qnimanktz ex qajwalinktz tb'i Qman Dyos, qu'n ate nimaqkawil tejumajx, milo kkyimela', mixti' q'ancha'l ex naq junku'! Ikxwitju'. 18- 19Aya Timotey nk'wala toj okslab'l, inxi' wab'tzine' teya tu'n tq'ojina b'a'nxi'x toju' q'oj ljo'n tuk'i'l tokslab'la, tpasensiya, ex na'ntzjuya yol aj kyejni q'ma'n teya kyu'nju' t-sanjelal Dyos. Qu'n ate junjun tu'n minti' kb'inchaju' ntma'n kyanmi matxi' che kub' b'o'lj toj kyokslab'l. 20Qu'n ik b'ajiju' kyi'j Imeney ex Ljantr; ex aye' ja'lu matxi' che'x nq'o'ne' toj tq'ob' Tajaw il, tu'ntzun telkynik' qa myab'a'n nxi' kma'n kyol taq'wix ti'j Dyos.

will be added

X\