1 Ayine' Pawl tuk'i'l Silb'ano ex Timotey, nche'x qq'olb'e'ne' okslalqe'ye' te Qman Dyos ex te Qajaw Jesukrist, ate' toju' nintnam Tesalonik. Awt t-xtalb'il Qman Dyos ex tnak'b'il ten kyib'aje'. 2 Nxi' qq'o'ne' chjonte te Dyos kukxju' kyi'je' kkyaqile', ex nche'x qoqxena'ne' toj qna'j Dyose'. 3 Ntzaj qna'ne' taq'unb'en kyokslab'le' kukxju', tu'nju' kyk'u'jlalile' ex tu'n in ik'xkyu'ne' tu'nju' q'uqli kk'u'je' ti'j Qajaw Jesukrist twitz Qman Dyos. 4 E'ntzik ex e'witz'in, k'u'jla'n qe'ye' tu'n Dyos, b'i'n qu'ne' ate jaw sk'on kyeye'. 5 Qu'n tej txi' qma'ne' tpakb'al b'a'n kyeye', mya naqx tu'n yol, ex xiqyek'u'ne' tipumal Dyos ati quk'i'le' exju' ntb'incha'n Xewb'aj Xjan, tuk'i'l nim t-xtalb'il Dyos. Kanli kwitze' se'n o'anq'ina'ye' kxole', oktililu' tnik'alilti'j qu'ne' tejun b'a'n kyeye'. 6 Aye'tzunkye', el kykno'ne' qi'je' ex exilpeye' ti'j Qajaw, ex kk'ame' tpakb'al b'a'n tuk'i'l tzalajb'il ntzaj tq'o'n Xewb'aj Xjan kyeye' toju' yajb'il kyi'je'. 7 Ikytzu'n e'oka'ye' te jun yek'b'il kye kkyaqil okslal kyoju' tx'otx' Masedon ex Akaya. 8 Ma tzyet-x kyu'ne', matxi' t-xim len tqanilju' tyol Qajaw, mya o'kx kyoj Masedon ex Akaya, ex ikx toj tkyaqil plaj, matxi' b'injtz tqanil kyokslab'le' ti'j Dyos, min nojqelantl tu'n txiqma'ne'. 9 Aye'xpekye nche q'mante qa o'kk'ame' b'a'n ex b'aj kyej kkolb'e'ne' witzleb'il ex antzkyi'je' tuk'i'l Qman Dyos itz' ex axxi'x, tu'n kyajb'ene' te 10 ex nche ayone' tu'n tanjtztlti'j Jesus toj kya'j, ju' Tk'wal Dyos, jaw anq'in tu'n Dyos. Ate Jesus klolqe teju' tz'e'ysb'il witzb'aj xob'ajilx tzul.
