1 Wajb'ile' tu'n txinq'o'ne' kynab'lju' tijwnaq kyxole', ex tijwnaq qinwe' kse'nkye, ex kanli nwitze' ik'x yajb'il tu'n Krist, ex ati woklene' tu'n njaw nima'ne' junx kyuk'i'l toj tajwalil Krist ajtul jumajtl. 2 Kyk'ik'lem qe'ye' trit Dyos e'kyaj q'o'ne' ka'yilkye; kyka'yinqexe' tu'n tkyaqil kyk'u'je' kse'nx tajb'il Dyos, mya tu'nwt chq'o'n qe'ye' ex mya kanb'ab'l txqan pwaq, che ajb'enqe'ye' kyxol tu'n tkyaqil kyk'u'je'. 3 Lalun tz'ok kyq'o'n kyib'e' ku'wtloj aye'ye' kajawju' rit e'ok q'o'ne' ka'yilkye, che okpekye' jun b'a'n yek'b'il kye. 4 Ajtzun tulju' nejenel kye k'ik'lel, kyk'ma'ye' kyoklene' toj tajwalil, jun koron layx kub' tzqij. 5 Ex ikxkye' ku'xun, che nimanqe'ye' te kykawb'il tijwnaq. Kyq'om kawi' kyib'e' jun te juntl toj me'sb'il kykyaqile', qu'n: Nq'ojin Dyos kyi'ju' nkynima'n kyib' aye'tzu'n me'sqe' nche toni'n tu'n t-xtalb'il. 6 Kyme'ssa'nku' kyib'e' toju' tkawb'il Dyos nimtipumal, tu'ntzun kyjaw nima'ne' tu'n ajtjapun tq'ijlalil. 7 Kyq'onku'ye' tkyaqilju' nb'ajx kyk'u'je' ti'j toj tq'ob' Dyos, ka'yi'n qena'kye' tu'n. 8 Che ximanqe'ye' b'a'nxi'x ex b'a'nqe'xe', qu'n aju' tajaw il kyajq'oje', nxi'x tzanun kse'n jun b'alun, njyon alkye kxel tch'yo'n. 9 Che we'ku'ye' twitz b'a'nxi'x toj kyokslab'le', b'i'nxi'x kyu'ne' ax yajb'ilju' nik'xkyu'n okslal toj tkyaqil plaj twitz tx'otx' kse'n nik'xkyu'ne'. 10 Tb'ajlenxi'tzun jte' q'ij yajb'il kyi'je', axte Dyos ktzinsalkyeye', kche tkuwsa'ye' toj kyokslab'le', tu'n tten kyipumale' ex tu'n tqexi'x kyk'u'je' ti'j. Ate Dyos txkonqe tu'nju' nim tk'u'jlalil qi'j, tu'n qten toj tajwalil tejumajx tu'nju' qmujb'ab'l tuk'i'l Jesukrist. 11 Nimanjtzwit tb'i Dyos ex kawinxwit tejumajx. Ikxwitju'. 12 Matxi ntz'ib'a'ne' u'j lu tu'n txi' tiq'i'n Silb'ano kyeye', kanli nwitze' njapun tu'n qtzik lu toj taq'un Dyos, tu'n txi' nq'o'ne' kynab'le' ex tu'n tkane toj kywitze' qa aju' ky'i'wb'il matxi' kyk'ame', jun yek'b'il axxi'x qa nche k'u'jlanjtze' tu'n Dyos. ¡Che we'ku'ye' b'a'nxi'x toju' t-xtalb'il! 13 Nche'x q'olb'e'ne' kyu'n okslal ate' toj B'ab'ilon, aye' e'jaw t-sk'o'n Dyos kse'nxkye, ex nche'x q'olb'e'ne' tu'n Kuẍ ju' nk'wale'. 14 Kyq'olb'em kyib'e' tu'n jun ma'tz tuk'i'l tk'u'jlalil. Tenxwit nak'b'il kyxole' kykyaqile' okslalqe'ye' te Krist.
