1 Tesalonicenses 2

1Kanli kywitze' b'a'nxi'x, e'ntzik ex e'witz'in, qa ajb'enju' tej qpone' xb'etzalkyeye'. 2Kanlipena' kwitze' eb'jo'k tzaqpaj xjal qi'je' ex ob'aj i'li'ne' tnejel toj Pilipo, ex tzaj tq'o'n Dyos qipumale' tu'n txiqpakb'a'ne' tpakb'al b'a'n kyeye' tuk'i'l qkuwale'. 3Qu'n atoqju' ax nxi' qpakb'a'ne' kyeye', myatoq taq'wix qyole' nxiqma'ne' ex mix-a'lo' jun kub' qsb'u'ne'. 4Ik'ni pena' twitz Dyos qi'je' ex tzaj tq'o'n qeye' tu'n txiqma'ne' tpakb'al b'a'n, qu'mtzun nxi' qpakb'a'ne'. A noktilil qu'n aju' b'a'n toj twitz Dyos, myaju' b'a'n toj kwitz xjal, qu'n nik' twitz Dyos tiju' toj qanmi. 5B'i'ntl kyu'ne', b'ajx txa'qma'nqe' tb'anil yol kyeye', ex b'ajx che kub'a' qsb'u'ne' naqxwit tu'n ttzaj kq'o'ne' pwaq qeye'. Tojtzqi'n Dyos ja'lu. 6Mya nqjyo'ne' tu'n qjaw nima'ne': kyu'ne' mujqa kyu'n txqantl. 7Maskyepe' ati qoklene' tu'n qjaw knima'ne', chq'o'n qona'qe' tu'n Krist, ok qq'o'n qib'e' te k'wal kxole'. Kse'n jun txub'aj nche tch'isa'n ex nche'x tka'yi'n talku'xi'x. 8Ex atixi'x qk'u'je' kyi'je', mya o'kx tu'ntoq txiqpakb'a'ne' tpakb'al b'a'n tu'n Dyos kyeye', ex jaku'toq qaq' qib'e' tu'n qkyime' naqkyu'nele'. ¡Inxi'x qo tzalaje' kyi'je'! 9E'ntzik ex e'witz'in, na'n kyu'ne' inxi'xtoq qo aq'unane' ex oktilil qu'ne' tu'n tkanb'et telex qq'ije'. Intoq xiqma'ne' tyol Dyos kyeye' ex intoq qo aq'unane' q'ijtl ex qonik'an, tu'ntoq lalun qo okye' te iqtz kyeye'. 10Kanlixi'x kwitze', ex ojtzqi'n tu'n Dyos, b'a'n qb'inchaye', toj ttzinunal ex mixti' jun myab'a'n qb'inchaye' kxole' okslalqe'ye'. 11Ex kanli kwitze' e'xiqkuwsa'ne' ex xiqq'uqb'a'ne' kk'u'je', kse'n ntb'incha'n jun manb'aj kye tk'wal. 12Xiqoqxe'na'ne' kyeye' tu'n kyanq'ine' kse'nx teku'xi'x Dyos qe'ye', aye' oje che txkonjtz tu'n tten kyoklen toju' tkawb'il ex toj tajwalil. 13Tu'ntzunju' nqo q'on chjonteye' te Dyos kukxju', qu'n tej txiqpakb'a'ne' tyol Dyos kyeye', min kymaye' qa tyol xjal, kyk'ame' tyol ku'xi'x Dyos. Axtzunj ate tyol Dyosju', ntq'o'n twitzlalil toj kychwinqlale' aye'ye' matxi' kyokslaye'. 14Tej kyajtiye' toj kq'ob' kwnaqile', e'ntzik ex e'witz'in, ax b'aju' kyi'je' kse'n b'aj kyi'ju' okslal te Dyos te Krist qe' toj Juda, qu'n ikxkye ljonjtz toj kq'ij kyu'n kywnaqil aj Juda. 15Aye' aj Juda na'j kub' kyb'yo'n Qajaw Jesus, kse'nx tnejel eb'aj kub' kyb'yo'n t-sanjelal Dyos, ex o'etz kxla'ja'ne' kxol. Min nkb'incha'n b'a'n twitz Dyos ex ajq'ojqe' ti'j tkyaqil. 16Min nkjo'n tu'n txiqma'ne' tyol Dyos kye mya aj Juda tu'n kklet. Iktzu'n nkchmo'na'xi'xtl kyil. Tu'ntzun tpaj ja'lu tzul tz'e'ysb'il kwitz kuwxi'x tu'n Dyos. 17E'ntzik ex e'witz'in, tej qik'b'ete' kxole', maskye min nokqka'yi'ntl qwitz, na'nqe'ye' qu'ne' toj qanmiye' kukxju' ex qajb'ilxi'xtoqe' tu'n qpontle' ka'yilkyeye'. 18Oxi'toqtzune'; expe' ayine' Pawl, b'a'npunxi'maj intoq chinxe', atzu'n tajaw il nqo tmqo'ne'. 19Qu'n ¿altzun qi'j tu'n tqe qk'u'je' ex tu'n qtzalaja'ye' twitz Qajaw Jesus ajtul? ¿Ma myatzun kyi'je' qo tzalajela'ye' tu'n qaq'unb'ene' twitz Qajaw? 20Kyi'je' qo nimanjtzela'ye' ex qo tzalajela'ye'.

will be added

X\